ជាតិ
បទយកការណ៍ / បទសម្ភាសន៍
នយោបាយជាតិ
×![]()
គិតត្រឹមឆ្នាំ ២០១៥ នេះ អ្នកស្រី មូ សុខហួរ អ្នកនយោបាយចាស់វស្សារបស់កម្ពុជា មានអាយុ ៦១ ឆ្នាំគត់។ អ្នកស្រី បានផ្តើមជីវិតនយោបាយដំបូងបំផុត ជាមួយគណបក្ស ហ្វ៊ុនស៊ិនប៉ិច នៅឆ្នាំ ១៩៩៨ ដែលពេលនោះគណបក្សនេះដឹកនាំដោយព្រះអង្គម្ចាស់ នរោត្តម រណឬទ្ធិ។ ក្នុងអាជីពជាអ្នកនយោបាយច្រើនឆ្នាំមកនេះ អ្នកស្រី មូ សុខហួរ បានជួបប្រទះនូវបញ្ហានានា ដូចជា ការប្រឈមមុខនឹងការប្តឹងផ្តល់ជាមួយលោក ហ៊ុន សែន និងធ្លាប់ជាប់ពន្ធនាគារផងដែរ។ តាមពិតទៅ ជីវិតជាអ្នកនយោបាយ គឺជាអាជីព ដែលឪពុកអ្នកស្រី មូ សុខហួរ ដើមកំណើតខ្មែរក្រោម ស្អប់បំផុត និងហាមមិនឲ្យកូនស្រីរបស់ខ្លួន ធ្វើជាដាច់ខាត។ តែដើម្បីជាតិ មាតុភូមិ អ្នកនយោបាយរូបនេះ បានក្បត់បណ្តាំឪពុករបស់ខ្លួន។
ពេលណា ដែលគេចង់និយាយពីអ្នកតំណាងរាស្ត្រស្ត្រីគណបក្សសង្គ្រោះជាតិ គឺអ្នកស្រី មូ សុខហួរ នោះ គេស្ទើរតែមិនចាំបាច់និយាយឲ្យចំឈ្មោះនោះទេ ដោយគេគ្រាន់តែរម្លឹកដល់រូបភាពស្ត្រីខ្មែរវ័យចំណាស់ម្នាក់ដែលតែងតែតវ៉ានៅទីលានប្រជាធិបតេយ្យ ហើយត្រូវអាជ្ញាធរ ចាប់សែងចេញជាញឹកញាប់ នោះគេអាចដឹងហើយ ថាជាអ្នកណា។ ម្យ៉ាងទៀត គេក៏អាចនឹកឃើញដល់តួអង្គ មូ សុខហួរ ដែរ ពេលគេចាប់ផ្តើមនិយាយពីស្ត្រីខ្មែរតែម្នាក់គត់ ដែលហ៊ានប្តឹងផ្តល់រឿងផ្ទាល់ខ្លួនកាលពីឆ្នាំ ២០០៩ កន្លងទៅ ទល់នឹងលោកនាយករដ្ឋមន្ត្រី ហ៊ុន សែន ដែលគេស្គាល់ថា លោកជាបុរសខ្លាំងនៅកម្ពុជា។ ជីវិតនៅលើវិថីនយោបាយរបស់ស្ត្រី ដែលមានឪពុកដើមកំណើតខ្មែរកម្ពុជាក្រោម និងម្តាយជនជាតិខ្មែររូបនេះ ជួបរឿងសប្បាយផង និងឈឺចាប់ផង។ ការឈានជើងប្រឡូកក្នុងឆាកនយោបាយរបស់អ្នកស្រី មូ សុខហួរ គឺជាទង្វើដែលក្បត់នឹងបណ្តាំឪពុករបស់ខ្លួន។
«ឪពុកខ្ញុំ ហាមដាច់ខាតមិនឲ្យខ្ញុំធ្វើនយោបាយ»
ដោយសារស្ថិតនៅក្នុងត្រកូលអ្នកជំនួញ តាំងពីតូចមក អ្នកស្រី មូ សុខហួរ មិនដែលមានក្តីស្រមៃចង់ក្លាយជាអ្នកនយោបាយសោះឡើយ។ ពីព្រោះថា តាំងពីដឹងក្តី រហូតដល់អាយុជាង ២០ ឆ្នាំ ឪពុករបស់អ្នកស្រី តែងតែទូន្មានជានិច្ច ឲ្យអ្នកស្រីដើរឲ្យឆ្ងាយពីអាជីពជាអ្នកនយោបាយ។ អ្នកនយោបាយដែលកើតក្នុងគ្រួសារមានជីវភាពធូរធារូបនេះបានបញ្ជាក់ដូច្នេះថា៖« ខ្ញុំមិនដែលគិតថា ចូលធ្វើនយោបាយទេ ដោយសារតែឪពុកខ្ញុំ ហាមដាច់ខាតមិនឲ្យធ្វើនយោបាយ ព្រោះគាត់យល់ថា អ្នកនយោបាយសុទ្ធតែជាអ្នកពុករលួយ»។
យ៉ាងណាក៏ដោយ បើទោះបីជាឪពុកហាមឃាត់បែបនេះក្តី ក៏នារីខ្មែរ ដែលមានបរិញ្ញាបត្រផ្នែកចិត្តវិទ្យា និងបរិញ្ញាបត្រជាន់ខ្ពស់ផ្នែកសង្គមកិច្ច នៅសកលវិទ្យាល័យប្រទេសអាមេរិករូបនេះ នៅតែចិញ្ចឹមចិត្តចង់ជួយដោះស្រាយបញ្ហានៅក្នុងប្រទេសកំណើតរបស់ខ្លួនដដែល។ ជាអកុសលក្នុងសម័យខ្មែរក្រហម ឪពុកម្តាយរបស់អ្នកស្រីបានស្លាប់អស់ ខណៈដែលខ្លួន កំពុងសិក្សានៅប្រទេសអាមេរិក។ នៅឆ្នាំ ១៩៩១ ស្របពេលដែលកម្ពុជា កំពុងរង់ចាំទទួលវត្តមានរបស់អាជ្ញាធរបណ្តោះអាសន្ននៃអង្គការសហប្រជាជាតិប្រចាំនៅកម្ពុជា (UNTAC) ដើម្បីរៀបចំការបោះឆ្នោតនោះ អ្នកស្រី មូ សុខហួរ បានត្រឡប់មករស់នៅក្នុងទឹកដីកំណើតរបស់ខ្លួនវិញ។ ក្នុងពេលនោះឯងអ្នកស្រី បានធ្វើសកម្មភាពសង្គមយ៉ាងសកម្ម ជាពិសេសចូលរួមធ្វើធម្មយាត្រា ដើម្បីសន្តិភាពជាមួយសម្តេចសង្ឃ ឃោសនន្ទដា។ ធ្វើការងារសង្គមកាន់តែច្រើន បានធ្វើឲ្យស្ត្រីរូបនេះ កាន់តែយល់ច្បាស់ពីបញ្ហាដែលកើតមាននៅក្នុងសង្គម ដែលត្រូវដោះស្រាយ ហើយក៏យល់ថា មានតែអ្នកនយោបាយទេ ដែលអាចដោះស្រាយបញ្ហានេះ មានប្រសិទ្ធិភាពខ្ពស់នោះ។
