ជាតិ
សង្គមជាតិ
ទិដ្ឋភាពក្នុងរាជធានីភ្នំពេញ នាចូលឆ្នាំមកដល់
× ប្រជាពលរដ្ឋនៅក្នុងរាជធានីភ្នំពេញ បានធ្វើដំណើរទៅកាន់ស្រុកកំណើតតាមបណ្ដាខេត្តដែលពួកគេរស់នៅបណ្ដើរៗហើយ ចាប់តាំងពីថ្ងៃទី១១ មេសាម្សិលមិញមកដើម្បីជុំជួបជាមួយគ្រួសាររបស់ពួកគេ ក្នុងការអប់អរពិធីបុណ្យចូលឆ្នាំខ្មែរ។
ក្រោយពីបានឈប់សម្រាប់ពីការងារ តាមគោលការណ៍កំណត់របស់ក្រុមហ៊ុនពួកគេរៀងៗខ្លួន គេសង្កេតឃើញថា នៅតាមដងផ្លូវនៃរាជធានីភ្នំពេញមួយចំនួន មានការកកស្ទះចរាចរណ៍ដោយសារប្រជាពលរដ្ឋ សម្រុកធ្វើដំណើរទៅកាន់ស្រុកកំណើតរបស់ខ្លួន។ចំណែកនៅកន្លែងរថយន្ដដឹកអ្នកដំណើរ មិនថារថយន្ដឈ្នួល តូច ធំទាំងអស់នោះទេ ក៏សុទ្ធតែមានការមមាញឹកក្នុងការផ្ដល់សេវាដឹកអ្នកដំណើររបស់ពួកគេផងដែរ។
ដោយឡែកនៅតាមបណ្ដាផ្សារទាំងអស់ នៅក្នុងរាជធានីភ្នំពេញវិញ ក៏មានការកកស្ទះដែរ ដោយសារតែមានប្រជាពលរដ្ឋជាច្រើន នាំគ្នាសម្រុកទៅផ្សារដើម្បីទិញទំនិញផ្លែឈើ សម្ភារៈ រណ្ដាប់សែនទទួលទេវតាឆ្នាំថ្មី និងសម្រាប់រៀបចំចង្ហាន់ទៅវត្តនាពីធីចូលឆ្នាំខ្មែរនេះ។ហើយនៅតាមផ្ទះមួយចំនួនក៏បានរៀបចំបោសសំអាត រៀបចំផ្លាស់ប្ដូរសម្ភារៈចាស់ និងរៀបចំថ្មីឡើងវិញជាបណ្ដើរៗហើយដែរ។ រីឯនៅតាមទីវត្តអារ៉ាមនានាក៏បានរៀបចំតុបតែងយ៉ាងស្រស់ស្អាត ដើម្បីទទួលប្រជាពលរដ្ឋក្នុងការធ្វើបុណ្យដាក់ទាន តាមទំនៀមទំលាប់ប្រពៃណីចូលឆ្នាំនេះ។
ចូលឆ្នាំខ្មែរប្រពៃណីឆ្នាំមានរយៈពេល៣ថ្ងៃ គឺចន្លោះចាប់ពី១៣ដល់១៥មេសា ឬពីថ្ងៃទី១៤ដល់១៦មេសាជារៀងរាល់ឆ្នាំ ពោលគឺបានន័យថា ការវិលទៅនៃផែនដីចំនួន ៣៦៥ថ្ងៃ ៦ម៉ោង ១២នាទី និងជាង ២៩វិនាទី បានវិលជុំវិញព្រះអាទិត្យ ម្តង គេហៅថា ១ឆ្នាំ។ ថ្ងៃទី១ នៃថ្ងៃចូលឆ្នាំថ្មី ហៅថា ថ្ងៃសង្ក្រាន្ត គេនាំគ្នាទៅវត្តរបាប់បាត្រ បង្សុកូល ពូនភ្នំខ្សាច់ ស្តាប់ធម៌ទេសនា...។ថ្ងៃទី២ ថ្ងៃកណ្តាល ហៅថា ថ្ងៃវារវ័នប័ត គេជូនទេយ្យវត្ថុលោកអ្នកមានគុណ ចែកទានដល់អ្នកទ័លក្រ និងនាំគ្នាទៅវត្តដូចថ្ងៃមុននិងថ្ងៃទី៣ ថ្ងៃឆ្លងបុណ្យ ហៅថ្ងៃឡើងសក្តិ គេនាំគ្នាទៅឆ្លងបុណ្យ នៅវត្តរាប់បាត្រ បង្សុកូល ពូនភ្នំខ្សាច់ ស្តាប់ធម៌ទេសនា ស្រង់ព្រះ ស្រង់ភិក្ខុសង្ឃ...៕
© រក្សាសិទ្ធិដោយ thmeythmey.com