អន្តរជាតិ
នយោបាយអន្តរជាតិ
×![]()
រដ្ឋាភិបាលអ៊ីស្រាអែល បានតិះតៀនកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ និងមហាអំណាច ៦ ដោយហៅកិច្ចព្រមព្រៀងនេះថាកំហុសប្រវត្តិសាស្ត្រមួយ។ អ៊ីស្រាអែលបានបញ្ជាក់ថាកិច្ចព្រមព្រៀងលោកខាងលិចនិងអ៊ីរ៉ង់ជាគ្រោះថ្នាក់ចំពោះរដ្ឋអ៊ីស្រាអែលបច្ចុប្បន្ន។ ការលើកឡើងនេះកើតឡើងក្រោយមហាអំណាចទាំង៦និងអ៊ីរ៉ង់ឯកភាពគ្នាលើកិច្ចព្រមព្រៀងគោល ដោយបើកផ្លូវអោយភាគីពាក់ព័ន្ធអាចបន្តចរចាគ្នាទៅថ្ងៃមុខទៀត។
ក្រោយបណ្តាភាគីមហាអំណាច ៦ និងអ៊ីរ៉ង់បានសម្រេចឯកភាពគ្នាលើកិច្ចព្រមព្រៀងគោលមួយស្តពីកម្មវិធីនុយក្លេអ៊ែរ៉ង់។ កិច្ចព្រមព្រៀងគោលមានចែងពីចំណុចសំខាន់ៗដែលនឹងជួយអោយភាគីទាំងអស់បន្តចរចានិងពិភាក្សាគ្នាទៅមុខទៀតដើម្បីសម្រេចបាននូវកិច្ចព្រមព្រៀងគ្រប់ជ្រុងជ្រោយមួយផងដែរ។ រដ្ឋមន្ត្រីការបរទេសអឺរ៉ុបលោកស្រី Federica Mogherini បានថ្លែងសាទរពីការសម្រេចបានលទ្ធផលផ្លែផ្កាក្រោយចរចាគ្នារហូតដល់៨ថ្ងៃកន្លងមកយ៉ាងតឹងតែង ហើយកិច្ចព្រមព្រៀងនេះនឹងជួយអោយមហាអំណាច ទាំង ៦អាចជជែកបន្តជាមួយអ៊ីរ៉ង់ដើម្បីបង្កើតកិច្ចព្រមព្រៀងមុនថ្ងៃ ៣០មិថុនា។ លោកស្រីប្រមុខការទូតអឺរ៉ុបខាងលើក៏បានបញ្ជាក់ផងដែរថា អាមេរិក និងអឺរ៉ុបនឹងដកទណ្ឌកម្មនិងការហ៊ុំព័ទ្ធសេដ្ឋកិច្ចអ៊ីរ៉ង់ក្រោយភាគីចុះហត្ថលេខាលើកិច្ចព្រមព្រៀងថ្ងៃ ៣០មិថុនា និងក្រោយពេលមានការត្រួតពិនិត្យនិងតាមដានពីសកម្មភាពនិងការប្រឹងប្រែងរបស់អ៊ីរ៉ង់ក្នុងការអនុវត្តន៍កិច្ចព្រមព្រៀងដោយស្ថាប័នថាមពលបរមាណូអន្តរជាតិថែមទៀត។
ផ្ទុយពីមហាអំណាចទាំង ៦ ដែលថ្លែងសាទរការសម្រេចកិច្ចព្រមព្រៀង អ៊ីស្រាអែល បានចេញមុខតិះតៀនកិច្ចព្រមព្រៀងគោលស្តីពីកម្មវិធីនុយក្លេអ៊ែរអ៊ីរ៉ង់ ដោយហៅកិច្ចខិតខំប្រឹងប្រែងរបស់មហាអំណាចទាំង ៦និងអ៊ីរ៉ង់ថាជាកំហុសប្រវត្តិសាស្ត្រមួយរបស់ពិភពលោក។ យ៉ាងណាក៏ដោយរដ្ឋាភិបាលអ៊ីស្រាអែលរបស់លោក បេនចាមិន ណេតាន់យ៉ាហ៊ូ បានព្រមានថា កិច្ចព្រមព្រៀងនុយក្លេអ៊ែរអ៊ីស្រាអែលផ្តល់សិទ្ធិស្របច្បាប់អោយអ៊ីរ៉ង់ផលិតអាវុធនុយក្លេអ៊ែរ ហើយទង្វើនេះពិតជាគំរាមកំហែងដល់សុវត្ថិភាពនិងអាយុជីវិតរបស់រដ្ឋអ៊ីស្រាអែលផង។
ប៉ុន្តែជានិច្ចជាកាលរដ្ឋាភិបាលអ៊ីស្រាអែល និងលោកខាងលិចចោទប្រកាន់ថា ក្រុងតេអ៊ីរ៉ង់កំពុងសម្ងំផលិតអាវុធនុយក្លេអ៊ែរ ប៉ុន្តែអ៊ីរ៉ង់ទាត់ចោលការចោទប្រកាន់នេះដោយអះអាងថាខ្លួនប្រើប្រាស់កម្មវិធីនុយក្លេអ៊ែរក្នុងគោលដៅស៊ីវិលប៉ុណ្ណោះ ។ ក្រោយមានកិច្ចព្រមព្រៀងនេះហើយ រដ្ឋាភិបាលក្រុងវ៉ាស៊ីនតោន បានបញ្ជាក់ថា ខ្លួននឹងជជែកជាមួយនាយករដ្ឋមន្ត្រីអ៊ីស្រាអែលពីបញ្ហានេះដើម្បីបញ្ជាក់ថា អាមេរិកនៅជួយគាំទ្រនិងការពារសន្តិសុខអ៊ីស្រាអែល៕
© រក្សាសិទ្ធិដោយ thmeythmey.com