ពេលវេលាបានរំកិលមកដល់ នៅឆ្នាំ ១៩៩៨ អ្នកស្រី មូ សុខហួរ បានសម្រេចចិត្តដើរចូលវិថីនយោបាយជាមួយនឹងគណបក្ស ហ្វ៊ុនស៊ិនប៉ិច ដោយពេលនោះ អ្នកស្រីបានជាប់ជាតំណាងរាស្ត្រមណ្ឌលបាត់ដំបង និងក្លាយជារដ្ឋមន្ត្រីក្រសួងកិច្ចការនារី។ ត្រង់ចំណុចនេះ នៅពេលដែលសួរថា អ្នកស្រីដើរចូលវិថីនយោបាយ មានន័យស្មើនឹងក្បត់បណ្តាំឪពុកឬ? អ្នកនយោបាយវ័យ ៦០ ឆ្នាំរូបនេះ ដែលទើបជួបជាមួយក្រុមយុវជននៅផ្ទះរបស់ខ្លួន បានបកស្រាយយ៉ាងនេះថា៖ « រូបខ្ញុំនៅតែមាមានៈ មិនគោរពតាមបណ្តាំគាត់ ព្រោះខ្ញុំចង់ឃើញស្រុកខ្មែរ ដឹកនាំដោយអ្នកនយោបាយស្អាតស្អំ និងចង់ឲ្យមានការផ្លាស់ប្តូរ។ បណ្តាំឪពុកសំខាន់ហើយ តែយើងត្រូវលះបង់ ដើម្បីជាតិ ជាតិសំខាន់ជាង ។ បើយើងខ្លួនឯងមិនចង់ឃើញអ្នកនយោបាយពុករលួយ យើងខ្លួនឯងកុំអង្គុយស្ងៀម កុំចេះតែរអ៊ូ រទាំ ហើយកុំចេះតែរិះគន់ បើយើងជាអ្នកស្អាតស្អំ យើងត្រូវតែចូលនៅក្នុងឆាកនយោបាយ»។
ជីវិតនៅលើវិថីនយោបាយរយៈ ៦ ឆ្នាំជាមួយគណបក្ស ហ្វ៊ុនស៊ិនប៉ិច បានធ្វើឲ្យស្ត្រីរូបនេះ ស្គាល់កាន់តែច្បាស់ពីបរិបទនយោបាយនៅកម្ពុជា និងគោលការណ៍របស់គណបក្សនេះ។ គោលការណ៍គណបក្ស ហ្វ៊ុនស៊ិនប៉ិច ដែលអ្នកស្រីអះអាងថា មានគោលការណ៍ល្អ តែមេដឹកនាំទន់ជ្រាយ មិនអាចអនុវត្តបាន ដែលជំរុញទឹកចិត្តអ្នកនយោបាយរូបនេះនឿយណាយ និងអស់ជំនឿ បែរមកស្រវាចាប់គណបក្ស សម រង្ស៊ី វិញ ។
«ខ្ញុំចេញពី គណបក្ស ហ្វ៊ុនស៊ិនប៉ិច ចូលជាមួយគណបក្ស សម រង្ស៊ី ចំថ្ងៃគេបាញ់សម្លាប់លោក ជា វិជ្ជា»
នៅថ្ងៃទី ២២ មករា ឆ្នាំ ២០០៤ ជាថ្ងៃដែលអ្នកស្រីរដ្ឋមន្ត្រីក្រសួងកិច្ចការនារីរូបនេះ ចុះចេញពីតំណែង និងចេញពីគណបក្ស ហ្វ៊ុនស៊ិនប៉ិច មកសាងទ្រនំថ្មីជាមួយនឹងគណបក្ស សម រង្ស៊ី។ ថ្ងៃប្រវត្តិសាស្ត្រសម្រាប់អ្នកនយោបាយរូបនេះ ក៏ជាថ្ងៃដែលឃាតករមិនស្គាល់មុខ បានបាញ់សម្លាប់មេដឹកនាំសហជីពដ៏ល្បីល្បាញ គឺ លោក ជា វិជ្ជា ផងដែរ។ «ថ្ងៃដែលខ្ញុំចូលជាមួយគណបក្ស សម រង្ស៊ី ជាថ្ងៃដែលគេសម្លាប់លោក ជា វិជ្ជា ខ្ញុំមិនចេះតែចូលគ្មានហេតុផលនោះទេ ព្រោះខ្ញុំឃើញថា ក្នុងនាមខ្ញុំជារដ្ឋមន្ត្រី កូតា ហ្វុនស៊ិនប៉ិច ខំតស៊ូ ជួយពលរដ្ឋយ៉ាងណា តែបក្សនេះ មិនបានធ្វើអ្វីស្របនឹងឧត្តមគតិរបស់ខ្ញុំឡើយ។ ជាងនេះទៅទៀត បក្សនេះមិនបានការពារ ការទាមទារយុត្តិធម៌របស់កម្មករ ហើយជាពិសេសនៅពេលឃាតករសម្លាប់លោក ជា វិជ្ជា បក្សហ្វុនស៊ិនប៉ិច នៅស្ងៀម មិនបានការពារប្រយោជន៍កម្មករ និងជនរងគ្រោះនោះទេ ។ នៅចំពោះមុខរឿងរ៉ាវទាំងនេះ ខ្ញុំសួរខ្លួនឯងថា តើខ្ញុំគួរនៅជាមួយ ហ្វ៊ុនស៊ិនប៉ិចទៀត ឬយ៉ាងណា? ពេលនោះខ្ញុំគ្មានជម្រើសអ្វីក្រៅពីតស៊ូជាមួយគណបក្ស សម រង្ស៊ី នោះទេ ព្រោះគណបក្សនេះ ការពារផលប្រយោជន៍កម្មករ ប្រជាពលរដ្ឋពិតប្រាកដ»។ នេះជាការពន្យល់របស់អ្នកស្រី មូ សុខហួរ ។
បើទោះបីជានិយាយដូច្នេះក្តី ក៏អ្នកនយោបាយរូបនេះ ទទួលស្គាល់ថា នៅពេលនោះ គោលនយោបាយរបស់គណបក្ស ហ្វ៊ុនស៊ិនប៉ិច និងគណបក្សសម រង្ស៊ី មានគោលនយោបាយ ប្រហាក់ប្រហែលគ្នា ។ អ្នកស្រីបញ្ជាក់ថា៖« គណបក្ស សម រង្ស៊ី ចេញពីរាជានិយម និងគោលដៅ ដើម្បីប្រជាធិបតេយ្យដូចគណបក្ស ហ្វ៊ុនស៊ិនប៉ិចដែរ ដែលខុសពីគណបក្សប្រជាជនកម្ពុជា ដែលចេញពីកុម្មុយនីស្ត ។ បក្សហ្វ៊ុនស៊ិនប៉ិច មានគោលនយោបាយល្អដែរ តែមិនអនុវត្ត ទើបធ្វើឲ្យបក្សនេះបរាជ័យ ពីឈ្នះរហូតដល់ចាញ់ និងអស់កៅតែម្តង ។ ខ្ញុំចង់នៅជាមួយជនរងគ្រោះ និងនៅជាមួយបក្សដែលអនុវត្តគោលការណ៍របស់ខ្លួន ខ្ញុំមិនចេះនៅជាមួយមនុស្ស ឬបក្សដែលមិនអនុវត្តចំពោះគោលការណ៍របស់ខ្លួនឡើយ។ ខ្ញុំស្រឡាញ់យុត្តិធម៌ »។ ជាមនុស្សដែលមានគោលការណ៍ច្បាស់លាស់ និងស្រលាញ់ យុត្តិធម៌បែបនេះហើយ បានធ្វើឲ្យស្ត្រីរូបនេះ ហ៊ានតវ៉ាជាមួយអាជ្ញាធរ និងដល់ថ្នាក់ហ៊ានប្រកាសជម្លោះជាមួយលោក ហ៊ុន សែន ទៀតផង។
« ខ្ញុំមិនខ្លាចលោក ហ៊ុន សែន ទេ តែខ្ញុំខ្លាចកម្ពុជា គ្មានយុត្តិធម៌!»
