ជាតិ
ការប្រែប្រួលអាកាសធាតុ ជាបញ្ហាមួយជំនាន់រស់នៅរបស់មនុស្ស
×
«បម្រែបម្រួលអាកាសធាតុមិនមែនត្រឹមតែជាបញ្ហារយៈពេលមួយម៉ោងនោះទេ តែវាជាបញ្ហាសម្រាប់ជំនាន់រស់នៅរបស់យើង»។នេះបើតាមប្រសាសន៍របស់លោក ឈិត សំអាត នាយកអង្គការមូលនិធិសកលសម្រាប់ធនធានធម្មជាតិWWF ប្រចាំនៅកម្ពុជា។ លោកឈិត សំអាត បន្តថា៖«ភ្លើងអគ្គិសនីនឹងអាចត្រូវបានបិទរយៈពេលតែមួយម៉ោង ប៉ុន្តែសកម្មភាពរបស់មនុស្សរាប់លាននាក់នឹងនៅតែបន្តពេញមួយឆ្នាំ ដើម្បីបង្ហាញពីការទប់ស្កាត់ការប្រែប្រួលអាកាសធាតុ» ។
អង្គការ WWF នឹងរៀបចំទិវាមួយម៉ោងសម្រាប់ភពផែនដី (Earth Hour) នៅថ្ងៃសៅរ៍ ទី២៨ ខែមីនា ចុងសប្តាហ៍នេះ។ ទិវាមួយម៉ោងសម្រាប់ភពផែនដី គឺជាចលនាបរិស្ថានដែលធំជាងគេនៅលើពិភពលោកក្នុងការទប់ស្កាត់ការប្រែប្រួលអាកាសធាតុ។ នេះបើយោងតាមសេចក្តី ប្រកាសព័ត៌មានរបស់អង្គការWWF។
បើតាមសេចក្តីប្រកាសព័ត៌មានដដែល នៅឆ្នាំនេះ ពិភពលោកនឹងប្រារព្ធទិវាមួយម៉ោងសម្រាប់ភពផែនដីក្រោមប្រធានបទ «ប្រើប្រាស់ឥទ្ធិពលរបស់អ្នក ដើម្បីផ្លាស់ប្តូរបម្រែបម្រួលអាកាសធាតុ»។
នៅកម្ពុជាទិវានេះ នឹងរៀបចំនៅក្រុងភ្នំពេញ សហគមន៍ និងស្ថាប័នជំនួញផ្សេងៗ ដោយនឹងមានការបិទភ្លើងរយៈពេល១ម៉ោង នៅម៉ោង៨កន្លះដល់ម៉ោង៩កន្លះយប់ ដើម្បីបង្ហាញឆន្ទៈក្នុងការចូលរួមការពារបរិស្ថាន។ កម្មវិធីបិទភ្លើងជាសញ្ញា នឹងធ្វើឡើងនៅតារាងបាល់ទាល់ ក្នុងបរិវេណសាកលវិទ្យាល័យភូមិន្ទភ្នំពេញ(RUPP) ។
សេចក្តីប្រកាសព័ត៌មានរបស់អង្គការWWF បានបញ្ជាក់ទៀតថា ក្រៅពីការបិទភ្លើងជានិមិត្តសញ្ញា ក៏មានការសម្តែងកំសាន្តដែលបង្ហាញពីការយកចិត្តទុកដាក់ចំពោះបរិស្ថាន និងបញ្ជាក់ថាតើពួកគេអាចប្រើប្រាស់ឥទ្ធិពលរបស់គេបែបណាដើម្បីចូលរួមក្នុងសកម្មភាពការពារបរិស្ថានរបស់ប្រទេសកម្ពុជាក៏ដូចជាភពផែនដីទាំងមូល។
សូមបញ្ជាក់ថា ទិវានេះ បានចាប់ផ្តើមឡើងដំបូងគេនៅក្រុងស៊ីដនី ប្រទេសអូស្ត្រាលី នៅឆ្នាំ២០០៧ ។ នេះគឺឆ្នាំទី៧សម្រាប់ពិភពលោក និងជាឆ្នាំទី៤នៅកម្ពុជា ដែលប្រារព្ធទិវាមួយម៉ោងសម្រាប់ភពផែនដី។មិនត្រឹមតែកម្ពុជានោះទេដែលប្រារព្ធទិវានេះ ប្រទេសចំនួន១៦២ និងក្រុងជាង៧ពាន់ផ្សេងទៀតនៅលើពិភពលោក ក៏ចូលរួមទិវាមួយម៉ោងសម្រាប់ភពផែនដីនេះដែរ៕
© រក្សាសិទ្ធិដោយ thmeythmey.com