កីឡាជាតិ
AFC U23៖ កម្ពុជាប៉ះកូរ៉េខាងជើងដែលជាក្រុមខ្លាំងមួយប្រចាំតំបន់អាស៊ី នាវេលាម៉ោង៤រសៀលនេះ Jo Kwang និង ហូយ ផល្លីន ធ្លាប់ជួបគ្នាក្នុងការប្រកួត U16។ Kwang រកបាន២គ្រាប់ឲ្យកូរ៉េខាងជើង។ រូប Goal និង Ishikawa
× ក្រុមកីឡាបាល់ទាត់យុវជនជម្រើសជាតិអាយុក្រោម២២ឆ្នាំ កម្ពុជា ត្រូវប្រកួតលើកទីពីរនៅក្នុងពូល G នៃព្រឹត្តិការណ៍ប្រកួតជម្រុះ AFC U-23 Championship ដោយត្រូវប៉ះជាមួយក្រុមខ្លាំងកូរ៉េខាងជើងនាវេលាម៉ោង៤រសៀលថ្ងៃទី២៩ ខែមីនា ឆ្នាំ២០១៥នេះ នៅកីឡដ្ឋាន Rajamangala ក្រុងបាងកក ប្រទេសថៃ។ កម្ពុជា បានឆាកជាមួយនឹងបរាជ័យដ៏គួរឲ្យសោកស្តាយក្នុងលទ្ធផល ២-១ ដោយសារម្ចាស់ផ្ទះថៃ ខណៈដែលកូរ៉េខាងជើង បានយកឈ្នះហ្វីលីពីន ៤-០ នៅថ្ងៃដដែល។
បើទោះបីជាយុវជនកម្ពុជា បានចាញ់ម្ចាស់ផ្ទះថៃ ២-១ នៅតែប៉ុន្មានវិនាទីចុងក្រោយនៃការប្រកួតកាលពីថ្ងៃសុក្រកន្លងមក ក៏ដោយ ក៏កីឡាករកម្ពុជានៅតែទទួលបាននូវសារលើកទឹកចិត្តពីសំណាក់ អ្នកគាំទ្រ។ អ្នកចាំទី អ៊ុំ សិរីរ័ត្ន ដែលសង្គ្រោះបាល់ជាច្រើនលើក ត្រូវបានចាត់ទុកថា ជាកីឡាករឆ្នើមប្រចាំការប្រកួត ខណៈការស៊ុតបាល់ហ្វ្រីឃីកដ៏អស្ចារ្យរបស់ប្រធានក្រុម ប្រាក់ មុន្នីឧត្តម ទទួលនូវការកោតសរសើរយ៉ាងខ្លាំង។
នៅក្នុងតំបន់ កម្ពុជាគឺប្រទេសដែលមានទំនាក់ទំនងការទូតយូរជាងគេជាមួយកូរ៉េខាងជើង ប៉ុន្តែជំនួបបាល់ទាត់រវាងក្រុមទាំងពីរគឺជារឿងដ៏កម្រ។ សម្រាប់ជម្រើសជាតិឈុតធំ កម្ពុជា និងកូរ៉េខាងជើង បានជួបគ្នាតែម្តងគត់ ដោយការប្រកួតកាលពីថ្ងៃទី២៥ ខែវិច្ឆិកា ឆ្នាំ១៩៦៦ នាជំនួបនៃព្រឹត្តិការណ៍អាស៊ីហ្គាណេហ្វូនៅពហុកីឡដ្ឋានជាតិ កូរ៉េខាងជើងបានយកឈ្នះកម្ពុជា ២-០ ។
ជំនួបចុងក្រោយរវាង ក្រុមនៃប្រជាជាតិជាមិត្តទាំងពីរ គឺក្នុងព្រឹត្តិការណ៍វគ្គជម្រុះ AFC U-16 Championship នៅក្នុងទីក្រុងបាងកកដូចគ្នា។ នៅក្នុងការប្រកួតកាលពីថ្ងៃទី១៩ ខែតុលា ឆ្នាំ២០០៩ កូរ៉េខាងជើងបានយកឈ្នះកម្ពុជារហួតដល់ទៅ ៥-០ ។
អ្នកចាំទី ប្រាក់ មុន្នីភារុន ខ្សែបម្រើ ចាន់ វឌ្ឍនាកា និង ហូយ ផល្លីន គឺជាសមាជិកនៃក្រុមយុវជនកម្ពុជាក្រោមការដឹកនាំរបស់គ្រូបង្វឹកជប៉ុន Daisuke Yoshioka នាព្រឹត្តិការណ៍ AFC U-16 Championship ខណៈក្រុម U-22 កូរ៉េខាងជើង មានសមាជិកជាច្រើនដែលបាននាំឲ្យកូរ៉េខាងជើងលើកពាន AFC U-16 Championship ជាប្រវត្តិសាស្ត្រកាលពីឆ្នាំ២០១០ និងមានឈ្មោះបន្តទៅកាន់ព្រឹត្តិការណ៍ World Cup អាយុក្រោម១៧ឆ្នាំ។