នៅឆ្នាំ ២០០៩ ក្តីក្តាំឡើងដល់តុលាការ រវាងលោក ហ៊ុន សែន និងអ្នកស្រី មូ សុខហួរ បានល្បីខ្ចរខ្ចាយពេញពិភពលោក។ អ្នកស្រី មូ សុខហួរ គឺជាជនជាតិខ្មែរដំបូងបំផុត ដែលហ៊ានតតាំងក្តីផ្ទាល់ខ្លួនជាមួយលោក ហ៊ុន សែន ដែលគេស្គាល់ថា លោក ជាបុរសខ្លាំងនៅកម្ពុជា។ សំណុំរឿងនេះ នៅទីបំផុត តុលាការ បានសម្រេចឲ្យអ្នកស្រី មូ សុខហួរ ចាញ់លោក ហ៊ុន សែន ដោយតុលាការបង្គាប់ឲ្យអ្នកស្រី សងប្រាក់ជំងឺចិត្តដល់លោក ហ៊ុន សែន ចំនួន ១៦ លានរៀល។
តាមពិតទៅអ្នកនយោបាយវ័យ ៦០ ឆ្នាំរូបនេះ បានដឹងច្បាស់ខ្លួនឯងមុនហើយថា រឿងក្តីនេះ រូបអ្នកស្រី ប្រាកដជាមិនអាចឈ្នះលោកនាយករដ្ឋមន្ត្រី ហ៊ុន សែន បានឡើយ។ អ្នកស្រីពន្យល់ថា៖« នរណាក៏គេដឹងដែរថា លោក ហ៊ុន សែន មានអំណាចខ្លាំងណាស់នៅកម្ពុជា ហើយខ្ញុំដឹងថា តុលាការនឹងឲ្យលោក ហ៊ុន សែន ឈ្នះ តែខ្ញុំត្រូវតែប្តឹង។ ខ្ញុំជាមនុស្សដែលមានគោលការណ៍ ចង់ចាប់សម្លាប់ខ្ញុំ ចាប់ចងខ្ញុំ ខ្ញុំមិនខ្លាចទេ ។ ខ្ញុំមិនចង់ឈ្លោះជាមួយលោក ហ៊ុន សែន នោះទេ តែក្នុងនាមជាអ្នកនយោបាយ ហើយជាស្ត្រីទៀត ប្រសិនបើយើងមិនហ៊ានតវ៉ា នៅពេលគេប្រមាថស្ត្រី តើតម្លៃស្ត្រីខ្មែរនៅឯណា? ខ្ញុំជឿថា ថ្វីដ្បិតតុលាការឲ្យលោក ហ៊ុន សែន ឈ្នះ តែប្រជាពលរដ្ឋខ្មែរកាត់សេចក្តីឲ្យខ្ញុំឈ្នះ ហើយខ្ញុំឈ្នះ គឺស្មើនឹងស្ត្រីខ្មែរឈ្នះ » ។
បេះដូងចង់ជួយជាតិ ផ្សំជាមួយទ្រឹស្តីរបស់អ្នកស្រី អង់ សានស៊ូជី បានជំរុញឲ្យអ្នកយោបាយខ្មែររូបនេះ មានភាពក្លាហាន រហូតដល់ហ៊ានឈ្លោះជាមួយលោក ហ៊ុន សែន និងប្រឈមមុខជាមួយអាជ្ញាធរជាញឹកញាប់ ។ ទ្រឹស្តីអ្នកស្រី អង់ សានស៊ូជី ដែលដក់ក្នុងអារម្មណ៍អ្នកស្រី មូ សុខហួរ នោះ គឺ «ប្រសិនបើយើងមានភាពភ័យខ្លាច ភាពភ័យខ្លាចនឹងតាមបន្លាចយើងជានិច្ច ហើយយើងមិនអាចទៅដល់គោលដៅបានទេ»។ ប្រកាន់ភ្ជាប់ទ្រឹស្តីរបស់អ្នកស្រី អ៊ុង សានស៊ូជី និងសកម្មភាពតស៊ូ ស្រដៀងគ្នាទៀតនោះ មតិមួយចំនួន បានលើកឡើងថា អ្នកស្រី មូ សុខហួរ ចង់ធ្វើខ្លួនដូចជាអ្នកនយោបាយដ៏ល្បីរបស់ភូមាគឺ អ្នកស្រី អ៊ុង សានស៊ូជី ។
«ខ្ញុំមិនមែន អ៊ុង សានស៊ូជី នៅស្រុកខ្មែរទេ តែខ្ញុំ គឺជា មូ សុខហួរ!»
