ជាតិ
នយោបាយជាតិ
តុលាការកោះហៅ លោក កឹម សុខាឲ្យចូលបំភ្លឺក្រោយពីការព្រមានរបស់លោក ហ៊ុន សែន
×![]()
ដោយ: ធឿន បញ្ញាឬទិ្ធ
តុលាការដំបូងរាជធានីភ្នំពេញ កោះហៅ លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភា ឲ្យចូលទៅបំភ្លឺនៅថ្ងៃទី ៨ មេសាខាងមុខ ពីបទ ពាក់ព័ន្ធនឹងករណីបាតុកម្មហិង្សានៅម្តុំផ្លូវវ៉េងស្រេងកាលពីឆ្នាំ២០១៤កន្លងទៅ។
លោក ចាន់ ចេន មេធាវីការពារក្ដីលោក កឹម សុខា បានប្រាប់សារព័ត៌មានថ្មីៗនៅព្រឹកនេះ ឲ្យដឹងថា លោកបានទទួលដីការព្រះរាជអាជ្ញារងរាជធានីភ្នំពេញ លោក លី សុផាន់ណា ដើម្បីកោះហៅលោក កឹម សុខា អនុប្រធានទី១សភាជាតិទៅបំភ្លឺនៅតុលាការ ពីបទ បាតុកម្មហិង្សានៅផ្លូវវេងស្រេងកាលពីដើមឆ្នាំ២០១៤កន្លងទៅ ។ ប៉ុន្ដែការហៅលោក កឹម សុខា នេះ ត្រូវបានលោក ចាន់ ចេន យល់ឃើញថា ហាក់ដូចជាមិនត្រឹមត្រូវតាមច្បាប់នោះឡើយ ។
មេធាវីការពារក្ដីរូបនេះពន្លយ់យ៉ាងដូច្នេះថា ៖« លោកកឹម សុខាគឺគាត់មានអភ័យឯកសិទ្ធិជាតំណាងរាស្ត្រ និងជាអនុប្រធានទី១ រដ្ឋសភា ដូចនេះបើតុលាការចង់កោះហៅសាកសួរ ទាល់តែស្នើលិខិតបញ្ជាក់ពីក្រសួង យុត្តិធម៌ និងស្នើទៅប្រធានរដ្ឋសភាជាមុនសិន មុននឹងបញ្ជូនមកលោក កឹម សុខា ។ លោក ចាន់ ចេន បន្ថែមដោយការងឿងឆ្ងល់ថា៖«តើតុលាការមានសិទ្ធិសួរលោក កឹម សុខា ដែរឬទេ ? ទាំងលោក កឹម សុខា មានអភ័យឯកសិទ្ធិដូច្នេះ»។
បើតាមលោក ចាន់ ចេន នៅពេលនេះលោកមិនទាន់បានពិភាក្សាជាមួយលោក កឹម សុខា ពីដីការកោះអញ្ជើញនេះនៅឡើយទេ ។ ប៉ុន្ដែលោកមេធាវីការពារក្ដីលោក កឹម សុខា រូបនេះ គ្រាន់តែអះអាងថា លោក កឹម សុខា គឺជាមនុស្សមិនចេះគិតវេសនោះទេ ។
ការកោះហៅលោក កឹម សុខានេះកើតឡើង ក្រោយពីលោកនាយករដ្ឋមន្ត្រី ហ៊ុន សែន បានស្នើឲ្យតុលាការចាត់វិធានការផ្លូវច្បាប់ ទៅលើលោក កឹម សុខា អនុប្រធានគណបក្សសង្គ្រោះជាតិ ចំពោះពាក្យសំដីរបស់លោក កឹម សុខា ដែលបានថ្លែងថា លោកចង់ផ្តួលរលំគណបក្សកាន់អំណាច តែមិនបានសម្រេច ៕
© រក្សាសិទ្ធិដោយ thmeythmey.com
