អន្តរជាតិ
រដ្ឋាភិបាលថៃព្រមានពិន័យស្រីស្អាតដែលចូលចិត្តថតរូប Selfie បង្ហាញគល់សុដន់
× រដ្ឋាភិបាលយោធាថៃរបស់លោក ប្រាយុទ្ធ ចាន់អូចា មិនត្រេកត្រអាលឡើយនឹងរូបថត Seflie បង្ហាញគល់សុដន់របស់ស្រីស្អាតទាំងឡាយតាមរយៈបណ្តាញសង្គមនានា។ «វាជាទង្វើដែលមិនអាចទទួលយកបាន និងធ្វើឲ្យអាប់ឱនកិត្តិយសប្រទេសជាតិ» នេះបើតាមសម្តីមន្ត្រីរដ្ឋាភិបាលដែលដកស្រង់ដោយទីភ្នាក់ងារព័ត៌មានរ៉យទ័រ។
«Undersboob selfies» បានក្លាយជាការពេញនិយមរបស់ស្រីស្រស់មួយចំនួននៅក្នុងប្រទេសថៃ ដើម្បីបង្អួតសុដនដ៏មូលក្លំរបស់ខ្លួនតាមរយៈបណ្តាញសង្គមនានា។ ការបង្ហោះរូបទាំងនោះ ទទួលបាននូវការចាប់អារម្មណ៍យ៉ាងច្រើនទាំងការកោតសរសើរ ការបញ្ចើចបញ្ចើ និងការជេរប្រមាថ។
ការព្រមានដោយបើកចំហរកាលពីដើមសប្តាហ៍កន្លងមកនោះ គឺដោយរដ្ឋាភិបាលយោធាថៃ មើលឃើញថា ទង្វើថតរូប «Undersboob selfies» បានរំលោភទៅលើច្បាប់ឧក្រិដ្ឋកម្មកំព្យូទ័ររបស់ថៃ ដែលចូលជាធរមានកាលពីឆ្នាំ២០០៧ ។ យោងតាមច្បាប់ ទង្វើដែលធ្វើឲ្យប៉ះពាល់ដល់សន្តិសុខ និងអារម្មណ៍សាធារណជន ត្រូវហាមប្រាម។
លោក Anandha Chouchoti អ្នកនាំពាក្យក្រសួងវប្បធម៌ថៃ បានថ្លែងប្រាប់រ៉យទ័រថា អ្នកប្រព្រឹត្តអាចប្រឈមនឹងការជាប់ពន្ធនាគារ៥ឆ្នាំ។ ប៉ុន្តែលោកបានលើកឡើងថា វាជារឿងដ៏ពិបាក ពីព្រោះរូបថតដែលត្រូវបានបង្ហោះឡើង គេមិនបង្ហាញមុខឡើយ ដូច្នេះ អាជ្ញាធរមិនដឹងថា អ្នកណាជាអ្នកប្រព្រឹត្តនោះទេ។
ស្របពេលជាមួយគ្នានោះផងដែរ ក្រុមមេធាវីថៃ បានបញ្ជាក់ថា អ្នកប្រព្រឹត្តអាចប្រឈមនឹងការពិន័យចំនួន៦០០០បាត (១៨៣ដុល្លារអាមេរិក)។ ទោះបីជាយ៉ាងណាក៏ដោយ អាជ្ញាធរថៃ ទទួលស្គាល់ថា រូបថតមួយចំនួនគឺជាការកាត់ត ឬលួចថត ដែលវាមិនមែនជាការប្រព្រឹត្តរបស់បុគ្គលផ្ទាល់នោះឡើយ៕
© រក្សាសិទ្ធិដោយ thmeythmey.com