ជាតិ
សង្គមស៊ីវិលស្នើឲ្យរដ្ឋាភិបាលលើកកម្ពស់សេរីភាពអ្នកសារព័ត៌មាន
×
សង្គមស៊ីវិលចំនួន១៤ស្ថាប័ន អំពាវនាវដល់រដ្ឋាភិបាល ជាពិសេសក្រសួងព័ត៌មាន ប្រព័ន្ធតុលាការ ប្រព័ន្ធផ្សព្វផ្សាយ និងដៃគូរពាក់ព័ន្ធទាំងអស់ សហការគ្នាចាត់វិធានការជាក់លាក់ ដើម្បីឲ្យអ្នកសារព័ត៌មានបំពេញការងាររបស់ខ្លួនប្រកបដោយភាពជោគជ័យ ក្នុងការពង្រឹងសេរីភាពសារព័ត៌មាន ដើម្បីលើកកម្ពស់ប្រព័ន្ធផ្សព្វផ្សាយឯករាជ្យ។
សេចក្ដីថ្លែងការណ៍រួមគ្នាចុះថ្ងៃទី៣០ មេសា បានបង្ហាញថា នៅថ្ងៃទី០៣ ឧសភា គឺជាទិវាសេរីភាពសារព័ត៌មានពិភពលោកនៅក្នុងឆ្នាំនេះក្រុមសង្គមស៊ីវិល អំពាវឲ្យក្រសួងព័ត៌មានគួរតែបង្កើតឲ្យមានអង្គភាពផ្ដល់អាជ្ញារប័ណ្ណប្រកបដោយតម្លាភាព និងឯករាជ្យពេញលេញ ដើម្បីធានាថាការចេញអាជ្ញារប័ណ្ណផ្សព្វផ្សាយមានភាពស្មើគ្នា ។ លើកកម្ពស់សំឡេង និងមតិយោបល់ចម្រុះតាមរយៈរលកធាតុអាកាស។
ក្រសួងព័ត៌មានគួរផ្ដល់អទិភាពក្នុងការបង្កើតច្បាប់ស្ដីពីសិទ្ធិទទួលបានព័ត៌មាន ដែលនិងផ្ដល់ព័ត៌មានជាសាធារណៈដល់អ្នកសារព័ត៌មាន និងប្រជាពលរដ្ឋទូទៅឲ្យបានស្វែងយល់ពីការពិត និងរាយការណ៍ព័ត៌មានជាក់ស្ដែង ដើម្បីផលប្រយោជន៍ប្រជាពលរដ្ឋខ្មែរគ្រប់រូប។ ដូច្នេះរដ្ឋាភិបាលគួរលើកកម្ពស់ឲ្យមានព័ត៌មានសាធារណៈ តាមរយៈប្រព័ន្ធអ៊ីនធឺណែតឲ្យបានច្រើន។
រដ្ឋសភាគឬធ្វើវិសោធនកម្មលើមាត្រាមួយចំនួនក្នុងក្រមព្រហ្មទណ្ឌដូចជា បទបរិហារកេរ្ត៍(មាត្រា ៣០៥) បទប្រមាថ (៥០២) បទបណ្ដឹងបរិហារបង្កាច់កេរ្ត៍(មាត្រា៣១១) និងបទធ្វើឲ្យបាត់ជំនឿលើសេចក្ដីសម្រេចរបស់តុលាការ (មាត្រា៥២៣) ដែលប៉ះពាល់ដល់ការបញ្ចេញមតិ។ប្រព័ន្ធតុលាការ និងតុលាការត្រូវចាត់វិធានការ ដើម្បីបញ្ចប់និទណ្ឌភាពចំពោះបុគ្គលដែលប្រព្រឹត្តិអំពើហិង្សាទៅលើអ្នកសារព័ត៌មាន។លើសពីនេះចាងហ្វាង និងអ្នកបោះពុម្ភផ្សាយសារព័ត៌មានទាំងអស់គួតែចាត់វិធានការ ដើម្បីធានាឲ្យប្រព័ន្ធផ្សព្វផ្សាយឯករាជ្យ មិនទទួលរងឥទ្ធិពលនយោបាយ ឬផលប្រយោជន៍ធុរកិច្ចណាមួយឡើយ។ ហើយប្រព័ន្ធផ្សព្វផ្សាយត្រូវតែធានាឲ្យមានការគោរពក្រមសីលធម៌ និងវិជ្ជាជីវៈអ្នកសារព័ត៌មានកម្ពុជា។
សេចក្ដីថ្លែងការដដែលបន្ដថា រយៈពេលប៉ុន្មានឆ្នាំចុងក្រោយនេះ អ្នកសារព័ត៌មាន និងអ្នកធ្វើការខាងវិស័យប្រព័ន្ធផ្សព្វផ្សាយជាច្រើន នៅជុំវិញពិភពលោកត្រូវបានវាយប្រហារ ឃុំខ្លួន និងធ្វើឃាត ហើយរាល់ការបោះពុម្ភផ្សាយ ត្រូវបានត្រួតពិនិត្យយ៉ាងតឹងរឹង ឬអាចប្រឈមនិងការបិទទៀតផង។ការរិតត្បិតសេរីភាពសារព័ត៌មានបែបនេះ រារាំងដល់ប្រព័ន្ធផ្សព្វផ្សាយឯករាជ្យ និងសេរីភាពបញ្ចេញមតិ ដែលជាមូលដ្ឋានគ្រិះនៃការអភិវឌ្ឍន៍ក្នុងសង្គមប្រជាធិបតេយ្យ៕
© រក្សាសិទ្ធិដោយ thmeythmey.com