ជាតិ
សង្គមជាតិ
លោក ថោង ខុន ថាមានបន្ទប់គេងគ្រប់គ្រាន់នៅថ្ងៃអង្គរសង្ក្រាន្ត
× សៀមរាប៖ អ្នករៀបចំព្រឹត្តិការណ៍អង្គរសង្ក្រាន្តនៅឆ្នាំនេះរំពឹងថា មានភ្ញៀវទេសចរជាតិ និងអន្តរជាតិប្រមាណកន្លះលាននាក់ ដែលនឹងមកចូលរួមថ្ងៃអង្គរសង្ក្រាន្ត ដែលនឹងចាប់ផ្តើមនៅសប្តាហ៍ក្រោយ។ ចំនួននេះបើធៀបនឹងចំនួនសណ្ឋាគារ និងផ្ទះសំណាក់ ដែលមានចំនួនតិចជាងនោះ ពិតណាស់ថាវាមិនសមមូលគ្នាទេ។ នៅសៀមរាបទាំងសណ្ឋាគារ និងផ្ទះសំណាក់បូកបញ្ចូលគ្នា មានប្រមាណ ១៦០០០បន្ទប់តែប៉ុណ្ណោះ។ ប៉ុន្តែរដ្ឋមន្ត្រីក្រសួងទេសចរណ៍អះអាងថា បញ្ហានេះមិនចោទឡើយ។
លោក ថោង ខុន មានប្រសាសន៍ថា លោកមិនបារម្ភចំពោះការគ្មានកន្លែងស្នាក់របស់អ្នកទេសចរ ដែលមកចូលរួមក្នុងពិធីអង្គរសង្ក្រាន្តទាំង៣ថ្ងៃនោះទេ។ លោករដ្ឋមន្ត្រីក្រសួងទេសចរណ៍បញ្ជាក់ថា ចំនួនកន្លះលាននាក់ ដែលរំពឹងថាមកចូលរួមថ្ងៃអង្គរសង្ក្រាន្ត គឺបូកសរុបទាំង៣ថ្ងៃតែប៉ុណ្ណោះ តែក្នុងមួយថ្ងៃ បើតាមការបញ្ជាក់របស់លោក អាចមានអ្នកទេសចរចន្លោះពី៨ ទៅ១០ម៉ឺននាក់ សរុបទាំងជាតិ និងអន្តរជាតិ។
លោក ថោង ខុន ថ្លែងប្រាប់សារព័ត៌មានថ្មីៗបន្ថែមថា៖« សៀមរាបមិនដែលមានបញ្ហារឿងខ្វះបន្ទប់សម្រាប់អ្នកទេសចរទេ។ អ្នកមកអង្គរសង្ក្រាន្ត ខ្លះស្នាក់នៅផ្ទះបងប្អូន ហើយខ្លះទៀតនៅស្រុក និងខេត្តជិតៗពួកគាត់អាចត្រឡប់ទៅផ្ទះវិញបាន ដូចជាអ្នកបន្ទាយមានជ័យជាដើម។ ដូច្នេះ សូមកុំបារម្ភរឿងបន្ទប់គេង វាមានការឡើងថ្លៃបន្តិចបន្តួចទេ»។ អ្វីដែលលោក ថោង ខុន បារម្ភនោះ គឺបញ្ហាចរាចរណ៍ ដែលលោកថា អាចមានបញ្ហាខ្លះ។
កាលពីសប្តាហ៍មុន បើតាមការសាកសួរ ផ្ទះសំណាក់មួយចំនួនធំ ត្រូវគេកក់ពេញៗទៅហើយ។ ក្នុងនោះ តម្លៃក៏ត្រូវបានដំឡើងរួចរាល់ហើយដែរ គឺខ្លះឡើងដល់ពាក់កណ្តាល។ ដោយឡែកសណ្ឋាគារវិញ មានការបញ្ជាកក់ជាច្រើន អាចនិយាយបានថា រហូតដល់ថ្ងៃសង្ក្រាន្ត ពុំមានបន្ទប់សេសសល់នោះទេ។
យោងតាមរបាយការណ៍របស់មន្ទីរទេសចរណ៍ខេត្តសៀមរាបកាលពីចុងឆ្នាំ២០១៤ ខេត្តនេះ មានសណ្ឋាគារសរុប ១៧០កន្លែង ដែលមានបន្ទប់សរុប ១១៥២៧បន្ទប់ អាប់ផាតមេន ៩កន្លែង មាន២៣៣ យូនីត (Unit) ផ្ទះសំណាក់មាន ២៥០ មានបន្ទប់ ៣៨៥១បន្ទប់ ដោយឡែកភោជនីយដ្ឋានមាន ១៨៥កន្លែង៕
© រក្សាសិទ្ធិដោយ thmeythmey.com