នៅពេលគេប្រៀបធៀបខ្លួនជាមួយ អ្នកស្រី អ៊ុង សានស៊ូជី អ្នកនយោបាយខ្មែររូបនេះ មិនសប្បាយចិត្តនោះឡើយ។ ស្ត្រីរូបនេះ បានអះអាងថា ខ្លួនមិនដែលមានគំនិតចង់ក្លាយជា អ៊ុង សានស៊ូជី នៅស្រុកខ្មែរឡើយ។ « ខ្ញុំតែងតែពន្យល់ប្រាប់គេ នៅពេលដែលគេយកខ្លួនខ្ញុំមកប្រៀបជាមួយអ្នកស្រី អ៊ុង សានស៊ូជី ថា រូបខ្ញុំមិនមែន អ៊ុង សានស៊ូជី នៅខ្មែរទេ។ សូមកុំយកខ្ញុំទៅប្រៀបជាមួយមេបក្សប្រឆាំងភូមា។ ប្រសិនបើពេញចិត្តសកម្មភាពខ្ញុំ ឲ្យតម្លៃខ្ញុំ សូមហៅខ្ញុំថា មូ សុខហួរ ជាស្ត្រីខ្មែរមួយរូប ទៅបានហើយ » ។ នេះជាការបញ្ជាក់របស់ស្ត្រី ដែលមានឪពុកជាខ្មែរក្រោម។
ទន្ទឹមនឹងការបដិសេធនេះ អ្នកស្រី មូ សុខហួរ ក៏ខំព្យាយាមធ្វើចិត្ត ដើម្បីជម្នះនឹងមតិរិះគន់មកលើរូបអ្នកស្រី កន្លងមកផងដែរ។ កន្លងមក មតិមួយចំនួនបានរិះគន់ថា អ្នកស្រី ធ្វើជ្រុលពេក ជុំវិញការព្យាមយាមចូលទៅទីលានប្រជាធិបតេយ្យ បើទោះបីជាអាជ្ញាធរហាមឃាត់ និងត្រូវពួកគេសែងចេញញឹកញាប់យ៉ាងណាក៏ដោយ។ និយាយដល់ត្រង់ចំណុចនេះ អ្នកនយោបាយដែលធ្លាប់តែក្លាហាន និងហ៊ានប្រឈមមុខជាមួយលោក ហ៊ុន សែន រូបនេះ បានរៀបរាប់ទាំងអួលដើមកដូច្នេះថា៖« សួរថា តើខ្ញុំជាស្ត្រីចង់ឲ្យគេប៉ះពាល់ឬ? ហើយខ្ញុំជាម្តាយ នៅពេលដែលកូនឃើញគេចាប់សែងខ្ញុំចេញពីទីលានប្រជាធិបតេយ្យ តើទឹកភ្នែកខ្ញុំស្រក់ប៉ុន្មានដង? គ្មាននរណាចង់ជាប់គុក បាក់បែកពីគ្រួសារទេ តែសំណួរសំខាន់ តើយើងសុខចិត្តឲ្យគេគាបសង្កត់ឬយ៉ាងណា? បើវិនិច្ឆ័យថា ខ្ញុំធ្វើនេះហួសហេតុ ពេកជាសេរីភាពរបស់ពួកគាត់ទេ។ តែយ៉ាងណាលទ្ធផលចុងក្រោយ ទីលានប្រជាធិបតេយ្យ បានបើកឲ្យដំណើរការធម្មតាវិញ »។
ថ្វីដ្បិត ខ្សែជីវិតឈរលើវិថីនយោបាយប្រឈមនឹងបញ្ហាច្រើនយ៉ាងណាក៏ដោយ ក៏ស្ត្រីដែលមានកូនស្រី ៣ នាក់រូបនេះ តែងតែទទួលការលើកទឹកចិត្តពីសំណាក់ក្រុមគ្រួសារ គឺ ស្វាមី ជនជាតិអាមេរិក ដែលបានរៀបការនៅឆ្នាំ ១៩៨៦ និងកូនស្រីទាំង ៣ នាក់របស់ខ្លួន ។ បច្ចុប្បន្នអ្នកស្រី រស់នៅជុំគ្នាជាមួយប្តី និងកូនស្រីទី ២ នៅភ្នំពេញ ខណៈដែលកូនស្រី ២ រូបទៀត រស់នៅអាមេរិក និងកូរ៉េខាងត្បូង ។ រាល់សកម្មភាពរបស់អ្នកស្រី ដែលបង្ហោះនៅលើទំព័រហ្វេសប៊ុករបស់ខ្លួន គឺជាស្នាដៃ និងរៀបចំឡើងដោយកូនស្រីរបស់អ្នកស្រី។ ដំណាលដល់រឿងកូនស្រីទាំង ៣ នាក់របស់ខ្លួន អ្នកនយោបាយចាស់វស្សារបស់កម្ពុជារូបនេះ ក៏បើកសិទ្ធិដល់កូនៗរបស់ខ្លួនឲ្យធ្វើនយោបាយផងដែរ។ « ខ្ញុំគោរពតាមការសម្រេចចិត្តរបស់កូន ខ្ញុំទុកឲ្យពួកគេសម្រេចចិត្តដោយខ្លួនឯង ប្រសិនបើគេចង់ធ្វើនយោបាយខ្ញុំក៏មិនអាចរាំងរាបានដែរ។ ប្រសិនបើកាលៈទេសៈផ្តល់ឲ្យ ពួកគេនឹងឈរឈ្មោះបោះឆ្នោតក្នុងវិស័យនយោបាយ ហើយពួកគាត់ទៅក្នុងនាមជាបុគ្គល មិនមែនក្នុងនាមកូន មូ សុខហួរ ទេ»។
និយាយពី កាលៈទេសៈ ផ្តល់ឲ្យកូនស្រីបែបនេះ អ្នកស្រី មូ សុខហួរ ក៏ហាក់មានមហិច្ឆតា ចង់ក្លាយជានាយករដ្ឋមន្ត្រីនាថ្ងៃអនាគតផងដែរ ប្រសិនបើកាលៈទេសៈផ្តល់ឲ្យខ្លួន។ ស្ត្រីរូបនេះ បញ្ជាក់យ៉ាងនេះថា៖« បើកាលៈទេសៈផ្តល់ឲ្យ ខ្ញុំនឹងគិតពិចារណា ខ្ញុំមិនអាចនិយាយថា ខ្ញុំមិនចង់ក្លាយជានាយករដ្ឋមន្ត្រី បានទេ ។ គណបក្សសង្គ្រោះជាតិ អាចនឹងបញ្ចូលបេក្ខភាពនាយករដ្ឋមន្ត្រីជាស្ត្រី នៅក្នុងអាណត្តិក្រោយៗ ។ ហើយមិនមែនតែខ្ញុំទេ លោកអនុប្រធាន កឹម សុខា លោក យឹម សុវណ្ណ ក៏អាចឈ្មោះឈ្មោះនាយករដ្ឋមន្ត្រីសម្រាប់គណបក្សសង្គ្រោះជាតិ នៅពេលក្រោយផងដែរ។ ប៉ុន្តែនៅពេលនេះ រហូតដល់ពេលខាងមុខ គឺប្រជាពលរដ្ឋគាំទ្រលោកប្រធាន សម រង្ស៊ី។ ខ្ញុំគិតថា មនុស្សយើង បើកាលៈទេសៈតម្រូវហើយ ពិបាកនឹងប្រកែកណាស់ »។ ជាការពិតហើយ អ្នកស្រីនិយាយដូច្នេះ ត្រូវនឹងរឿងរ៉ាវរបស់ខ្លួន ពីព្រោះថា ដំបូងឡើយ អ្នកនយោបាយរូបនេះ មិនដែលស្រមៃចង់ធ្វើនយោបាយទេ ដោយសារគោរពតាមពាក្យឪពុក។ ប៉ុន្តែ ព្រោះតែកាលៈទេសៈតម្រូវ ទើបអ្នកស្រី ទុកបណ្តាំឪពុកមួយអន្លើ ហើយឈានជើងចូលឆាកនយោបាយរហូតដល់សព្វថ្ងៃនេះ។ ហើយប្រសិនជា កាលៈទេសៈតម្រូវទៀត អ្នកស្រីមួ សុខហួរ នឹងក្លាយជាបេក្ខជននាយករដ្ឋមន្ត្រីរបស់កម្ពុជាទៀត៕
