ជាតិ
FBI គ្រោងបង្កើនកិច្ចសហប្រតិបត្តិការជាមួយ ACU ដើម្បីប្រឆាំងអំពើពុករលួយនៅកម្ពុជា
×
ការិយាល័យសហព័ន្ធស៊ើបអង្កេតសហរដ្ឋអាមេរិក (FBI) គ្រោងបង្កើនកិច្ចសហប្រតិបត្តិការបន្ថែមជាមួយអង្គភាពប្រឆាំងអំពើពុករលួយកម្ពុជា ដើម្បីប្រយុទ្ធប្រឆាំងអំពើពុករលួយ និងការលាងសម្អាតលុយកខ្វក់នៅកម្ពុជា ។ជំនួបពិភាក្សារវាងលោកJohn Sapinosoអនុព័ន្ធច្បាប់នៃ FBI ប្រចាំនៅប្រទេសកម្ពុជា ជាមួយលោក ឱម យ៉ិនទៀង ប្រធានអង្គភាពប្រឆាំងអំពើពុករលួយកាលពីថ្ងៃទី៣០ខែមេសាឆ្នាំ២០១៥ នៅទីស្តីការអង្គភាពប្រឆាំងអំពើពុករលួយ។
យោងតាមទីភ្នាក់ងារសារព័ត៌មានជាតិកម្ពុជា AKPលោក ឱម យ៉ិនទៀង មានប្រសាសន៍ថា FBI បានបង្ហាញនូវជំហរចង់បង្កើនកិច្ចសហប្រតិបតិ្តការជាមួយអង្គភាពប្រឆាំងអំពើពុករលួយរបស់កម្ពុជា (ACU) ក្នុងការស៊ើបអង្កេតអំពើពុករលួយ និងការលាងលុយកខ្វក់ក្នុងប្រទេសកម្ពុជាដែល ហូរមកពីបរទេសក៏ដូចជានៅប្រទេសកម្ពុជាផ្ទាល់ ។
ជាមួយគ្នានោះលោក John Sapinosoអនុព័ន្ធច្បាប់នៃ FBI ប្រចាំនៅប្រទេសកម្ពុជា បានបង្ហាញនូវជំហររបស់ខ្លួនដោយភាពជឿជាក់ និងកក់ក្តៅព្រមទាំង និងបានសន្យាបំពេញកិច្ចសហប្រតិបត្តិការជាមួយ ACU កម្ពុជាផ្ដោតលើចំណុចសំខាន់ៗមួយចំនួន ដើម្បីប្រយុទ្ធប្រឆាំងលើហិរញ្ញប្បទានភេវកម្ម និងការសម្អាតប្រាក់កខ្វក់ និងអំពើពុករលួយនៅកម្ពុជាឲ្យបានល្អ និងមានប្រសិទ្ធភាព។
កន្លងមកFBI ធ្លាប់បានជួយបណ្តុះបណ្តាលជាច្រើនលើកលើការងារស៊ើបអង្កេត ការលាងសម្អាតប្រាក់ កម្រិតមូលដ្ឋាន និងកម្រិតមធ្យមដល់មន្ត្រីប្រឆាំងអំពើពុករលួយនៅកម្ពុជា និងបានសហការរៀបចំអញ្ជើញមន្ត្រីជំនាញស៊ើបអង្កេតពីសហរដ្ឋអាមេរិកមកធ្វើបទបង្ហាញ និងចែករំលែកបទពិសោធន៍នៅ ACU ។ មន្ត្រី ACU ក៏បានទៅចូលរួមវគ្គបណ្តុះបណ្តាលនៅក្រៅប្រទេសផ្នែកស៊ើបអង្កេតបទក្លែងបន្លំ និងអំពើពុករលួយក្នុងវិស័យសាធារណៈ ការសម្អាត ប្រាក់ សុច្ចរិតភាពសាធារណៈជាដើម៕
© រក្សាសិទ្ធិដោយ thmeythmey.com