ពីនេះ ពីនោះ
នៅក្នុងប្រទេសរំដួល មន្ត្រីថ្នាក់ក្រោម«ច្របាច់កគ្នាឯង»ដើម្បីផ្គាប់ចិត្តមេខាងលើ
×
វាជារឿងមួយដ៏សាមញ្ញទៅហើយដែលមន្ត្រីរាជការជាថ្នាក់ដឹកនាំស្ថាប័នមួយនៅក្នុងប្រទេសរំដួលតែងតែរិះរកមធ្យោបាយធ្វើយ៉ាងណាដើម្បីធ្វើឲ្យថ្នាក់លើពេញចិត្ត ដោយគេរំពឹងថា នឹងអាចទទួលបានគុណសម្បត្តិត្រឡប់មកវិញ ដូចជា ទទួលបានការសរសើរពីថ្នាក់លើ ការតំឡើងតួនាទីមុខតំណែង ឬក៏ទទួលបានលាភសក្ការៈផ្សេងៗជាដើម។ យ៉ាងហោចណាស់ប្រសិនបើមិនទទួលបានអ្វីសោះ ក៏ពួកគេអាចរក្សាតំណែង តួនាទីរបស់ខ្លួននៅកន្លែងដដែលបានដែរ។
ប៉ុន្តែទន្ទឹមនឹងការបំពេញចិត្តថ្នាក់លើ មន្ត្រីគ្រប់គ្រងភាគច្រើននៅក្នុងប្រទេសរំដួល បែរជាមកច្របាច់កថ្នាក់ក្រោមរបស់ខ្លួន ដើម្បីសម្រេចការងារ ឬ បេសកកម្មផ្សេងៗដែលថ្នាក់លើបានដាក់ឲ្យទៅវិញ។ លើសពីនេះទៅទៀតមានពេលខ្លះ មិនត្រឹមតែច្របាច់ករឿងការងារនោះទេ ថែមទាំងមកដាក់ផែនការរៃអង្គាសប្រាក់ ដើម្បីយកទៅសូកប៉ាន់ផ្គាប់ចិត្តថ្នាក់លើ ដើម្បីមុខមាត់របស់ខ្លួនទៅវិញ។
និយាយពីរឿងការងារ ថ្នាក់ដឹកនាំស្ថាប័នខ្លះយកលេសថា ជាផែនការ ឬបទបញ្ជាមកពីថ្នាក់លើ គឺត្រូវតែធ្វើឲ្យទាន់ពេលវេលា ដោយមិនខ្វល់ថា តើមន្ត្រីថ្នាក់ក្រោម មានបញ្ហាអ្វីខ្លះក្នុងការអនុវត្តកិច្ចការ ឬមានសម្ភារប្រើប្រាស់គ្រប់គ្រាន់ សម្រាប់បម្រើឲ្យការងារនោះឬក៏អត់ទេ។ ពេលខ្លះថ្នាក់លើមិនបានដាក់បទបញ្ជាផង ប៉ុន្តែដោយសារតែចង់យកចិត្ត ឬបង្ហាញស្នាដៃឲ្យថ្នាក់លើបានឃើញ ថ្នាក់ដឹកនាំស្ថាប័នខ្លះត្រូវកុហកមន្ត្រីថ្នាក់ក្រោមថា ជាបញ្ជាថ្នាក់លើដាក់ឲ្យដែរ ដើម្បីសម្រេចតាមផែនការនេះ ផែនការនោះ ហើយយកទៅរាយការណ៍ដល់ថ្នាក់លើ ដើម្បីយកមុខ យកមាត់។
ដោយឡែក បើនិយាយពីរឿងរៃអង្គាសលុយថ្នាក់ក្រោម ដើម្បីយកទៅផ្គាប់ចិត្តថ្នាក់លើវិញ វាគឺជារឿងដែលថ្នាក់ដឹកនាំស្ថាប័ននៅក្នុងប្រទេសរំដួល ចូលចិត្តយកមកប្រើនៅក្នុងឱកាសផ្សេងៗផងដែរ ដូចជា នៅពេលមេចុះទៅកន្លែងនេះ ចុះទៅកន្លែងនោះ ថ្ងៃខួបកំណើតរបស់មេ ខួបកំណើតក្រុមគ្រួសាររបស់មេ កម្មវិធីប្រចាំឆ្នាំផ្សេងៗជាដើម។
ទាំងនេះគឺជារបៀបធ្វើការរបស់មន្ត្រីរាជការនៅក្នុងប្រទេសរំដួល ដែលមានតែជំនាញខាងយកចិត្ត វ៉ៃអែបស៊ីអប សូកប៉ាន់ និងធ្វើអ្វីគ្រប់បែបយ៉ាងដើម្បីរក្សាតំណែងរបស់ខ្លួន។ បញ្ហាទាំងនេះបានក្លាយជាបរិបទសង្គមមួយនៅក្នុងប្រទេសរំដួល ដែលមន្ត្រីណាក៏ដូចមន្ត្រីណាដែរ គឺសុទ្ធតែចេះវិធីនេះស្ទើរគ្រប់គ្នាទៅហើយ៕
© រក្សាសិទ្ធិដោយ thmeythmey.com