ជាតិ
សង្គមជាតិ
ក្រសួងរ៉ែផ្ទេរសិទ្ធិឲ្យមន្ទីរចេញអាជ្ញាបណ្ណសប្បិកម្មធនធានរ៉ែ
×
ភ្នំពេញ៖ ក្រសួងរ៉ែបានសម្រេចប្រគល់សិទ្ធិដល់មន្ទីររ៉ែ និងថាមពលទូទាំងប្រទេសក្នុងការ ពិនិត្យសម្រេចផ្តល់អាជ្ញាបណ្ណសិប្បកម្មធនធានរ៉ែដល់ប្រជាជនដែលមានបំណងធ្វើអាជីវកម្មធនធានរ៉ែលក្ខណៈជាសិប្បកម្ម មិនលើសពីទំហំផ្ទៃដីមួយហិចតា។ ការសម្រេចត្រូវបានចាប់អនុវត្ត ពីខែមេសា ឆ្នាំ២០១៥ នេះតទៅ។
លោក ឌិត ទីណា រដ្ឋលេខាធិការ និងជាអ្នកនាំពាក្យក្រសួងរ៉ែ បានថ្លែងនៅក្នុងកិច្ចប្រជុំស្តីពី វិធានការពង្រឹងការអនុវត្តច្បាប់ស្តីពីការធ្វើអាជីវកម្មធនធានរ៉ែ ថា មន្ទីររ៉ែ និងថាមពលរាជធានី ខេត្ត ត្រូវចុះបញ្ជីទទួលពាក្យស្នើសុំអាជ្ញាបណ្ណសិប្បកម្មធនធានរ៉ែ នៅពេលពិនិត្យឃើញថា លិខិតស្នើសុំនោះត្រឹមត្រូវតាមនីតិវិធី។
កិច្ចប្រជុំក្រសួងរ៉ែបានប្រព្រឹត្តទៅក្នុងសណ្ឋាគារភ្នំពេញ នៅថ្ងៃទី៧ ខែមេសានេះ ក្រោមវត្ត មានមន្ត្រីក្រសួងរ៉ែ គណៈអភិបាលរាជធានី ខេត្ត ព្រមទាំងមន្ត្រីតាមមន្ទីរជាង ២០០រយនាក់។
រដ្ឋលេខាធិការក្រសួងរ៉ែបានបន្ថែមថា ការផ្ទេរសិទ្ធិនេះ មានគោលបំណងជំរុញការទប់ស្កាត់ ការធ្វើអាជីវកម្មរ៉ែខុសច្បាប់គ្រប់ប្រភេទនៅថ្នាក់មូលដ្ឋាន ពិសេសគឺដើម្បីបញ្ចៀសការរិះគន់ ពីសាធារណៈជន បន្ទាប់ពីមន្ត្រីក្រសួងរ៉ែបានចុះធ្វើអធិការកិច្ចនាពេលកន្លងមក។
លោកថា៖«យើងពិនិត្យឃើញថា មានបញ្ហាមួយចំនួនទាក់ទងការធ្វើសិប្បកម្មខ្នាតតូច ដូច្នេះ យើងបានចេញវិធានថ្មី ដើម្បីចែករំលែកការទទួលខុសត្រូវទៅថ្នាក់ខេត្តចេញអាជ្ញាបណ្ណ ត្រឹមត្រូវតាមបច្ចេកទេសកាន់តែល្អប្រសើរ កុំឲ្យមានការរិៈគន់ និងការវាយប្រហារផ្សេង»។
បើតាមលោក ឌិត ទីណា មន្ទីររ៉ែ និងថាមពលរាជធានី ខេត្ត ត្រូវធ្វើរបាយការណ៍ប្រចាំខែជូន ក្រសួងរ៉ែស្តីពីការផ្តល់អាជ្ញាបណ្ណសិប្បកម្ម ហើយរាល់ការបំពេញនីតិវិធីស្នើសុំត្រូវកំណត់ ដោយក្រសួងរ៉ែ។ ជាងនេះ ក្នុងករណីទីតាំងស្នើសុំធ្វើអាជីវកម្មធនធានរ៉ែមានលក្ខណៈជាសិប្ប កម្មត្រូវមានការបញ្ជាក់ឯកភាពពីអាជ្ញាធរស្រុក ឬខណ្ឌតាមដែនដី។
យោងតាមសេចក្ដីប្រកាសរបស់ក្រសួងរ៉ែ ស្ដីពីនីតិវិធី បែបបទ និងលក្ខខណ្ឌនៃការផ្ដល់អាជ្ញាបណ្ណសិប្បកម្មធនធានរ៉ែ និងអាជ្ញាបណ្ណអណ្តូងរ៉ែបើក និងការដ្ឋានវាយថ្ម សម្រាប់គោលបំណងអាជីវកម្មក្រួស ខ្សាច់ ដីឥដ្ឋ និងដីល្បប់ សិប្បកម្មរ៉ែខ្នាតតូចសំដៅលើអាជីវកម្មធនធានរ៉ែដែលធ្វើដោយពលរដ្ឋខ្មែររស់នៅក្នុងមូលដ្ឋានលើផ្ទៃដីមិនលើសពី១ហិកតា ជម្រៅដីមិនលើស៥ម៉ែត្រ។ ដោយឡែក ប្រភេទអណ្ដូងរ៉ែបើកវិញ គឺមានជម្រៅមិនលើសពី២០ម៉ែត្រទៅក្រោមដី។ អាជីវកម្មនេះ ប្រើប្រាស់កម្លាំងពលកម្មមិនលើសពី ៧នាក់ និងប្រើប្រាស់ឧបករណ៍សម្ភារៈសាមញ្ញដែលមាននៅក្នុងមូលដ្ឋាន៕
© រក្សាសិទ្ធិដោយ thmeythmey.com