កីឡាអន្តរជាតិ
អន្តរជាតិ
ហេតុផលបីយ៉ាងបញ្ជាក់ថា Floyd និង Pacquiaoមិនអាចប្រកួតគ្នាជាលើកទី២
×
ការប្រកួតកីឡាប្រដាល់លំដាប់ពិភពលោក រវាងកីឡាករ Floyd Mayweather Jr. និង Manny Pacquiao ត្រូវបានគេចាត់ទុកថា ជាការប្រកួតប្រចាំសតវត្ស ព្រោះតែការប្រកួតនេះធ្វើឲ្យកីឡាករទាំងពីរ និងភាគីពាក់ព័ន្ធនានា អាចស្វែងរកប្រាក់កម្រៃបានយ៉ាងច្រើន។ បើយោងតាមលទ្ធផលនៃការប្រកួតកាលពីចុងសប្ដាហ៍មុន កីឡាករ Floyd ត្រូវបានចៅក្រមសម្រេចឲ្យឈ្នះកីឡាករ Pacquiao ដោយពិន្ទុ។
ទោះជាយ៉ាងណាក៏ដោយ ការប្រកួតនេះ បានធ្វើឲ្យទស្សនិកជនភាគច្រើន ជាពិសេសប្រជាជនហ្វីលីពីនមិនពេញចិត្តចំពោះលទ្ធផលនេះទេ ដោយពួកគេគិតថា កីឡាករ Pacquiao ជាអ្នកឈ្នះ ហើយបានស្នើឲ្យមានការប្រកួតសារជាថ្មីម្ដងទៀត រវាងកីឡាករទាំងពីរនេះ។
ប៉ុន្តែបើទោះជាយ៉ាងណាក៏ដោយ គ្មានទេការប្រកួតគ្នាជាលើកទី២ រវាងកីឡាករFloyd និង Pacquiao ។ ខាងក្រោមនេះគឺជាហេតុផល ដែលបញ្ជាក់ថា មិនអាចមានការប្រកួតជាលើកទី២ រវាងកីឡាករទាំងនេះ ជាថ្មីម្ដងទៀតនោះទេ។
ទី១៖ ត្រូវចំណាយពេលយូរដើម្បីរៀបចំឲ្យមានការប្រកួតឡើងវិញ ជាក់ស្ដែងការប្រកួតនេះគឺមានការចចារអស់រយៈពេល ៥ ឆ្នាំ។ ខណៈពេលដែល កីឡាករ Floyd មានវ័យ ៣៨ បានចុះកុងត្រាជាមួយ Showtimeថាការប្រកួតនេះគឺមានតែម្ដងគត់ ស្របពេលដែលលោកគ្រោងនឹងចូលនិវត្តន៍នៅចុងឆ្នាំនេះ ក្រោយពេលការប្រកួតជាលើកចុងក្រោយនៅខែកញ្ញា។ ចំណែកឯកីឡាករ Pacquiao មានវ័យ ៣៦ ឆ្នាំក៏នឹងត្រូវផុតកុងត្រាក្នុងផ្សាយពាណិជ្ជកម្មជាមួយ HBO នៅត្រឹមឆ្នាំ ២០១៦ ផងដែរ។
ទី២៖ មានភាពសាំញ៉ាំជាច្រើនប្រសិនបើមានការប្រកួតឡើងវិញ ព្រោះថាដើម្បីរៀបចំឲ្យមានការប្រកួតមួយនេះឡើង គឺតម្រូវឲ្យមានការចូលរួមពីភាគីទាំងសងខាង ដើម្បីសហការគ្នារៀបចំព្រោះថា វាមានភាពសាំញ៉ាំជាច្រើនដូចជា ការផ្សាយពាណិជ្ជកម្ម ការដាក់លក់សំបុត្រ និងភាពចម្រូងចម្រាស់នៃការកំណត់ថ្លៃ ក្នុងការទស្សនាការផ្សាយផ្ទាល់ជាដើម។
ទី៣៖ ទស្សនិកជនភាគច្រើនក៏មិនចង់ឲ្យមានការប្រកួតឡើងវិញដែរ ព្រោះថាដើម្បីទស្សនាការប្រកួតនេះ ពួកគេត្រូវចំណាយប្រាក់ទិញសំបុត្រដែលមានតម្លៃថ្លៃបំផុត ខណៈអ្នកទស្សនាការផ្សាយផ្ទាល់នៅផ្ទះក៏ត្រូវចំណាយប្រាក់ ១០០ ផងដែរនោះ។ ការមិនពេញចិត្តចំពោះការប្រកួតនេះ ក៏រួមបញ្ជូលទាំងសកម្មភាពប្រកួតរបស់កីឡាករទាំងពីរផងដែរ ដោយកីឡាករ Manny Pacquiaoគឺជាអ្នកវាយសម្រុក តែកីឡាករ Floyd Mayweather គ្រាន់តែការពារនិងគេចខ្លួនតែប៉ុណ្ណោះ។ ដូច្នេះហើយទើបអ្នកទស្សនាយល់ថា ការចំណាយប្រាក់របស់គេគឺមិនន័យទេ ដែលត្រូវចំណាយប្រាក់ដ៏ច្រើនទៅមើលការប្រកួតកីឡាប្រដាល់លំដាប់ពិភពលោក ដ៏គួរឲ្យធុញទ្រាន់នោះ៕
© រក្សាសិទ្ធិដោយ thmeythmey.com