អន្តរជាតិ
នយោបាយអន្តរជាតិ
ធនាគារចិនទាក់ទាញសម្ពន្ធ័មិត្តអាមេរិកម្តងមួយៗ
×
ធនាគារវិនិយោគហេដ្ឋារចនាសម្ពន្ធ័អាស៊ី (AIIB)ដែលដឹកនាំដោយរដ្ឋាភិបាលទីក្រុងប៉េកាំងបានទាក់ទាញមេដឹកនាំកំពូលៗដែលជាសម្ពន្ធ័មិត្តរបស់សហរដ្ឋអាមេរិកចូលជាស្ថាបនិកជាបន្តបន្ទាប់ខណៈពេលដែលរដ្ឋាភិបាលទីក្រុងវ៉ាស៊ីននៅស្ទាក់ស្ទើរនៅឡើយក្នុងការចូលរួមជាមួយធនាគារនេះ។
ក្រោយពីសម្ពន្ធ័មិត្តរបស់សហរដ្ឋអាមេរិករួមមានអាល្លឺម៉ង់ អ៊ីតាលី បារាំង និងអង់គ្លេសបានប្រកាសចូលជាស្ថាបនិករបស់ធនាគារវិនិយោគហេដ្ឋារចនាសម្ពន្ធ័អាស៊ីម្សិលមិញនេះរដ្ឋាភិបាលអូស្ត្រាលីក៏បានសម្រេចថានឹងចូលជាសមាជិករបស់AIIB ដោយភ្ជាប់ជាមួយនឹងលក្ខខណ្ឌមួយចំនួនផងដែរ។
ដោយសារតែដំណើរការនៃធនាគារវិនិយោគហេដ្ឋារចនាសម្ពន្ធ័អាស៊ី មានការវិវត្តន៍យ៉ាងរលូន ក្រោមការដឹកនាំដោយចិន និងបណ្តាប្រទេស ២៦ នៅអាស៊ី និងមជ្ឈិមបូព៌ាផ្សេងទៀត បានធ្វើអោយសម្ពន្ធ័មិត្តធំៗរបស់សហរដ្ឋអាមេរិកបានសម្រេចប្រកាសចូលជាសមាជិកជាបន្តបន្ទាប់ក្នុងនោះរួមមានអាល្លឺម៉ង បារាំង អង់គ្លេស អ៊ីតាលី លុចហ្សាំបួរ និងស្វ៊ីស ផងដែរ។
បន្ថែមពីនេះបើយោងតាមសេចក្តីថ្លែងការណ៍របស់លោកនាយករដ្ឋមន្ត្រីអូស្ត្រាលីតូនីអាបូតនិងលោក Joe Hockey មន្ត្រីរតនាគារអូស្ត្រាលីកំពុងចរចាលើតួនាទីមួយចំនួនជាមួយចិនមុននឹងចូលជាសមាជិកស្ថាបនិកនៃAIIB។ក្នុងនោះរដ្ឋាភិបាលអូស្ត្រាលីបានស្នើចំណុចពីរធំៗរួមមានអូស្ត្រាលីត្រូវមានតំណែងជាអគ្គនាយកដែលមានសិទ្ធិសម្រេចនៅក្នុងធនាគារនិងត្រូវបញ្ចូលគោលកាណ៍របស់ធនាគារដោយមិនត្រូវមានប្រទេសណាមួយមានសិទ្ធិគ្រប់គ្រងទាំងអស់ទៅលើធនាគារនោះទេ។
លើសពីនេះទៅទៀតលោកតូនីអាបូតក៏បានលើកទឹកចិត្តឲ្យAIIB គួរតែសហប្រតិបត្តិការជាមួយមូលនិធិរូបិយវត្ថុអន្តរជាតិ (IMF) ធនាគារពិភពលោក(World Bank) ធនាគារអភិវឌ្ឍន៍អាស៊ី(ADB) ដែលដឹកនាំដោយសហរដ្ឋអាមេរិក និងជប៉ុនផងដែរ។
ជុំវិញនៃការកើនឡើងនៃការចូលជាសមាជិករបស់ធនាគារវិនិយោគហេដ្ឋារចនាសម្ពន្ធ័អាស៊ីដោយប្រទេសសម្ពន្ធ័មិត្តធំៗរបស់អាមេរិកបានធ្វើអោយរដ្ឋាភិបាលទីក្រុងវ៉ាស៊ីនតោនប្រតិកម្មយ៉ាងខ្លាំង ព្រោះការវិវត្តន៍នៃAIIB នឹងធ្វើឲ្យតួនាទីរបស់ស្ថាប័នហិរញ្ញវត្ថុដែលដឹកនាំដោយសហរដ្ឋអាមេរិកបាត់បង់ឥទ្ធិពលខ្លួននៅក្នុងឆាកអន្តរជាតិ។ បន្ថែមពីនេះរដ្ឋាភិបាលទីក្រុងវ៉ាស៊ីនតោនក៏បានទទួចឲ្យ រដ្ឋាភិបាលទាំងអស់ ត្រូវពិនិត្យឡើងវិញ ឲ្យបានម៉ត់ចត់លើគោលការណ៍សំខាន់របស់ AIIB មុនពេលក្លាយជា សមាជិកពេញអង្គនៃធនាគារនេះផងដែរ។
គួររម្លឹកផងដែរ ធនាគារវិនិយោគហេដ្ឋារចនាសម្ពន្ធ័អាស៊ី(AIIB) ជាស្ថាប័នហិរញ្ញមួយ ដែលត្រូវបានផ្តួចផ្តើមឡើងដោយរដ្ឋាភិបាលទីក្រុងប៉េកាំង និង ផ្តើមដំណើរការតាំងពីឆ្នាំ ២០១៤ មក។ ធនាគារនេះដែរ បង្កើតក្នុងគោលបំណង ដើម្បីបង្កើនការវិនិយោគនៅក្នុងតំបន់អាស៊ីប៉ាស៊ីហ្វិក ផ្តោតលើលើវិស័យមួយចំនួនដូចជា ការដឹកជញ្ជូន ថាមពល ទូរគមនាគមន៍ និងហេដ្ឋារចនាសម្ព័ន្ធផ្សេងទៀត៕
© រក្សាសិទ្ធិដោយ thmeythmey.com