កីឡាអន្តរជាតិ
អន្តរជាតិ
អ្នកគាំទ្រពីរនាក់ដាក់ពាក្យប្តឹងPacquiaoព្រោះលាក់បញ្ហារបួសស្មា
×
ជនជាតិអាមេរិកពីរនាក់បានសម្រេចចិត្តដាក់ពាក្យបណ្តឹងប្រឆាំងកីឡាករដ៏ល្បីល្បាញរបស់ហ្វីលីពីន Manny Pacquiao ដែលហ៊ានលាក់បាំងពីបញ្ហារបួសស្មា។ អ្នកទាំងពីរអះអាងថា ថាបណ្តឹងត្រូវបានដាក់ទៅកាន់តុលាការអាមេរិករួចហើយ ហើយពួកគេលើកឡើងថា បើសិនជាកីឡាករនេះមិនលាក់បាំង ពួកគេក៏មិនចាញ់អស់លុយសន្ធឹកសន្ធាប់ដូច្នេះដែរ។ នេះបើយោងតាមសារព័ត៌មាន Al Jazeera។
រឿងដែលមិនគួរអោយជឿមួយកើតឡើងប៉ុន្មានថ្ងៃក្រោយការប្រកួតប្រចាំសតវត្សនៅឡាសវេហ្កាសរវាង Manny Pacquiaoនិង Floyd Maywhetherស្រាប់តែមានព័ត៌មានថា អ្នកគាំទ្រ Pacquiaoពីរនាក់សុខចិត្តដាក់ពាក្យបណ្តឹងប្រឆាំងកីឡាកររូបនេះ។ ពួកគេទាំងពីរប្តឹងកីឡាករ Pacquiaoដោយសារតែកីឡាករនេះហ៊ានលាក់បាំងពីការមានរបួសស្មា ហើយពួកគេចំណាយលុយច្រើនសន្ធឹកសន្ធាប់ដើម្បីទិញសំបុត្រចូលទស្សនាការប្រកួតនេះ។
គួររំលឹកថាកាលពីថ្ងៃសុក្រ កីឡាករ Pacquiaoមិនបានផ្តល់ព័ត៌មានថាខ្លួនមានរបួសស្មាឡើយ នៅពេលដែលគេអោយលោកជួយបំពេញលិខិតទាក់ទងនឹងកាយសម្បទា និងបញ្ហាសុខភាពរបស់លោក។ លិខិតដែលបំពេញនោះត្រូវបានចុះហត្ថលេខាដោយលោកផ្ទាល់ និងទីប្រឹក្សារបស់លោកផងដែរ។
ទាំងលោក Pacquiaoនិងក្រុមរបស់លោកមិនបានប្រាប់ទៅកាន់គណកម្មការកីឡា Nevada ពីបញ្ហារបួសស្មានេះ រហូតទាល់តែជិតដល់ម៉ោងចាប់ផ្តើមប្រកួត។ នៅពេលនោះពួកគេស្នើសុំអោយមានការចាក់ថ្នាំប្រឆាំងការឈឺចាប់ដល់ កីឡាករ Pacquiaoផង។
អ្នកទាំងពីរដែលបានដាក់ពាក្យប្តឹងកីឡាករ Pacquiaoនោះមានម្នាក់ឈ្មោះ StephaneVanelនិងម្នាក់ទៀតមានឈ្មោះថា Rahbaran។ ពាក្យបណ្តឹងរបស់ពួកគេត្រូវបានរៀបចំឡើងនៅតុលាការសហព័ន្ធរដ្ឋ Navada។ បើតាមពាក្យបណ្តឹងខាងលើ អ្នកទាំងពីរនេះទាមទាររកសំណងជំងឺចិត្តពី កីឡាករ Pacquiaoដោយសម្អាងទៅលើច្បាប់ដែលការពារអតិថិជន។ មិនត្រឹមតែប៉ុណ្ណោះទេជនទាំងពីរចង់ស្នើសុំប្តឹងជំនួសអ្នកដែលបានទិញសំបុត្រទស្សនាផ្ទាល់ អ្នកបង់លុយសម្រាប់ទស្សនាតាមកញ្ចក់ទូរទស្សន៍ និងអ្នកដែលភ្នាល់ដាក់លុយក្នុងការប្រកួតថែមទៀត។
ដោយឡែកក្រុមហ៊ុន Top Rank Incដែលជាក្រុមហ៊ុនផ្សព្វផ្សាយនិងតំណាងអោយកីឡាករ Pacquiaoត្រូវបានដាក់ឈ្មោះក្នុងពាក្យបណ្តឹងជាចុងចោទ ប៉ុន្តែក្រុមហ៊ុននេះមិនបានផ្តល់យោបល់អ្វីនោះឡើយមកទល់ពេលនេះ៕
© រក្សាសិទ្ធិដោយ thmeythmey.com