ជាតិ
សង្គមជាតិ
លោក ជា ចន្ទបរិបូរណ៍ និងលោក ពុយ គា គាំទ្រគំនិតលុបបំបាត់វប្បធម៌លួចចម្លងព័ត៌មាន លោក ជា ចន្ទបរិបូរណ៍ រដ្ឋលេខាធិការក្រសួងព័ត៌មាន (ឆ្វេង) និងលោក ពុយ គា ប្រធានការិយាល័យទីភ្នាក់ងារព័ត៌មាន Kyodo ប្រចាំនៅកម្ពុជា។ រូបថត Cam Photo Agency
× ភ្នំពេញ៖ កម្រិតវិជ្ជាជីវៈអ្នកសារព័ត៌មានខ្មែរមានការអភិវឌ្ឍន៍ទៅមុខប្រកបដោយមោទនភាពក្នុងរយៈពេលប៉ុន្មានឆ្នាំចុងក្រោយនេះ។ ប៉ុន្តែ ទង្វើលួចចម្លងព័ត៌មានពីសំណាក់ស្ថាប័នព័ត៌មាន ឬអ្នកសារព័ត៌មានមួយចំនួននៅតែជាក្តីកង្វល់របស់ក្រុមអ្នកសារព័ត៌មានអាជីព និងក្រសួងព័ត៌មាន។
លោក ជា ចន្ទបរិបូរណ៍ រដ្ឋលេខាធិការក្រសួងព័ត៌មានបានអត្ថាធិប្បាយថា ការលួចចម្លងស្នាដៃនិពន្ធព័ត៌មាន គឺជាការលួចទ្រព្យសម្បត្តិ ពីព្រោះ មុននឹងអាចផលិតដំណឹងបានមួយ សា្ថប័នកាសែតត្រូវចំណាយថវិកាយ៉ាងច្រើន។
ការអត្ថាធិប្បាយរបស់លោករដ្ឋលេខាធិកាក្រសួងព័ត៌មានបានធ្វើឡើងស្របពេលដែលស្ថាប័នសារព័ត៌មានអាជីពជាច្រើនចាប់ផ្តើមធ្វើយុទ្ធនាការប្រឆាំងនឹងការលួចចម្លងពីសំណាក់អ្នក កាសែត និងស្ថាប័នកាសែតមិនអាជីពមួយចំនួន។ មជ្ឈមណ្ឌលដើមអំពិល, សារព័ត៌មានអេឡិចត្រូវនិកថ្មីៗ, គេហទំព័រព័ត៌មាន CEN, កាសែតភ្នំពេញប៉ុស្តិ៍, គេហទំព័រ Fresh news, កាសែតកោះសន្តិភាព, កាសែតកម្ពុជាថ្មី។ល។ គ្រោងនឹងដាក់ពាក្យបណ្តឹងប្តឹងប្រឆាំងនឹងការលួចចម្លងខុសច្បាប់។
លោក ជា ចន្ទបរិបូរណ៍ អត្ថាធិប្បាយបន្តទៀតថា ការលួចចម្លងពីសំណាក់អ្នកសារព័ត៌មានគ្នាឯងនឹងធ្វើអោយប៉ះពាល់ដល់កិត្តិយសវិស័យសារព័ត៌មានទាំងមូល។ លោកថា៖«អ្នកសារព័ត៌មាន មានតួនាទីរិះគន់ស្ថាបនាស្ថាប័នផ្សេងទៀតដើម្បីអោយពួកគេដើរទៅរកផ្លូវល្អ។ ចុះបើអ្នកកាសែតខ្លួនឯងមួយចំនួនលួចចម្លងព័ត៌មានពីគេ ខុសក្រមសីលធម៌ខ្លួនឯងទៅហើយនោះ តើពួកគេទៅរិះគន់អ្នកដទៃយ៉ាងដូចម្តេចទៅ?»។
លោក ពុយ គា ប្រធានការិយាល័យទីភ្នាក់ងារព័ត៌មាន Kyodo ប្រចាំនៅកម្ពុជា និងជាសមាជិកគណៈកម្មាធិកានាយកនៃក្លិបអ្នកកាសែតកម្ពុជាគាំទ្រពេញទំហឹងចំពោះការប្រឆាំងនឹងការលួចចម្លងស្នាដៃព័ត៌មាន។ លោក គា បញ្ជាក់ថា៖«ខ្ញុំគាំទ្រគំនិតប្រឆាំងនឹងការលួចចម្លង។ នេះគឺជាគំនិតជួយលើកកម្ពស់វិជ្ជាជីវៈសារព័ត៌មាននៅក្នុងប្រទេសកម្ពុជា»។
ដើម្បីអភិវឌ្ឍវិស័យសារព័ត៌មានខ្មែរអោយមានការរីកចម្រើនបន្ថែមទៀតនោះ លោក ជា ចន្ទបរិបូរណ៍ រដ្ឋលេខាធិការក្រសួងព័ត៌មាន សំណូមពរអោយអ្នកសារព័ត៌មានមួយចំនួនដែលធ្លាប់លួចចម្លងពីគេ ត្រូវបញ្ឈប់សកម្មភាពរបស់ខ្លួន។ បន្ទាប់មក ស្ថាប័នសារព័ត៌មានទាំងអស់ត្រូវតែបណ្តុះបណ្តាលចំណេះដឹងជំនាញបន្ថែមទៀតជូនដល់បុគ្គលិករបស់ខ្លួន និងទី៣ លោក ជា ចន្ទបរិបូរណ៍ រដ្ឋលេខាធិការក្រសួងព័ត៌មាន ស្នើរដល់អ្នកសារព័ត៌មានទាំងឡាយកុំសរសេរព័ត៌មានទៅតាមអារម្មណ៍បេះដូងរបស់ខ្លួននីមួយៗ៕
© រក្សាសិទ្ធិដោយ thmeythmey.com