ជាតិ
សង្គមជាតិ
បាត់ដំបង៖ សិស្សខ្លះលែងហ៊ានជូនកាដូគ្រូបង្រៀន ព្រោះខ្លាចពាក់ព័ន្ធទង្វើពុករលួយ
× រដូវកាលចូលឆ្នាំប្រពៃណីបានចូលមកដល់។ សិស្ស និស្សិតមួយចំនួនមានទម្លាប់ជូនសគុណ ឬជំនូនជូនលោកគ្រូអ្នកគ្រូរបស់ពួកគេ។ ក្នុងពេលកន្លងមក ទង្វើនេះគឺជាទិដ្ឋភាពធម្មតា។ ប៉ុន្តែបច្ចុប្បន្ននេះ ទង្វើនេះបានក្លាយជាប្រធានបទនៃការពិចារណាទៅលើសកម្មភាពពុករលួយ។
ឧត្តម ជាគរុសិស្សនៅសាលាគរុកោសល្យភូមិភាគខេត្តបាត់ដំបង បានសារភាពថា លោកធ្លាប់ជូនជំនូនញឹកញាប់ទៅឲ្យគ្រូបង្រៀននាពេលរដូវបុណ្យទានម្តង។ ប៉ុន្តែប៉ុន្មានឆ្នាំចុងក្រោយនេះ លោកបានផ្លាស់ប្តូរទម្លាប់នេះហើយ។ អនាគតគ្រូបង្រៀនរូបនេះបានផ្លាស់ប្តូរទម្លាប់អាក្រក់ ដោយសារតែរូបគេយល់ឃើញថា គេមិនចង់ឲ្យអ្នកដទៃគិតអាក្រក់មកលើរូបគេ។ «ប្រសិនបើអ្នកដទៃឃើញខ្ញុំជូនជំនូនឲ្យលោកគ្រូអ្នកគ្រូ គេអាចគិតថាខ្ញុំចង់បានពិន្ទុល្អ ឬចង់ឲ្យគ្រូជួយខ្ញុំពេលខ្ញុំប្រឡងជាដើម»។ នេះជាការបញ្ជាក់របស់ឧត្តម។
ពិសី ដែលជាសិស្សរៀននៅវិទ្យាល័យព្រះមុនីវង្សនិយាយថា នាងមិនដែលចូលចិត្តទង្វើជូនជំនូនទៅគ្រូបង្រៀនឡើយ។ សម្រាប់ពិសី ការទិញអំណោយជូនគ្រូបង្រៀន វានឹងធ្វើឲ្យមានការជំពាក់ចិត្តទៅវិញទៅមក ដែលអាចនាំដល់មានអំពើពុករលួយ។ ពិសី ពន្យល់យ៉ាងដូច្នេះថា៖«អ្នកខ្លះនិយាយថា ការជូនជំនូនលោកគ្រូអ្នកគ្រូ វាគឺជាផ្តល់សគុណ ឬការដឹងគុណដល់ពួកគាត់។ តែសម្រាប់ខ្ញុំ គ្រាន់តែយើងខិតខំរៀន ខំស្ដាប់ យកចិត្តទុកដាក់ពេលគ្រូពន្យល់ និងប្រឡងជាប់ឲ្យជាប់ទៅ វាគឺជាការដឹងគុណគ្រូហើយ»។
ជាការពិត សិស្សានុសិស្សខ្លះបានជូនជំនូនគ្រូបង្រៀនដោយភ្ជាប់នឹងគោលបំណងចង់បានពិន្ទុល្អមែន នេះបើតាមការអះអាងរបស់លោក គិត ប៊ុនថន ដែលជាគ្រូបង្រៀននៅវិទ្យាល័យថ្មគោល។ លោកគ្រូ ប៊ុនថង ក៏មិនបានរារែកក្នុងការវាយតម្លៃថា ការជូនកាដូបែបនេះពីសំណាក់សិស្ស វាគឺជាការប្រព្រឹត្តិអំពើពុករលួយ។ លោកគ្រូបញ្ជាក់អំពីគំនិតរបស់លោកគ្រូផ្ទាល់យា់ងដូច្នេះថា៖«សម្រាប់ខ្ញុំ សិស្សណាដែលយកជំនូនរបៀបសំណូកបែបនេះមកឲ្យខ្ញុំ គឺខ្ញុំមិនទទួលទេ។ ខ្ញុំមិនចង់អោយមានគុណស្រ័យជាមួយសិស្សបែបនេះ។ អ្នកដែលជូនជំនូនបែបនេះ តែងតែសង្ឃឹមថា ខ្ញុំនឹងសម្រួលដល់ពួកគេ ពេលប្រឡង។ ខ្ញុំស្រលាញ់កិត្តិយសខ្ញុំ ខ្ញុំមិនដែលគិតថាត្រូវយកជំនូនអ្វីពិសិស្សឡើយ»៕
© រក្សាសិទ្ធិដោយ thmeythmey.com