ជាតិ
ពីខែមេសា ដល់ដើមខែមិថុនា រន្ទះ និងខ្យល់កន្ទ្រាក់នឹងកើតមានច្រើននៅពេលភ្លៀង
× បាតុភូតរន្ទះ និងខ្យល់កន្ទ្រាក់ នៅពេលមានភ្លៀងធ្លាក់ នឹងកើតមានច្រើន នៅក្នុងខែមេសា ឧសភា និងដើមខែមិថុនា ឆ្នាំ២០១៥ ជាពិសេសនៅតំបន់ទំនាបកណ្តាល។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម។
បើតាមសេចក្តីជូនដំណឹង បាតុភូតនេះ គឺកើតឡើងដោយសារ បច្ចុប្បន្នឥទ្ធិពលមូសុងឦសាន បានថយចុះជាបន្តបន្ទាប់ ទន្ទឹមនឹងនេះកម្រិតសម្ពាធទាបបាន និងកំពុងគ្របដណ្តប់លើប្រទេសកម្ពុជាទាំងមូល។ ទិដ្ឋភាពទាំង២ខាងលើនេះ នឹងជំរុញឲ្យសីតុណ្ហភាពកើនឡើង។
សេចក្តីជូនដំណឹងដដែល បានបន្តថា សីតុណ្ហភាពកើនឡើងនេះ បានបង្កឲ្យមានគំនួចខ្យល់ទាំងនៅលើផ្ទៃដី និងក្នុងបរិយាកាស(Convect) ហើយគំនួចខ្យល់បានប្រមូលផ្តុំសំណើមទៅក្នុងបរិយាកាស បង្កើតជាពពកដែលមានផ្ទុកចរន្តអគ្គិសនី ដែលនឹងបង្កឲ្យមានរន្ទះ និងខ្យល់កន្ទ្រាក់នៅពេលមានភ្លៀងធ្លាក់ នៅក្នុងខែមេសា ឧសភា និងដើមខែមិថុនា ឆ្នាំ២០១៥ ជាពិសេសនៅតំបន់ទំនាបកណ្តាល។
តាមរយៈសេចក្តី ជូនដំណឹងនេះ ក្រសួងធនធានទឹក និងឧតុនិយម សំណូមពរទៅសាធារណជន ឲ្យបង្កើនការយកចិត្តទុកដាក់ និងប្រុងប្រយ័ត្នខ្ពស់ ចៀសវាងគ្រោះថ្នាក់ផ្សេងៗដែលអាចកើតមានជាយថាហេតុ៕
© រក្សាសិទ្ធិដោយ thmeythmey.com