ពេលណា ដែលគេចង់និយាយពីអ្នកតំណាងរាស្ត្រស្ត្រីគណបក្សសង្គ្រោះជាតិ គឺអ្នកស្រី មូ សុខហួរ នោះ គេស្ទើរតែមិនចាំបាច់និយាយឲ្យចំឈ្មោះនោះទេ ដោយគេគ្រាន់តែរម្លឹកដល់រូបភាពស្ត្រីខ្មែរវ័យចំណាស់ម្នាក់ដែលតែងតែតវ៉ានៅទីលានប្រជាធិបតេយ្យ ហើយត្រូវអាជ្ញាធរ ចាប់សែងចេញជាញឹកញាប់ នោះគេអាចដឹងហើយ ថាជាអ្នកណា។ ម្យ៉ាងទៀត គេក៏អាចនឹកឃើញដល់តួអង្គ មូ សុខហួរ ដែរ ពេលគេចាប់ផ្តើមនិយាយពីស្ត្រីខ្មែរតែម្នាក់គត់ ដែលហ៊ានប្តឹងផ្តល់រឿងផ្ទាល់ខ្លួនកាលពីឆ្នាំ ២០០៩ កន្លងទៅ ទល់នឹងលោកនាយករដ្ឋមន្ត្រី ហ៊ុន សែន ដែលគេស្គាល់ថា លោកជាបុរសខ្លាំងនៅកម្ពុជា។ ជីវិតនៅលើវិថីនយោបាយរបស់ស្ត្រី ដែលមានឪពុកដើមកំណើតខ្មែរកម្ពុជាក្រោម និងម្តាយជនជាតិខ្មែររូបនេះ ជួបរឿងសប្បាយផង និងឈឺចាប់ផង។ ការឈានជើងប្រឡូកក្នុងឆាកនយោបាយរបស់អ្នកស្រី មូ សុខហួរ គឺជាទង្វើដែលក្បត់នឹងបណ្តាំឪពុករបស់ខ្លួន។
«ឪពុកខ្ញុំ ហាមដាច់ខាតមិនឲ្យខ្ញុំធ្វើនយោបាយ»
ដោយសារស្ថិតនៅក្នុងត្រកូលអ្នកជំនួញ តាំងពីតូចមក អ្នកស្រី មូ សុខហួរ មិនដែលមានក្តីស្រមៃចង់ក្លាយជាអ្នកនយោបាយសោះឡើយ។ ពីព្រោះថា តាំងពីដឹងក្តី រហូតដល់អាយុជាង ២០ ឆ្នាំ ឪពុករបស់អ្នកស្រី តែងតែទូន្មានជានិច្ច ឲ្យអ្នកស្រីដើរឲ្យឆ្ងាយពីអាជីពជាអ្នកនយោបាយ។ អ្នកនយោបាយដែលកើតក្នុងគ្រួសារមានជីវភាពធូរធារូបនេះបានបញ្ជាក់ដូច្នេះថា៖« ខ្ញុំមិនដែលគិតថា ចូលធ្វើនយោបាយទេ ដោយសារតែឪពុកខ្ញុំ ហាមដាច់ខាតមិនឲ្យធ្វើនយោបាយ ព្រោះគាត់យល់ថា អ្នកនយោបាយសុទ្ធតែជាអ្នកពុករលួយ»។
យ៉ាងណាក៏ដោយ បើទោះបីជាឪពុកហាមឃាត់បែបនេះក្តី ក៏នារីខ្មែរ ដែលមានបរិញ្ញាបត្រផ្នែកចិត្តវិទ្យា និងបរិញ្ញាបត្រជាន់ខ្ពស់ផ្នែកសង្គមកិច្ច នៅសកលវិទ្យាល័យប្រទេសអាមេរិករូបនេះ នៅតែចិញ្ចឹមចិត្តចង់ជួយដោះស្រាយបញ្ហានៅក្នុងប្រទេសកំណើតរបស់ខ្លួនដដែល។ ជាអកុសលក្នុងសម័យខ្មែរក្រហម ឪពុកម្តាយរបស់អ្នកស្រីបានស្លាប់អស់ ខណៈដែលខ្លួន កំពុងសិក្សានៅប្រទេសអាមេរិក។ នៅឆ្នាំ ១៩៩១ ស្របពេលដែលកម្ពុជា កំពុងរង់ចាំទទួលវត្តមានរបស់អាជ្ញាធរបណ្តោះអាសន្ននៃអង្គការសហប្រជាជាតិប្រចាំនៅកម្ពុជា (UNTAC) ដើម្បីរៀបចំការបោះឆ្នោតនោះ អ្នកស្រី មូ សុខហួរ បានត្រឡប់មករស់នៅក្នុងទឹកដីកំណើតរបស់ខ្លួនវិញ។ ក្នុងពេលនោះឯងអ្នកស្រី បានធ្វើសកម្មភាពសង្គមយ៉ាងសកម្ម ជាពិសេសចូលរួមធ្វើធម្មយាត្រា ដើម្បីសន្តិភាពជាមួយសម្តេចសង្ឃ ឃោសនន្ទដា។ ធ្វើការងារសង្គមកាន់តែច្រើន បានធ្វើឲ្យស្ត្រីរូបនេះ កាន់តែយល់ច្បាស់ពីបញ្ហាដែលកើតមាននៅក្នុងសង្គម ដែលត្រូវដោះស្រាយ ហើយក៏យល់ថា មានតែអ្នកនយោបាយទេ ដែលអាចដោះស្រាយបញ្ហានេះ មានប្រសិទ្ធិភាពខ្ពស់នោះ។
