ជាតិ
×![]()
ដោយ: ថ្មីៗ
គ្រួសារយោធាចំនួន៤៨គ្រួសារនៅភូមិដីថ្មី សង្កាត់ភ្នំពេញថ្មី ខណ្ឌសែនសុខ ជាយរាជធានីភ្នំពេញ បាននាំគ្នាសុំអន្តារគមន៍ពីសំណាក់លោក ហេង សំរិន ប្រធានរដ្ឋសភាដើម្បីដោះស្រាយបញ្ហាទំនាស់ដីធ្លីរបស់ពួកគេជាមួយក្រុមហ៊ុន ម៉ោនបេស្ស អ៊ិនហ្វ្រេ ស្ត្រាក់ឈ័រ។ អ្នកទាំងនោះ បានលើកគ្នាទៅតវ៉ានៅរដ្ឋសភា នាព្រឹកថ្ងៃទី២៣ ខែមេសា ឆ្នាំ២០១៥ ។
យោងតាមលិខិតផ្ញើជូន លោក ហេង សំរិន តំណាងអ្នកតវ៉ា បានរៀបរាប់ថា ពួកគេត្រូវរងនូវការបណ្តេញចេញដោយបង្ខំ និងគ្មានដំណោះស្រាយដែលអាចទទួលយកបាន។ ប្រជាពលរដ្ឋទាំងនោះ រួមមានគ្រួសារយោធា យោធាពិការ គ្រួសារយោធាពលី-មរណៈ និងគ្រួសារយោធាចូលនិវត្តន៍។
តំណាងអ្នកតវ៉ាបីរូបដែលមានឈ្មោះ ញឹក ហ៊ុម, ស៊ឹម ឈាន និងតែម សារឿន បានរៀបរាប់ថា គ្រួសារមួយចំនួនបានរស់ និងបម្រើការនៅលើទីតាំងដែលមានទំនាស់ចាប់តាំងពីឆ្នាំ១៩៨៨មកម្ល៉េះ ខណៈមួយចំនួនទៀតផ្លាស់មកពីព្រំដែនថៃនាអំឡុងឆ្នាំ១៩៩៣ ។
ពួកគេអះអាងថា៖ «ក្នុងការរស់នៅទីនោះ ពួកខ្ញុំបានទទួលការអនុញ្ញាតឲ្យចុះបញ្ជីគ្រួសារ និងលិខិតអនុញ្ញាតផ្សេងៗដូចប្រជាពលរដ្ឋទូទៅដែរ។ បរិវេណដែលពួកយើងខ្ញុំរស់នៅមានទំហំប្រហែល៧០ម៉ែត្រ គុណ៨០ម៉ែត្រតែប៉ុណ្ណោះ ហើយពួកយើងខ្ញុំបានស្នាក់នៅជារៀងរហូតមក»។
តំណាងអ្នកតវ៉ាបន្ថែមថា ក្រុមហ៊ុន ម៉ោនបេស្ស អ៊ិនហ្វ្រេ ស្ត្រាក់ឈ័រ បានដាក់សំណើរទៅក្រសួងការពារជាតិសុំប្តូរទីតាំងឃ្លាំង K8 ដែលពលរដ្ឋរស់នៅទៅកាន់កន្លែងផ្សេង ប៉ុន្តែមិនបានលើកពីដំណោះស្រាយឡើយ។ ពួកគេបានអះអាងថា បាតុភាពវាតយកដីធ្លីរបស់អង្គភាព K8 មានជាយូរយាមកហើយ។
កន្លងមក ក្នុងការដោះស្រាយជាក់ស្តែង ចំពោះនាយទាហានដែលមានផ្ទះក្នុងអង្គភាពទទួលបានផ្ទះល្វែង៤ម៉ែត្រគុណ៦ម៉ែត្រ និងថវិកា២០០០ដុល្លារ ខណៈអតីតយោធា យោធាពិការ គ្រួសារយោធាពលី និងគ្រួសារយោធាចូលនិវត្តន៍ ត្រូវដោះស្រាយជាប្រាក់៥០០០ដុល្លារអាមេរិកតែប៉ុណ្ណោះ។
ចំពោះតម្លៃនៃការដោះស្រាយ ក្រុមអ្នកតវ៉ាបានលើកឡើងថា ពួកគេមិនអាចយកទៅធ្វើអ្វីបាននោះឡើយ ដូច្នេះពួកគេសុំការអាណិតអាសូរពីសំណាក់ប្រធានរដ្ឋសភាដើម្បីជួយអន្តរាគមន៍ឲ្យពួកគេអាចស្នាក់នៅបន្ត ឬទទួលបាននូវការឧបត្ថម្ភណាមួយដែលអាចទទួលយកបាន៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
6 ម៉ោង
