ជាតិ
អាដហុកចោទអភិបាលស្រុកកែវសីមាថា ហាមមិនឲ្យមន្ត្រីខ្លួនបើកវគ្គបណ្តុះបណ្តាល
× សមាគមអាដហុកសាខាខេត្តមណ្ឌគិរី បានចោទលោក ស៊ុន វណ្ណវុឌ្ឍន៍ អភិបាលស្រុកកែវសីមា ខេត្តមណ្ឌលគិរី ថា បានគំរាមគំហែងលើមន្ត្រីសមាគមន៍អាដហុក មិនឲ្យរៀងចំការបើកវគ្កបណ្តុះបណ្តាលស្តីពីការពង្រឹងសិទ្ឋិអំណាចសហគមន៍មូលដ្ឋាន ដល់ប្រជាពលរដ្ឋ ដែលនឹងប្រព្រឹត្តទៅ នៅថ្ងៃទី១១ ខែឧសភា ឆ្នាំ២០១៥ ។
លោក លោក ស៊ុន វណ្ណវុឌ្ឍន៍ អភិបាលស្រុកកែវសីមា គំរាមលោក អ៊ាង ម៉េងលី មន្ត្រីទទួលបន្ទុកការងារអង្កេតរបស់សមាគមន៍អាដហុកសាខាខេត្តមណ្ឌគិរី ខណៈដែលលោកចុះទៅធ្វើការទាក់ទងព័ត៌មានដើម្បីបើកវគ្គបណ្តុះបណ្ដាលដល់ប្រជាពលរដ្ឋ ទាក់ទងនឹងសិទ្ឋិមនុស្ស លទ្ឋិប្រជាធិបតេយ្យ និងច្បាប់ ដើម្បីពង្រឹងសិទ្ឋិអំណាចសហគមន៍មូលដ្ឋាន ។ នេះបើតាមសេចក្តីប្រកាសពត៌មាន ដែលបានចុះផ្សាយដោយសមាគមន៍អាដហុកសាខាខេត្តមណ្ឌលគិរី នាថ្ងៃទី០៥ ខែ០៥ ឆ្នាំ២០១៥ នេះ ។
បន្ថែមពីលើនេះ លោក សុក រដ្ឋា អ្នកសម្របសម្រួលសមាគមអាដហុកសាខាខេត្តមណ្ឌលគិរី បានឲ្យដឹងថា កាលពីថ្ងៃទី០៤ ខេមេសា ឆ្នាំ២០១៥ មន្រី្តសមាគមអាដហុកសាខាខេត្តមណ្ឌគិរី បានចុះទៅសាកសួរព័ត៌មានដើម្បីបើកវគ្គបណ្តុះបណ្តាលដល់ប្រជាពលរដ្ឋ តែត្រូវលោក ស៊ុន វណ្ណវុឌ្ឍន៍ អភិបាលស្រុកកែវសីមា មិនអនុញ្ញាត ដោយលោកសំអាងថាការបើកវគ្គបណ្តុះបណ្តាលនេះមិនមែនជាសកម្មភាពអង្គការ តែវាជាកម្មភាពគណបក្សនយោបាយ ។ បើតាមលោក សុក រដ្ឋា លោក ស៊ុន វណ្ណវុឌ្ឍន៍ បានគំរាមយ៉ាងនេះថា៖ «បើសមាគមន៍នៅតែបើកវគ្គបណ្តុះបណ្តាលស្តីពីការពង្រឹងសិទ្ឋិអំណាចសហគមន៍មូលដ្ឋាន ដូចមានចែងក្នុងលិខិតជូនដំណឹងមែននោះ លោកនឹងចាត់វិធានការដាក់ខ្នោះលើមន្ត្រីអាដហុកមិនខាន» ។
ការគំរាមគំហែងរបស់លោក លោក ស៊ុន វណ្ណវុឌ្ឍន៍ អភិបាលស្រុកកែវសីមា មកលើលោក អ៊ាង ម៉េងលី ត្រូវបានសមាគមអាដហុកសាខាខេត្តមណ្ឌលគិរី អះអាងថា ជាការធ្វើឲ្យប្រជាពលរដ្ឋម្ចាស់អំណាច មិនត្រឹមតែដកសេចក្តីទុកចិត្តពីមន្ត្រីថ្នាក់ស្រុកនោះទេ តែវាថែមទាំងជះឥទ្ឋិពលមិនល្អដល់ថ្នាក់ដឹកនាំរដ្ឋទៀតផង ហើយសមាគមអាដហុក ក៏បានស្នើដល់ស្ថាប័នកំពូលៗទាំងបី ធ្វើអន្តរាគមន៍បញ្ឈប់ការគំរាមគំហែងនេះ ដើម្បីឲ្យប្រជាពលរដ្ឋមានឱកាសទទួលបានការអប់រំ ដែលជាសិទ្ឋិមួយដ៏សំខាន់ ដែលប្រជាពលរដ្ឋចាំបាច់ត្រូវតែទទួលបានដោយគ្មានការរារាំ ឬការគំរាមគំហែង ដើម្បីក្លាយខ្លួនជាធនធានដ៏មានប្រយោជន៍ក្នុងការចូលរួមអភិវឌ្ឍន៍ប្រទេសជាតិ ។
ពាក់ព័ន្ធនឹងការចោទប្រកាន់នេះ សារព័ត៌មានថ្មីៗ មិនអាចទាក់ទងសុំការពន្យល់ពីលោក ស៊ុន វណ្ណវុឌ្ឍន៍ អភិបាលស្រុកកែវសីមា បានទេ នៅថ្ងៃអង្គារនេះ ។
ទោះបីជាមានគំរាមគំហែងបែបនេះក៏ដោយ សមាគមអាដហុកនៅតែប្រកាសថា នឹងបើកវគ្គបណ្តុះបណ្តាលស្តីពីការពង្រឹងសិទ្ឋិអំណាចដល់សហគមន៍មូលដ្ឋាន ដើម្បីលើកស្ទួយសិទ្ឋិមនុស្ស លទ្ឋិប្រជាធិបតេយ្យ និងច្បាប់ ដែលនឹងប្រព្រឹត្តទៅនៅថ្ងៃទី១១ ខែឧសភា ឆ្នាំ២០១៥ ដោយឥតងាករេឡើយ ៕
© រក្សាសិទ្ធិដោយ thmeythmey.com