ជាតិ
សុខភាព
កម្ពុជាស្ថិតក្នុងចំណោមប្រទេសដែលក្មេងនៅទីក្រុងមានគម្លាតជីវិតខុសគ្នាឆ្ងាយ
×![]()
ដោយ: រួបរួម
គម្លាតជីវិតរវាងកូនអ្នកមាន និងអ្នកក្រនៅក្នុងរាជធានីភ្នំពេញ មានសភាពខុសគ្នាឆ្ងាយយ៉ាងខ្លាំង។ នេះបើតាមរបាយការណ៍ «The Urban Disadvantage, State of the World’s Mother 2015» ដែលផ្សព្វផ្សាយដោយអង្គការ Save the Children កាលពីថ្ងៃទី៥ ខែឧសភា ឆ្នាំ២០១៥ កន្លងមក។
ប្រទេសចំនួន១០ដែលមានគម្លាតជីវិតខុសគ្នាឆ្ងាយរវាងក្មេងកូនអ្នកមាន និងអ្នកក្រនៅក្នុងក្រុង រួមមាន រ្វ៉ាន់ដា កម្ពុជា កេនយ៉ា វៀតណាម ប៉េរូ ឥណ្ឌា ម៉ាដាហ្គាស្កា ហ្គាណា បង់ក្លាដែស និងនីហ្សេរីយ៉ា។ ក្នុងប្រទេសទាំងនេះ កុមារក្រីក្រនៅក្នុងទីក្រុង ដែលមានអាយុក្រោម៥ឆ្នាំ ប្រឈមនឹងការស្លាប់ប្រមាណ៤,៧ដងច្រើនជាងកុមារដែលកើតចេញពីគ្រួសារធូរធា។
ទោះបីជាយ៉ាងណាក៏ដោយ អង្គការ Save the Children បានកត់សម្គាល់ឃើញការវិវត្តរបស់កម្ពុជាក្នុងយុទ្ធនាគារសង្គ្រោះជីវិតកុមារក្រីក្រ ជាពិសេសការពង្រីកសេវាកម្មសុខាភិបាលជាដើម ដោយក្រៅពីរាជធានីភ្នំពេញ របស់កម្ពុជា មានក្រុងម៉ានីលរបស់ហ្វីលីពីន ក្រុង Addis Ababa របស់អេក្យូពី ក្រុងគែររបស់អេហ្ស៊ីប និងក្រុងហ្កាតេម៉ាឡា របស់ប្រទេសហ្គាតេម៉ាឡា។
ទាក់ទងនឹងស្ថានភាពមាតា «2015 Mothers’Index Rankings» កម្ពុជាស្ថិតក្នុងចំណាត់ថ្នាក់ទី១៣២ក្នុងចំណោម១៧៩ប្រទេសដោយស្ថិតនៅពីក្រោមប្រទេសបង់ក្លាដែស និងកោះSao Tome and Principe ហើយនៅពីលើប្រទេសឡេសូតូ និងហ្ស៊ីមបាវ៉េ។ ស្ថានភាពមាតានៅប្រទេសន័រវេស ហ្វាំងឡង់ អ៊ីស្លង់ ដាណឺម៉ាក និងស៊ុយអែត មានកម្រិតខុសជាងគេ រីឯប្រទេសដែលស្ថិតនៅបាតតារាង រួមមាន នីហ្សេ ម៉ាលី អាហ្វ្រិកកណ្តាល សាធារណរដ្ឋកុងហ្គោ និងសូម៉ាលី៕
© រក្សាសិទ្ធិដោយ thmeythmey.com
