ជាតិ
បទយកការណ៍ / បទសម្ភាសន៍
សង្គមជាតិ
យុវជនមួយចំនួនដេករាប់ថ្ងៃថយក្រោយ ព្រោះអន្ទះសារចង់ទៅស្រុក
× ភ្នំពេញ៖ ខណៈពេលដែលពិធីបុណ្យចូលឆ្នាំប្រពៃណីខ្មែរកាន់តែខិតជិតចូលមកដល់ យុវជនជាច្រើនដែលមកស្នាក់នៅរាជធានីភ្នំពេញដើម្បីបន្តការសិក្សា និងធ្វើការ បានសម្តែងក្តីអន្ទះសារខ្លាំងចង់ទៅលេងស្រុកកំណើត។ អ្នកមួយចំនួន សម្តែងក្តីនឹករឮកតាមទូរសព្ទជាមួយឪពុកម្តាយ បងប្អូន រៀងរាល់យប់។ អ្នកខ្លះទន្ទឹងរាប់ថ្ងៃថយក្រោយ ឲ្យឆាប់ដល់ថ្ងៃឈប់សម្រាកពីកិច្ចការងាររបស់ខ្លួន។ ដោយឡែកអ្នកខ្លះទៀត បានរៀបចំសម្លៀកបំពាក់ និងសម្ភារៈប្រើប្រាស់របស់ខ្លួនមួយចំនួន ត្រៀមទុករួចជាស្រេច ដើម្បីទៅលេងស្រុក នៅថ្ងៃចូលឆ្នាំ។
«ខ្ញុំនឹកស្រុកមែនទែន... នៅពេលថ្ងៃចូលឆ្នាំកាន់តែខិតជិតចូលមកដល់យ៉ាងដូច្នេះ។ ខ្ញុំនឹកពុក នឹកម៉ែ ជាពិសេសនឹកប្អូនៗ ។ ខ្ញុំបន់ឲ្យតែដល់ថ្ងៃសាលាឲ្យឈប់ទេនឹងឆាប់បានទៅជួបជុំពួកគាត់»។ នេះជាការសម្តែងក្តីអន្ទះសាររបស់លោ វិបុត្រ។ យុវជន វិបុត្រ ដែលទើបតែមកបន្តការសិក្សាថ្នាក់សាកលវិទ្យាល័យនៅរាជធានីភ្នំពេញបានជិតមួយឆ្នាំ តែងជជែកជាមួយម្តាយរបស់លោកនៅឯខេត្តតាកែវតាមរយៈទូសព្ទរៀងរាល់ល្ងាចក្រោយពីសម្រាកពីការសិក្សា។
លោក វិបុត្រ បានឲ្យដឹងទៀតថា នៅអំឡុងពេលពិធីបុណ្យចូលឆ្នាំថ្មីកាន់តែខិតជិតចូលមកដល់ មានថ្ងៃខ្លះលោក ហៅទូរសព្ទទៅកាន់ម្តាយរបស់លោក ពី២ទៅ៣ដង ក្នុងមួយថ្ងៃក៏មាន។ ខណៈពេលកំពុងអង្គុយរំឮកមេរៀននៅមុខបន្ទប់ជួលជាន់ទី២ ក្នុងសង្កាត់បឹងកេងកងបី យុវជនសក់រួញអង្គាដី សម្បុរស្រអែមរូបនេះ ឆ្លៀតរំឮកប្រាប់អ្នកកាសែត ថ្មីៗ ទៀតថា៖«រដូវចូលឆ្នាំ កាន់តែធ្វើឲ្យខ្ញុំស្រណោះទិដ្ឋភាពនៅជុំវិញផ្ទះរបស់ខ្ញុំណាស់។ ស្រណោះកាលគ្រាបង្ហោះខ្លែង គ្រាដើរចាប់ក្តាម បាចត្រី ជីកខ្យងនៅតាមវាលស្រែ និងស្រណោះដល់ក្លិនអាចម៍គោនៅក្បែរផ្ទះផងដែរ»។
ជាអ្នកស្នាក់នៅបន្ទប់ជួលក្បែរគ្នាជាមួយយុវជន វិបុត្រ ដែរ យុវជន សម្បត្តិ និងមិត្តភក្តិរបស់គេពីរនាក់ផ្សេងទៀត បានចាប់ផ្តើមរៀបចំសម្លៀកបំពាក់ និងសម្ភារៈប្រើប្រាស់មួយចំនួនដាក់ចូលក្នុងវាលីរបស់ពួកគេត្រៀមទុកបណ្តើរៗ ដើម្បីទៅលេងស្រុកកំណើតនៅក្នុងឱកាសបុណ្យចូលឆ្នាំថ្មី។ ក្នុងវ័យប្រមាណជាជិត ៣០ឆ្នាំ យុវជនដែលជាបុគ្គលិកធនាគាររូបនេះបានឲ្យដឹងថា៖«ប៉ុន្មានថ្ងៃនេះ ខ្ញុំសម្រុកធ្វើការងារច្រើន ព្រមទាំងសម្រួល និងដោះស្រាយកិច្ចការមួយចំនួនឲ្យហើយផងដែរ ដើម្បីបានធូរ និងសប្បាយចិត្តនៅថ្ងៃចូលឆ្នាំ»។
លោក សម្បត្តិ បន្តថា បើទោះបីជាស្រុកកំណើតរបស់លោកនៅឯខេត្តកំពង់ធំ ឆ្ងាយជាងស្រុកកំណើតរបស់មិត្តលោកពីរនាក់ផ្សេងទៀតដែលស្ថិតនៅក្បែរៗរាជធានីភ្នំពេញក៏ដោយ តែលោកនឹងធ្វើដំណើរដោយម៉ូតូផ្ទាល់ខ្លួនទៅស្រុកកំណើតនៅយប់ថ្ងៃធ្វើការចុងក្រោយតែម្តង។ លោក បញ្ជាក់ថា ការធ្វើដំណើរដោយម៉ូតូផ្ទាល់ខ្លួនទៅយ៉ាងដូចច្នេះ គឺមានភាពងាងស្រួល និងចំណេញច្រើន ព្រោះថារាល់ពេលពិធីបុណ្យចូលឆ្នាំចូលមកដល់ម្តងៗ តម្លៃសេវាកម្មធ្វើដំណើរតាមរថយន្តតាក់ស៊ីនឹងឡើងថ្លៃខ្ពស់ ហើយក៏មានបញ្ហាស្ទះចរាចរច្រើនផងដែរ។
ងាកមកស្តាប់លោក ចន្ថា ដែលស្នាក់នៅបន្ទប់ជាន់ក្រោម លោក សម្បត្តិវិញ។ លោកបានលើកឡើងថា ក្រៅពីនឹកឪពុកម្តាយបងប្អូន នៅស្រុកកំណើតឯខេត្តកំពង់ចាម លោកក៏នឹកដល់កម្មវិធីរាំវង់កម្សាន្តនៅថ្ងៃចូលឆ្នាំនៅក្នុងភូមិរបស់លោកផងដែរ។ លោក ចន្ថា ដែលជាអ្នកចូលចិត្តការកម្សាន្តបែបប្រពៃណី មានក្តីរពឹងថា នៅឆ្នាំនេះនៅក្នុងភូមិរបស់លោកនឹងមានការរៀបចំកម្មវិធីកម្សាន្តបែបប្រពៃណី ច្រើនជាងការជួបជុំនាំគ្នាទទួលទានគ្រឿងស្រវឹងដូចរាល់ឆ្នាំ៕
© រក្សាសិទ្ធិដោយ thmeythmey.com