ជាតិ
នយោបាយជាតិ
ក្រសួងមហាផ្ទៃ៖ មិនទាន់មានជនភៀសខ្លួនNauru ស្ម័គ្រចិត្តមកកម្ពុជានៅឡើយទេ
× មិនមានជនភៀសខ្លួនណាម្នាក់ពីសាធារណៈរដ្ឋណូរូ ប្រកាសស្ម័គ្រចិត្តយល់ព្រមមករស់នៅប្រទេសកម្ពុជាឡើយរហូតដល់ពេលនេះ បើទោះជាមានប្រតិភូមន្ត្រីពីក្រសួងមហាផ្ទៃកម្ពុជាធ្វើបទបង្ហាញអំពីកម្ពុជាដល់ពួកគេក៏ដោយ។ ក្នុងចំណោមបទបង្ហាញចំនួន១០លើក មានតែជនភៀសខ្លួនតែ៦នាក់ប៉ុណ្ណោះដែលបានមកស្តាប់បទបង្ហាញអំពីកម្ពុជា។
«មកដល់ពេលនេះ ពុំទាន់មានជនភៀសខ្លួនស្ម័គ្រចិត្តដាក់ពាក្យមកតាំងទីលំនៅអចិន្ត្រៃយ៍នៅកម្ពុជាឡើយ»។ នេះគឺជាខ្លឹមសារនៃរបាយការណ៍របស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដែលបានផ្ញើជូនលោកនាយករដ្ឋមន្ត្រី ហ៊ុន សែន។ ជារបាយការណ៍ស្តីអំពីការវិវត្តនៃការបញ្ជូន និងទទួលជនភៀសខ្លួនពីប្រទេសណូរូ តាមរយៈកិច្ចព្រមព្រៀងរវាងរដ្ឋាភិបាលអូស្ត្រាលី និងកម្ពុជា។
យោងតាមរបាយការណ៍របស់លោករដ្ឋមន្ត្រីក្រសួងមហាផ្ទៃ ក្រុមការងារនៃអគ្គនាយកដ្ឋានអន្តោប្រវេសន៍កម្ពុជាចំនួន៦រូប បានធ្វើដំណើរទៅប្រទេសណូរូដើម្បីនៅក្នុងខែមីនាកន្លងទៅ ដើម្បីធ្វើបទបង្ហាញអំពីកម្ពុជាប្រាប់ដល់ជនភៀសខ្លួន និងអ្នកពាក់ព័ន្ធ។
«ចាប់ពីថ្ងៃទី២៣ដល់ថ្ងៃទី២៧ ខែមីនា ក្រុមការងារបានធ្វើបទបង្ហាញចំនួន១០លើកនៅសណ្ឋាគារ Manen។ នៅថ្ងៃទី២៤មីនា ក្រុមការងារបានធ្វើបទបង្ហាញចំនួន២លើក មានជនភៀសខ្លួនចំនួន៥នាក់ចូលរួមស្តាប់ ក្នុងនោះមានជនជាតិអ៊ីរ៉ង់៤នាក់ និងប៉ាគីស្ថាន១នាក់។ នៅថ្ងៃបន្ទាប់មានជនភៀសខ្លួនសញ្ជាតិសូម៉ាលីម្នាក់ចូលស្តាប់ការបង្ហាញអំពីកម្ពុជា»។ នេះគឺជារបាយការណ៍របស់លោកឧបនាយករដ្ឋមន្ត្រី ដែលបញ្ជាក់ថា នៅក្នុងបទបង្ហាញផ្សេងៗទៀត សុទ្ធតែគ្មានជនភៀសខ្លួនចូលស្តាប់ឡើយ។ ទោះយ៉ាងណាក៏ដោយ ការរៀបចំបទបង្ហាញថ្ងៃដំបូង ក៏មានមនុស្សចូលរួម៧០នាក់ដែរ ដែលជាក្រុមការងារផ្តល់សេវាពាក់ព័ន្ធនឹងការតាំងទីលំនៅរបស់ជនភៀសខ្លួន៕
© រក្សាសិទ្ធិដោយ thmeythmey.com