ពេលវេលាបានរំកិលមកដល់ នៅឆ្នាំ ១៩៩៨ អ្នកស្រី មូ សុខហួរ បានសម្រេចចិត្តដើរចូលវិថីនយោបាយជាមួយនឹងគណបក្ស ហ្វ៊ុនស៊ិនប៉ិច ដោយពេលនោះ អ្នកស្រីបានជាប់ជាតំណាងរាស្ត្រមណ្ឌលបាត់ដំបង និងក្លាយជារដ្ឋមន្ត្រីក្រសួងកិច្ចការនារី។ ត្រង់ចំណុចនេះ នៅពេលដែលសួរថា អ្នកស្រីដើរចូលវិថីនយោបាយ មានន័យស្មើនឹងក្បត់បណ្តាំឪពុកឬ? អ្នកនយោបាយវ័យ ៦០ ឆ្នាំរូបនេះ ដែលទើបជួបជាមួយក្រុមយុវជននៅផ្ទះរបស់ខ្លួន បានបកស្រាយយ៉ាងនេះថា៖ « រូបខ្ញុំនៅតែមាមានៈ មិនគោរពតាមបណ្តាំគាត់ ព្រោះខ្ញុំចង់ឃើញស្រុកខ្មែរ ដឹកនាំដោយអ្នកនយោបាយស្អាតស្អំ និងចង់ឲ្យមានការផ្លាស់ប្តូរ។ បណ្តាំឪពុកសំខាន់ហើយ តែយើងត្រូវលះបង់ ដើម្បីជាតិ ជាតិសំខាន់ជាង ។ បើយើងខ្លួនឯងមិនចង់ឃើញអ្នកនយោបាយពុករលួយ យើងខ្លួនឯងកុំអង្គុយស្ងៀម កុំចេះតែរអ៊ូ រទាំ ហើយកុំចេះតែរិះគន់ បើយើងជាអ្នកស្អាតស្អំ យើងត្រូវតែចូលនៅក្នុងឆាកនយោបាយ»។
ជីវិតនៅលើវិថីនយោបាយរយៈ ៦ ឆ្នាំជាមួយគណបក្ស ហ្វ៊ុនស៊ិនប៉ិច បានធ្វើឲ្យស្ត្រីរូបនេះ ស្គាល់កាន់តែច្បាស់ពីបរិបទនយោបាយនៅកម្ពុជា និងគោលការណ៍របស់គណបក្សនេះ។ គោលការណ៍គណបក្ស ហ្វ៊ុនស៊ិនប៉ិច ដែលអ្នកស្រីអះអាងថា មានគោលការណ៍ល្អ តែមេដឹកនាំទន់ជ្រាយ មិនអាចអនុវត្តបាន ដែលជំរុញទឹកចិត្តអ្នកនយោបាយរូបនេះនឿយណាយ និងអស់ជំនឿ បែរមកស្រវាចាប់គណបក្ស សម រង្ស៊ី វិញ ។
«ខ្ញុំចេញពី គណបក្ស ហ្វ៊ុនស៊ិនប៉ិច ចូលជាមួយគណបក្ស សម រង្ស៊ី ចំថ្ងៃគេបាញ់សម្លាប់លោក ជា វិជ្ជា»
នៅថ្ងៃទី ២២ មករា ឆ្នាំ ២០០៤ ជាថ្ងៃដែលអ្នកស្រីរដ្ឋមន្ត្រីក្រសួងកិច្ចការនារីរូបនេះ ចុះចេញពីតំណែង និងចេញពីគណបក្ស ហ្វ៊ុនស៊ិនប៉ិច មកសាងទ្រនំថ្មីជាមួយនឹងគណបក្ស សម រង្ស៊ី។ ថ្ងៃប្រវត្តិសាស្ត្រសម្រាប់អ្នកនយោបាយរូបនេះ ក៏ជាថ្ងៃដែលឃាតករមិនស្គាល់មុខ បានបាញ់សម្លាប់មេដឹកនាំសហជីពដ៏ល្បីល្បាញ គឺ លោក ជា វិជ្ជា ផងដែរ។ «ថ្ងៃដែលខ្ញុំចូលជាមួយគណបក្ស សម រង្ស៊ី ជាថ្ងៃដែលគេសម្លាប់លោក ជា វិជ្ជា ខ្ញុំមិនចេះតែចូលគ្មានហេតុផលនោះទេ ព្រោះខ្ញុំឃើញថា ក្នុងនាមខ្ញុំជារដ្ឋមន្ត្រី កូតា ហ្វុនស៊ិនប៉ិច ខំតស៊ូ ជួយពលរដ្ឋយ៉ាងណា តែបក្សនេះ មិនបានធ្វើអ្វីស្របនឹងឧត្តមគតិរបស់ខ្ញុំឡើយ។ ជាងនេះទៅទៀត បក្សនេះមិនបានការពារ ការទាមទារយុត្តិធម៌របស់កម្មករ ហើយជាពិសេសនៅពេលឃាតករសម្លាប់លោក ជា វិជ្ជា បក្សហ្វុនស៊ិនប៉ិច នៅស្ងៀម មិនបានការពារប្រយោជន៍កម្មករ និងជនរងគ្រោះនោះទេ ។ នៅចំពោះមុខរឿងរ៉ាវទាំងនេះ ខ្ញុំសួរខ្លួនឯងថា តើខ្ញុំគួរនៅជាមួយ ហ្វ៊ុនស៊ិនប៉ិចទៀត ឬយ៉ាងណា? ពេលនោះខ្ញុំគ្មានជម្រើសអ្វីក្រៅពីតស៊ូជាមួយគណបក្ស សម រង្ស៊ី នោះទេ ព្រោះគណបក្សនេះ ការពារផលប្រយោជន៍កម្មករ ប្រជាពលរដ្ឋពិតប្រាកដ»។ នេះជាការពន្យល់របស់អ្នកស្រី មូ សុខហួរ ។
បើទោះបីជានិយាយដូច្នេះក្តី ក៏អ្នកនយោបាយរូបនេះ ទទួលស្គាល់ថា នៅពេលនោះ គោលនយោបាយរបស់គណបក្ស ហ្វ៊ុនស៊ិនប៉ិច និងគណបក្សសម រង្ស៊ី មានគោលនយោបាយ ប្រហាក់ប្រហែលគ្នា ។ អ្នកស្រីបញ្ជាក់ថា៖« គណបក្ស សម រង្ស៊ី ចេញពីរាជានិយម និងគោលដៅ ដើម្បីប្រជាធិបតេយ្យដូចគណបក្ស ហ្វ៊ុនស៊ិនប៉ិចដែរ ដែលខុសពីគណបក្សប្រជាជនកម្ពុជា ដែលចេញពីកុម្មុយនីស្ត ។ បក្សហ្វ៊ុនស៊ិនប៉ិច មានគោលនយោបាយល្អដែរ តែមិនអនុវត្ត ទើបធ្វើឲ្យបក្សនេះបរាជ័យ ពីឈ្នះរហូតដល់ចាញ់ និងអស់កៅតែម្តង ។ ខ្ញុំចង់នៅជាមួយជនរងគ្រោះ និងនៅជាមួយបក្សដែលអនុវត្តគោលការណ៍របស់ខ្លួន ខ្ញុំមិនចេះនៅជាមួយមនុស្ស ឬបក្សដែលមិនអនុវត្តចំពោះគោលការណ៍របស់ខ្លួនឡើយ។ ខ្ញុំស្រឡាញ់យុត្តិធម៌ »។ ជាមនុស្សដែលមានគោលការណ៍ច្បាស់លាស់ និងស្រលាញ់ យុត្តិធម៌បែបនេះហើយ បានធ្វើឲ្យស្ត្រីរូបនេះ ហ៊ានតវ៉ាជាមួយអាជ្ញាធរ និងដល់ថ្នាក់ហ៊ានប្រកាសជម្លោះជាមួយលោក ហ៊ុន សែន ទៀតផង។
« ខ្ញុំមិនខ្លាចលោក ហ៊ុន សែន ទេ តែខ្ញុំខ្លាចកម្ពុជា គ្មានយុត្តិធម៌!»
