ជាតិ
សង្គមជាតិ
×![]()
ដោយ: ធឿន បញ្ញាឬទិ្ធ
អ្នកនាំពាក្យព្រឹត្តិការណ៍អង្គរសង្ក្រាន្ត លោក សោម រតនា បានបញ្ជាក់ថា នៅពេលនេះខាងសហភាពសហព័ន្ធយុវជន កំពុងរៀបចំកែលំអរចនាប័ទ្មខ្លោងទ្វាអង្គរសង្ក្រានថ្មីឡើងវិញ។ លោកបន្ដថារចនាប័ទ្មថ្មីគឺនឹងមានលក្ខណៈបែបខ្មែរបន្ថែមទៀត ដើម្បីឲ្យប្រជាពលរដ្ឋបានច្បាស់ជាងមុនក្រោយពីមានភាពចម្រូងចម្រាសក្នុងរយៈពេលប៉ុន្មានថ្ងៃចុងក្រោយនេះ។
ថ្លែងប្រាប់សារព័ត៌មានថ្មីៗ លោក សោម រតនា បានបន្ថែមថា ការកែលំអនេះគឺដើម្បីឲ្យប្រជាពលរដ្ឋមានការសប្បាយចិត្ត និងពេញចិត្តគ្រប់គ្នាចំពោះរចនាបទរបស់ខ្មែរ ។ «យើងកែប្រែឲ្យមានលក្ខណៈខ្មែរជាងមុន នូវទីតាំងទាំងពីរកន្លែងដើម្បីឲ្យប្រជាពលរដ្ឋសប្បាយចិត្តដើរកម្សាន្ដក្នុងពិធីបុណ្យចូលឆ្នាំខ្មែរនេះ។ យើងទទួលយកការរិះគន់ដើម្បីស្ថាបនារបស់ពួកគាត់ ប៉ុន្ដែរចនាប័ទ្មមុនក៍ជារចនាប័ទ្មខ្មែរដែរ តែបើពួកគាត់មិនពេញចិត្ត យើងនឹងធ្វើការកែលំអឲ្យមានលក្ខណៈខ្មែរច្បាស់ជាងមុន ដើម្បីសប្បាយចិត្តទាំងអស់គ្នា»។ នេះជាការបញ្ជាក់របស់លោក សោម រតនា។
អ្នកនាំពាក្យព្រឹត្តិការណ៍អង្គរសង្ក្រានរូបនេះ បន្ថែមថា ការកែលំអឡើងវិញនេះ គឺនឹងអាចរៀបចំបានទាន់ពេលវេលា មុនពិធីបុណ្យចូលឆ្នាំ ដោយមិនឲ្យមានការប៉ះពាល់ដល់ភ្ញៀវមកកម្សាន្ដទេ។
ខ្លោងទ្វារអង្គរសង្ក្រាន្តមួយដែលមានទីតាំងនៅភូមិត្រពាំងសេះ សង្កាត់គោកចក ក្រុងសៀមរាប ត្រូវបានដុតបំផ្លាញកាលពីយប់អាធ្រាត្រថ្ងៃអង្គារ ទី០៧ខែមេសាបន្ទាប់ពីមានភាពចម្រូងចម្រាសក្នុងរយៈពេលប៉ុន្មានថ្ងៃចុងក្រោយនេះ ក្រោមមតិរិះគន់ថាខ្លោងទ្វារអង្គរសង្ក្រាន្តនេះជារចនាប័ទ្មបែបវៀតណាម និងចិន៕
© រក្សាសិទ្ធិដោយ thmeythmey.com