កាលពីឆ្នាំ២០១២ នាការប្រកួតជម្រុះក្នុងព្រឹត្តិការណ៍ AFC U-22 Championship ដូចគ្នានៅក្នុងទីក្រុងវៀងចន្ទន៍ ប្រទេសឡាវ កូរ៉េខាងជើងបានយកឈ្នះកម្ពុជា ៣-០ បន្ថែមទៀត។ ខ្សែការពារ នេន សុធារ័ត្ន គឺជាកីឡាករតែម្នាក់គត់ក្នុងជម្រើសបច្ចុប្បន្នដែលបានបង្ហាញខ្លួននាការប្រកួតពេលនោះ។
សម្រាប់ U-22 កូរ៉េខាងជើង ខ្សែប្រយុទ្ធ Jang Ok-chol និង Jo Kwang ធ្លាប់មានប្រវត្តិស៊ុតបាល់បញ្ចូលទីលើក្រុមកម្ពុជានាជ័យជម្នះ ៥-០ នាព្រឹត្តិការណ៍ប្រកួតជម្រុះ AFC U-16 Championship។ កីឡាករ U-22 ឆ្នើមផ្សេងទៀតដែលនាំឲ្យកូរ៉េខាងជើងលើកពាន U-16 កាលពីឆ្នាំ២០១០ រួមមាន ខ្សែការពារ Jong Kwang Sok និងខ្សែបម្រើ Ju Jong Chol ជាដើម។
លោកគ្រូ បង្វឹកជនជាតិកូរ៉េខាងត្បូង របស់កម្ពុជា Lee Tae Hoon ធ្លាប់បានបង្ហាញសាច់ដុំ លើឆាកអន្តរជាតិ ប៉ុន្មានប្រកួតជាប់ៗគ្នាមកហើយ ប៉ុន្ដែលើកនេះត្រូវរកវិធីសាស្ត្រថ្មី ព្រោះជួបជាមួយក្រុមបងប្អូនបង្កើតកូរ៉េខាងជើង ម្ដង។
បើនិយាយ ពីក្រុមកូរ៉េខាងជើង វិញបានយកឈ្នះក្រុម ហ្វីលីពីន ដោយលទ្ធផល ៤ – ០ កាលពីថ្ងៃបើកវគ្គពូល G លើទីលានប្រកួតនៅប្រទេសថៃ ដូចគ្នា។ កីឡាករ Ri Hyong Jin, So Kyong Jin, Jang Ok-chol និង Pak Hyong-il សុទ្ធតែជាអ្នកនាំសំណាងឱ្យក្រុម ក្នុងប្រកួតលើកទី១ ។
ចំណាត់ថ្នាក់ បណ្ដោះអាសន្ន នៅពូល G មាន កូរ៉េខាងជើង និង ថៃ ឈរកំពូលតារាង ក្រោយមាន ៣ ពិន្ទុក្នុងដៃដូចគ្នា ហើយកម្ពុជា និង ហ្វីលីពីន នៅបាតតារាង ព្រោះមិនទាន់មានពិន្ទុកាន់នៅឡើយ។
វគ្គជម្រុះ 2016 AFC U-23 Championship មានក្រុមចូលរួមចំនួន ៤៣ ប្រទេស ដែលជាសមាជិកក្នុងទ្វីបអាស៊ី ដោយចែកជា ១០ ពូល។ ក្រុមខ្លាំងជាងគេចំនួន ១៦ មានកៅអីឡើងទៅប្រកួតជុំផ្ដាច់ព្រ័ត្រ ដែលរៀបចំនៅប្រទេសកាតារ ចាប់ពីថ្ងៃទី ១២ ដល់ ៣០ ខែ មករា ឆ្នាំ ២០១៦។ ម្យ៉ាងទៀតការប្រកួតនេះក៏ជាការប្រកួតជម្រុះ ស្វែងរកក្រុមចំនួន ៤ តំណាងឱ្យទ្វីប ឡើងទៅលេងក្នុងពានរង្វាន់ អូឡាំពិក រដូវក្ដៅ ឆ្នាំ ២០១៦ នៅទីក្រុង Rio ប្រទេសប្រេស៊ីល ផងដែរ៕
សម្រាប់ប្រកួតនៅថ្ងៃនេះ ១៨ គូមាន៖
ហុងកុង Vs មីយ៉ាន់ម៉ា
ប្រ៊ុយណេ Vs ឥណ្ឌូណេស៊ី
ម៉ាកាវ Vs ម៉ាឡេស៊ី
ឥណ្ឌា Vs ស៊ីរី
កម្ពុជា Vs កូរ៉េខាងជើង
សិង្ហបុរី Vs ចិន
នេប៉ាល់ Vs អារ៉ាប៊ីសាអ៊ូឌីត
ចិនតៃវ៉ាន Vs អូស្ត្រាលី
បង់ក្លាដេស Vs អ៊ូបេគីស្ថាន
ហ្វីលីពីន Vs ថៃ
ទីម័រខាងកើត Vs កូរ៉េខាងជើង
ម៉ុងហ្គោលី Vs ឡាវ
វៀតណាម Vs ជប៉ុន
អ៊ីរ៉ង់ Vs អាហ្វហ្គានីស្ថាន
ស្រីលង្កា Vs យេមែន
អូម៉ង់ Vs ម៉ាល់ឌីវ
តាហ្ស៊ីគីស្ថាន Vs អារ៉ាប់រួម
បារ៉ែន Vs អ៊ីរ៉ាក់
© រក្សាសិទ្ធិដោយ thmeythmey.com