នៅឆ្នាំ ២០០៩ ក្តីក្តាំឡើងដល់តុលាការ រវាងលោក ហ៊ុន សែន និងអ្នកស្រី មូ សុខហួរ បានល្បីខ្ចរខ្ចាយពេញពិភពលោក។ អ្នកស្រី មូ សុខហួរ គឺជាជនជាតិខ្មែរដំបូងបំផុត ដែលហ៊ានតតាំងក្តីផ្ទាល់ខ្លួនជាមួយលោក ហ៊ុន សែន ដែលគេស្គាល់ថា លោក ជាបុរសខ្លាំងនៅកម្ពុជា។ សំណុំរឿងនេះ នៅទីបំផុត តុលាការ បានសម្រេចឲ្យអ្នកស្រី មូ សុខហួរ ចាញ់លោក ហ៊ុន សែន ដោយតុលាការបង្គាប់ឲ្យអ្នកស្រី សងប្រាក់ជំងឺចិត្តដល់លោក ហ៊ុន សែន ចំនួន ១៦ លានរៀល។
តាមពិតទៅអ្នកនយោបាយវ័យ ៦០ ឆ្នាំរូបនេះ បានដឹងច្បាស់ខ្លួនឯងមុនហើយថា រឿងក្តីនេះ រូបអ្នកស្រី ប្រាកដជាមិនអាចឈ្នះលោកនាយករដ្ឋមន្ត្រី ហ៊ុន សែន បានឡើយ។ អ្នកស្រីពន្យល់ថា៖« នរណាក៏គេដឹងដែរថា លោក ហ៊ុន សែន មានអំណាចខ្លាំងណាស់នៅកម្ពុជា ហើយខ្ញុំដឹងថា តុលាការនឹងឲ្យលោក ហ៊ុន សែន ឈ្នះ តែខ្ញុំត្រូវតែប្តឹង។ ខ្ញុំជាមនុស្សដែលមានគោលការណ៍ ចង់ចាប់សម្លាប់ខ្ញុំ ចាប់ចងខ្ញុំ ខ្ញុំមិនខ្លាចទេ ។ ខ្ញុំមិនចង់ឈ្លោះជាមួយលោក ហ៊ុន សែន នោះទេ តែក្នុងនាមជាអ្នកនយោបាយ ហើយជាស្ត្រីទៀត ប្រសិនបើយើងមិនហ៊ានតវ៉ា នៅពេលគេប្រមាថស្ត្រី តើតម្លៃស្ត្រីខ្មែរនៅឯណា? ខ្ញុំជឿថា ថ្វីដ្បិតតុលាការឲ្យលោក ហ៊ុន សែន ឈ្នះ តែប្រជាពលរដ្ឋខ្មែរកាត់សេចក្តីឲ្យខ្ញុំឈ្នះ ហើយខ្ញុំឈ្នះ គឺស្មើនឹងស្ត្រីខ្មែរឈ្នះ » ។
បេះដូងចង់ជួយជាតិ ផ្សំជាមួយទ្រឹស្តីរបស់អ្នកស្រី អង់ សានស៊ូជី បានជំរុញឲ្យអ្នកយោបាយខ្មែររូបនេះ មានភាពក្លាហាន រហូតដល់ហ៊ានឈ្លោះជាមួយលោក ហ៊ុន សែន និងប្រឈមមុខជាមួយអាជ្ញាធរជាញឹកញាប់ ។ ទ្រឹស្តីអ្នកស្រី អង់ សានស៊ូជី ដែលដក់ក្នុងអារម្មណ៍អ្នកស្រី មូ សុខហួរ នោះ គឺ «ប្រសិនបើយើងមានភាពភ័យខ្លាច ភាពភ័យខ្លាចនឹងតាមបន្លាចយើងជានិច្ច ហើយយើងមិនអាចទៅដល់គោលដៅបានទេ»។ ប្រកាន់ភ្ជាប់ទ្រឹស្តីរបស់អ្នកស្រី អ៊ុង សានស៊ូជី និងសកម្មភាពតស៊ូ ស្រដៀងគ្នាទៀតនោះ មតិមួយចំនួន បានលើកឡើងថា អ្នកស្រី មូ សុខហួរ ចង់ធ្វើខ្លួនដូចជាអ្នកនយោបាយដ៏ល្បីរបស់ភូមាគឺ អ្នកស្រី អ៊ុង សានស៊ូជី ។
«ខ្ញុំមិនមែន អ៊ុង សានស៊ូជី នៅស្រុកខ្មែរទេ តែខ្ញុំ គឺជា មូ សុខហួរ!»
