កីឡាអន្តរជាតិ
អន្តរជាតិ
Floyd Mayweather ក្លាយជាម្ចាស់ខ្សែក្រវាត់ក្នុងជំនួបប្រចាំសតវត្ស
× កីឡាករ Floyd Mayweather បានក្លាយជាម្ចាស់ខ្សែក្រវាត់នាជំនួបនៃព្រឹត្តិការណ៍ «The Fight of the Century» នៅសង្វៀន MGM Grand Garden Arena ក្នុងទីក្រុងឡាសវេហ្កាស សហរដ្ឋអាមេរិកនៅព្រឹកថ្ងៃអាទិត្យ ទី៥ ខែឧសភា ឆ្នាំ២០១៥ នេះ។ កីឡាកររូបនេះ ទទួលបានពិន្ទុជាឯកច្ឆ័ន្ទពីចៅក្រម លើស Manny Pacquiao ១១៨-១១០, ១១៦-១១២, ១១៦-១១២។
ពីទឹក១ដល់ទី៣ កីឡាករទាំងពីរស្ថិតក្នុងស្ថានភាពវាស់ស្ទង់គ្នាទៅវិញទៅមក។ ឈានដល់ទឹកទី៤ Pacquiao វាយចំមុខរបស់ Mayweather ហើយកីឡាករហ្វីលីពីនព្យាយាមវាយសម្រុក ប៉ុន្តែកីឡាការអាមេរិកទប់ទល់មិនឲ្យវាយចូលមុខនោះឡើយ។
នៅទឹកទី៥ Mayweather នៅតែទទួលការវាយសម្រុកពីសំណាក់ Pacquiao ហើយឈានដល់ទឹកទី៦ Pacquiao បានត្រឹមតែវាយពោះរបស់ Mayweather ប៉ុណ្ណោះ។ នៅទឹកទី៧ កីឡាករទាំងពីរហាក់មានឱកាសរៀងៗខ្លួន ប៉ុន្តែមិនមានចំណុចដែលគួរឲ្យកត់សម្គាល់នោះឡើយ។
នៅទឹកទី៨ និងទី៩ បើទោះបីជា Mayweather ព្យាយាមគេចចេញពីការវាយលុករបស់ Pacquiao ក៏ដោយ ប៉ុន្តែកីឡាករអាមេរិករូបនេះ ក៏មានឱកាសវាយចូលមុខរបស់ Pacquiao ផងដែរ។ នៅទឹកទី១០ និង១១ Pacquiao បន្តការប្រើកណ្តាប់ដៃដើម្បីវាយលុកលើ Mayweather ហើយសម្រេចបានផលមួយចំនួនផងដែរ បើទោះបីជា Mayweather ខិតខំគេចចេញក៏ដោយ។
នៅទឹកចុងក្រោយ Pacquiao នៅតែព្យាយាមសម្រុក ខណៈ Mayweather នៅតែព្យាយាមរារាំងបានសម្រេច។
ជំនួបដណ្តើមខ្សែក្រវាត់ពិភពលោក (Welterweight) ទម្ងន់ជាង៦៦គីឡូក្រាម រវាងស្តេចប្រដាល់អាមេ រិក Floyd “Money” Mayweather និងស្តេចប្រដាល់ហ្វីលីពីន Manny “Pac-Man” Pacquiao ទាក់ទាញអ្នកនិយមទស្សនាកីឡាប្រដាល់លើពិភពលោកយ៉ាងខ្លាំង។
កន្លងមក Floyd អាយុ៣៨ឆ្នាំ បានគ្រប់គ្រងតំណែងជើងឯកពិភពលោកចំនួន៥ (5-division World champion) ដោយមានប្រវត្តិប្រកួតចំនួន៤៧លើក ឈ្នះទាំង៤៧លើក និងផ្តួលដៃគូឲ្យសន្លប់ចំនួន២៦លើក។ ចំណែក Pacquiao អាយុ៣៦ឆ្នាំ គ្រប់តំណែងជើងឯកពិភពលោករហូតដល់ទៅ៨ (8-division world champion) ដោយប្រកួតបាន៦៤លើក ឈ្នះ៥៧លើក (ធ្វើឲ្យប្រកួតសន្លប់៣៨លើក) ចាញ់៥លើក និងស្មើ២លើក។
កីឡាករទាំងពីរសុទ្ធតែមានប្រវត្តិបំបាក់កីឡាករឆ្នើមៗចំនួន៥ (Famous Five) លើពិភពលោក ដែលក្នុងនោះមាន Juan Manuel Marquez, Ricky Hatton, Oscar De La Hoya, Shane Mosley និង Miguel Cotto។
បើតាម CNN ការផ្គូផ្គងកីឡាករទាំងពីរនេះ បានចំណាយពេលអស់រយៈពេលប្រមាណ៥ឆ្នាំ។ ចំណូលដែលទទួលបានពីការរៀបចំឲ្យមានជំនួបនៅថ្ងៃអាទិត្យនេះ ត្រូវបានគេរំពឹងថា នឹងចាប់ពី៣០០លាន ទៅ៤០០លានដុល្លារអាមេរិក។ សំបុត្រដែលថោកបំផុតមានតម្លៃ១៥០០ដុល្លារអាមេរិក ហើយឡើងដល់៨០០០ដុល្លារ ៤០០ ០០០ដុល្លារ និង៥០០ ០០០ដុល្លារអាមេរិក៕
© រក្សាសិទ្ធិដោយ thmeythmey.com