អន្តរជាតិ
នយោបាយអន្តរជាតិ
អាមេរិកបន្លាចលោកគីមជុងអ៊ុនដោយត្រៀមពង្រាយមីស៊ីលទៅកូរ៉េខាងត្បូង
× កូរ៉េខាងជើងចាប់ផ្តើមខឹងសម្បារសហរដ្ឋអាមេរិកជាថ្មី នៅពេលដែលអាមេរិកប្រកាសត្រៀមបញ្ជូនប្រព័ន្ធមីស៊ីលការពារដែនអាកាសទៅកាន់កូរ៉េខខាងត្បូង។ របបដឹកនាំក្រុងព្យុងយ៉ាងចាត់ទុកការប៉ុនប៉ងពង្រាយអាវុធទៅកូរ៉េខាងត្បូងជាចេតនាមិនល្អមួយ ហើយវានឹងធ្វើឲ្យប៉ះពាល់សន្តិសុខតំបន់ថែមទៀត។ នេះបើយោងតាមទីភ្នាក់ងារព័ត៌មានចិន Xinhua។
សហរដ្ឋអាមេរិកអាចនឹងបញ្ជូនប្រព័ន្ធមីស៊ីលរបស់ខ្លួនទៅកាន់កូរ៉េខាងត្បូងនៅពេលខាងមុខ។ ប្រព័៏ន្ធកាពារដែនអាកាសសហរដ្ឋអាមេរិក អាចនឹងត្រូវពង្រាយនៅកូរ៉េខាងត្បូងដើម្បីទប់ទល់បញ្ហាប្រឈមសន្តិសុខ ជាពិសេសការពារការគំរាមកំហែងពីសំណាក់កូរ៉េខាងជើង។ យ៉ាងណាមិញ ការប៉ុនប៉ងបញ្ជូនអាវុធទៅកូរ៉េខាងត្បូងនេះ បានធ្វើឲ្យរបបដឹកនាំក្រុងព្យុងយ៉ាងខឹងសម្បារជាខ្លាំង ស្របពេលដែលភាពតានតឹងនៅឧបទ្វីបកូរ៉េកំពុងកើនឡើង។ កូរ៉េខាងជើងរិះគន់រដ្ឋបាលលោក ប៉ារ៉ាក់ អូបាម៉ា ដែលប៉ងបញ្ជូនប្រព័ន្ធមីស៊ីលទៅកាន់ក្រុងសេអ៊ូល ហើយអះអាងថា សព្វាវុធអាមេរិកធ្វើឲ្យមានការភាន់ច្រលំ និងអាចបង្កឲ្យមានបញ្ហាសន្តិសុខផងដែរ។
អ្នកនាំពាក្យវិទ្យាស្ថានសន្តិភាព និងរំសាយអាវុធស្ថិតក្រោមក្រសួងការបរទេសកូរ៉េខាងជើងបានសង្កត់ធ្ងន់ថា ប្រព័ន្ធរ៉ាដា និងអាវុធមីស៊ីលជំនាន់ថ្មីរបស់ក្រុងវ៉ាស៊ីនតោននៅកូរ៉េ នឹងត្រូវប្រើប្រាស់ដើម្បីត្រួតពិនិត្យ និងឆ្លើយតបរាល់សកម្មភាពនានាផ្នែកយោធារបស់សត្រូវខ្លួននៅតំបន់អឺរ៉ាស៊ី។ កូរ៉េខាងជើងសំដៅលើការព្យាយាមទប់ទល់ការគំរាមកំហែងរបស់រុស្ស៊ីដែលជារដ្ឋស្ថិតនៅតំបន់អឺរ៉ាស៊ី មកលើតំបន់ទាំងមូលអាស៊ីបូព៌ាជាពិសេសកូរ៉េខាងត្បូងនិងជប៉ុន។ អ្នកនាំពាក្យខាងលើក៏បានសង្កត់ធ្ងន់ផងដែរថា ការបំពាក់ប្រព័ន្ធការពារដែនអាកាសនៅកូរ៉េខាងត្បូងបង្ហាញថា គ្រោះថ្នាក់ និងការគំរាមកំហែងសន្តិសុខថ្មីមួយទៀតនឹងផុសរូបរាងឡើងនៅពេលខាងមុខ។
ជុំវិញការបញ្ជូនប្រព័ន្ធការពារអាកាសនេះដែរ គេមិនទាន់ឃើញមានការសម្រេចជាផ្លូវការនៅឡើយពីកាលបរិច្ឆេទនៃការបញ្ជូន ប៉ុន្តែសកម្មភាពរបស់ក្រុងវ៉ាស៊ីនតោនអាចនឹងដុតកម្តៅតំបន់ឧទ្វីបកូរ៉េឲ្យកាន់តែក្តៅឡើងផងដែរ។ ចំណែក កូរ៉េខាងជើងជារឿយៗ ចាំរិះគន់សហរដ្ឋអាមេរិកនិងកូរ៉េខាងជើងនិងចោទប្រកាន់ប្រទេសទាំងពីរថាព្យាយាមគំរាមកំហែងខ្លួនផងដែរ។
កាលពីដើមឆ្នាំ ការប្រកាសធ្វើសមយុទ្ធយោធារវាងកូរ៉េខាងត្បូងនិងអាមេរិក បានបញ្ឆេះកំហឹងរបបដឹកនាំលោក គីមជុងអ៊ុន ហើយដោយទ្រាំមិនបានមេដឹកនាំម្នាក់នេះបញ្ជាឲ្យកងទ័ពខ្លួនបាញ់មីស៊ីលជាច្រើនគ្រាប់ទម្លាក់ក្នុងសមុទ្រ និងរៀបចំកងទ័ពត្រៀមធ្វើសង្គ្រាមផងដែរ។ មិនត្រឹមតែប៉ុណ្ណោះទេ ក្រុងព្យុងយ៉ាងក៏បានព្រមានផងដែរ ថាខ្លួនអាចនឹងបាញ់សាកល្បងអាវុធនុយក្លេអ៊ែរនៅពេលណាមួយខាងមុខថែមទៀត៕
© រក្សាសិទ្ធិដោយ thmeythmey.com