ជាតិ
EU ប្រារព្វព្រឹត្តិការណ៍សប្ដាហ៍អឺរ៉ុបឆ្នាំ២០១៥ ដើម្បីផ្សព្វផ្សាយផលិតផលអឺរ៉ុបនៅកម្ពុជា
×
សហភាពអឺរ៉ុបប្រចាំកម្ពុជា ប្រារព្វព្រឹត្តិការណ៍ សប្ដាហ៍អឺរ៉ុបឆ្នាំ២០១៥ ដើម្បីអប់អរវត្តមានរបស់ខ្លួន នៅក្នុងប្រទេសកម្ពុជា។ ការប្រារព្វពិធីនេះឡើង ក៏ដើម្បីបង្ហាញ និងផ្សព្វផ្សាយពីផលិតផលអឺរ៉ុប ដល់ប្រជាជនកម្ពុជាផងដែរ។
ដោយទទួលបានជោគជ័យនៃការប្រារព្វទិវាអឺរ៉ុប កាលពីឆ្នាំមុនៗកន្លងទៅ ប្រតិភូសហភាពអឺរ៉ុបប្រចាំកម្ពុជានៅឆ្នាំនេះ បានចូលរួមសហការជាមួយនឹងសភាពាណិជ្ជកម្មអឺរ៉ុបប្រចាំកម្ពុជា (EuroCham) បង្កើតព្រឹត្តិការណ៍ «សប្ដាហ៍អឺរ៉ុប» ពេញមួយសប្ដាហ៍ ដើម្បីផ្សព្វផ្សាយ និងបង្ហាញឲ្យប្រជាជនកម្ពុជា បានស្គាល់នូវក្រុមហ៊ុន និងម៉ាកផលិតផលអឺរ៉ុប ដែលមានវត្តមាននៅកម្ពុជា។
ឯកអគ្គរាជទូតសហភាពអឺរ៉ុប លោក ហ្សង់ ហ្វ្រង់ស័រកូតាន់ Jean-Francois Cautainមានប្រសាសន៍ថា គោលបំណងដ៏សំខាន់នៃភាពជាដៃគូរនេះ គឺដើម្បីលើកកម្ពស់ការយល់ដឹងអំពីសារៈសំខាន់នៃពាណិជ្ជកម្មអឺរ៉ុបនៅកម្ពុជា និងការគាំទ្រនៅតាមតំបន់នានាក្នុងសង្គម និងជាការចូលរួមចំណែកដល់សេដ្ឋកិច្ចកម្ពុជា។ លោកបន្ថែមថា៖ «យើងចង់បង្ហាញថា សហភាពអឺរ៉ុប ក្រៅពីការសាងសង់ផ្នែកនយោបាយក្រោយសង្គ្រាម ដែលផ្ដោតទៅលើសន្ដិភាព ប្រជាធិបតេយ្យ សេរីភាព និងភាពសម្បូរបែប ក៏ជាទីតាំងសេដ្ឋកិច្ចដ៏អស្ចារ្យ និងសម្បូរបែបជាមួយ នឹងក្រុមហ៊ុននាំមុខគេក្នុងពិភពលោកជាច្រើន»។
ព្រឹត្តិការណ៍ សប្ដាហ៍អឺរ៉ុបនេះ មានរយៈពេលចាប់ថ្ងៃទី ៤ ដល់ថ្ងៃទី១០ ឧសភានៅមុខវត្តបទុមដោយមានការដាក់តាំងពិពណ៌ម៉ាកផលិផផលល្បីជាច្រើននៅទូទាំងពិភពលោក និងបង្ហាញរូបភាពនានា ដើម្បីឲ្យប្រជាជនកម្ពុជាបានទស្សនា និងបានស្គាល់ពីប្រវត្តិសាស្ត្រ នៃសហភាពអឺរ៉ុប កិច្ចសហប្រតិបត្តិការ ក្នុងការអភិវឌ្ឍន៍នៅក្នុងប្រទេសកម្ពុជា។ លើសពីនេះសហភាព ក៏មានកម្មវិធីទស្សនាតាមសកលវិទ្យាល័យមួយចំនួន និងមានការប្រណាំងកង់អាកាសធាតុផងដែរ នៅក្នុងព្រឹត្តិការណ៍ សប្ដាហ៏អឺរ៉ុបនេះ៕
© រក្សាសិទ្ធិដោយ thmeythmey.com