នៅពេលគេប្រៀបធៀបខ្លួនជាមួយ អ្នកស្រី អ៊ុង សានស៊ូជី អ្នកនយោបាយខ្មែររូបនេះ មិនសប្បាយចិត្តនោះឡើយ។ ស្ត្រីរូបនេះ បានអះអាងថា ខ្លួនមិនដែលមានគំនិតចង់ក្លាយជា អ៊ុង សានស៊ូជី នៅស្រុកខ្មែរឡើយ។ « ខ្ញុំតែងតែពន្យល់ប្រាប់គេ នៅពេលដែលគេយកខ្លួនខ្ញុំមកប្រៀបជាមួយអ្នកស្រី អ៊ុង សានស៊ូជី ថា រូបខ្ញុំមិនមែន អ៊ុង សានស៊ូជី នៅខ្មែរទេ។ សូមកុំយកខ្ញុំទៅប្រៀបជាមួយមេបក្សប្រឆាំងភូមា។ ប្រសិនបើពេញចិត្តសកម្មភាពខ្ញុំ ឲ្យតម្លៃខ្ញុំ សូមហៅខ្ញុំថា មូ សុខហួរ ជាស្ត្រីខ្មែរមួយរូប ទៅបានហើយ » ។ នេះជាការបញ្ជាក់របស់ស្ត្រី ដែលមានឪពុកជាខ្មែរក្រោម។
ទន្ទឹមនឹងការបដិសេធនេះ អ្នកស្រី មូ សុខហួរ ក៏ខំព្យាយាមធ្វើចិត្ត ដើម្បីជម្នះនឹងមតិរិះគន់មកលើរូបអ្នកស្រី កន្លងមកផងដែរ។ កន្លងមក មតិមួយចំនួនបានរិះគន់ថា អ្នកស្រី ធ្វើជ្រុលពេក ជុំវិញការព្យាមយាមចូលទៅទីលានប្រជាធិបតេយ្យ បើទោះបីជាអាជ្ញាធរហាមឃាត់ និងត្រូវពួកគេសែងចេញញឹកញាប់យ៉ាងណាក៏ដោយ។ និយាយដល់ត្រង់ចំណុចនេះ អ្នកនយោបាយដែលធ្លាប់តែក្លាហាន និងហ៊ានប្រឈមមុខជាមួយលោក ហ៊ុន សែន រូបនេះ បានរៀបរាប់ទាំងអួលដើមកដូច្នេះថា៖« សួរថា តើខ្ញុំជាស្ត្រីចង់ឲ្យគេប៉ះពាល់ឬ? ហើយខ្ញុំជាម្តាយ នៅពេលដែលកូនឃើញគេចាប់សែងខ្ញុំចេញពីទីលានប្រជាធិបតេយ្យ តើទឹកភ្នែកខ្ញុំស្រក់ប៉ុន្មានដង? គ្មាននរណាចង់ជាប់គុក បាក់បែកពីគ្រួសារទេ តែសំណួរសំខាន់ តើយើងសុខចិត្តឲ្យគេគាបសង្កត់ឬយ៉ាងណា? បើវិនិច្ឆ័យថា ខ្ញុំធ្វើនេះហួសហេតុ ពេកជាសេរីភាពរបស់ពួកគាត់ទេ។ តែយ៉ាងណាលទ្ធផលចុងក្រោយ ទីលានប្រជាធិបតេយ្យ បានបើកឲ្យដំណើរការធម្មតាវិញ »។
ថ្វីដ្បិត ខ្សែជីវិតឈរលើវិថីនយោបាយប្រឈមនឹងបញ្ហាច្រើនយ៉ាងណាក៏ដោយ ក៏ស្ត្រីដែលមានកូនស្រី ៣ នាក់រូបនេះ តែងតែទទួលការលើកទឹកចិត្តពីសំណាក់ក្រុមគ្រួសារ គឺ ស្វាមី ជនជាតិអាមេរិក ដែលបានរៀបការនៅឆ្នាំ ១៩៨៦ និងកូនស្រីទាំង ៣ នាក់របស់ខ្លួន ។ បច្ចុប្បន្នអ្នកស្រី រស់នៅជុំគ្នាជាមួយប្តី និងកូនស្រីទី ២ នៅភ្នំពេញ ខណៈដែលកូនស្រី ២ រូបទៀត រស់នៅអាមេរិក និងកូរ៉េខាងត្បូង ។ រាល់សកម្មភាពរបស់អ្នកស្រី ដែលបង្ហោះនៅលើទំព័រហ្វេសប៊ុករបស់ខ្លួន គឺជាស្នាដៃ និងរៀបចំឡើងដោយកូនស្រីរបស់អ្នកស្រី។ ដំណាលដល់រឿងកូនស្រីទាំង ៣ នាក់របស់ខ្លួន អ្នកនយោបាយចាស់វស្សារបស់កម្ពុជារូបនេះ ក៏បើកសិទ្ធិដល់កូនៗរបស់ខ្លួនឲ្យធ្វើនយោបាយផងដែរ។ « ខ្ញុំគោរពតាមការសម្រេចចិត្តរបស់កូន ខ្ញុំទុកឲ្យពួកគេសម្រេចចិត្តដោយខ្លួនឯង ប្រសិនបើគេចង់ធ្វើនយោបាយខ្ញុំក៏មិនអាចរាំងរាបានដែរ។ ប្រសិនបើកាលៈទេសៈផ្តល់ឲ្យ ពួកគេនឹងឈរឈ្មោះបោះឆ្នោតក្នុងវិស័យនយោបាយ ហើយពួកគាត់ទៅក្នុងនាមជាបុគ្គល មិនមែនក្នុងនាមកូន មូ សុខហួរ ទេ»។
និយាយពី កាលៈទេសៈ ផ្តល់ឲ្យកូនស្រីបែបនេះ អ្នកស្រី មូ សុខហួរ ក៏ហាក់មានមហិច្ឆតា ចង់ក្លាយជានាយករដ្ឋមន្ត្រីនាថ្ងៃអនាគតផងដែរ ប្រសិនបើកាលៈទេសៈផ្តល់ឲ្យខ្លួន។ ស្ត្រីរូបនេះ បញ្ជាក់យ៉ាងនេះថា៖« បើកាលៈទេសៈផ្តល់ឲ្យ ខ្ញុំនឹងគិតពិចារណា ខ្ញុំមិនអាចនិយាយថា ខ្ញុំមិនចង់ក្លាយជានាយករដ្ឋមន្ត្រី បានទេ ។ គណបក្សសង្គ្រោះជាតិ អាចនឹងបញ្ចូលបេក្ខភាពនាយករដ្ឋមន្ត្រីជាស្ត្រី នៅក្នុងអាណត្តិក្រោយៗ ។ ហើយមិនមែនតែខ្ញុំទេ លោកអនុប្រធាន កឹម សុខា លោក យឹម សុវណ្ណ ក៏អាចឈ្មោះឈ្មោះនាយករដ្ឋមន្ត្រីសម្រាប់គណបក្សសង្គ្រោះជាតិ នៅពេលក្រោយផងដែរ។ ប៉ុន្តែនៅពេលនេះ រហូតដល់ពេលខាងមុខ គឺប្រជាពលរដ្ឋគាំទ្រលោកប្រធាន សម រង្ស៊ី។ ខ្ញុំគិតថា មនុស្សយើង បើកាលៈទេសៈតម្រូវហើយ ពិបាកនឹងប្រកែកណាស់ »។ ជាការពិតហើយ អ្នកស្រីនិយាយដូច្នេះ ត្រូវនឹងរឿងរ៉ាវរបស់ខ្លួន ពីព្រោះថា ដំបូងឡើយ អ្នកនយោបាយរូបនេះ មិនដែលស្រមៃចង់ធ្វើនយោបាយទេ ដោយសារគោរពតាមពាក្យឪពុក។ ប៉ុន្តែ ព្រោះតែកាលៈទេសៈតម្រូវ ទើបអ្នកស្រី ទុកបណ្តាំឪពុកមួយអន្លើ ហើយឈានជើងចូលឆាកនយោបាយរហូតដល់សព្វថ្ងៃនេះ។ ហើយប្រសិនជា កាលៈទេសៈតម្រូវទៀត អ្នកស្រីមួ សុខហួរ នឹងក្លាយជាបេក្ខជននាយករដ្ឋមន្ត្រីរបស់កម្ពុជាទៀត៕
© រក្សាសិទ្ធិដោយ thmeythmey.com
