ជាតិ
បទយកការណ៍ / បទសម្ភាសន៍
យុវជនកម្ពុជាគួរប្តូរពីជេរវៀតណាមមកអភិវឌ្ឍខ្លួន ដើម្បីកសាងប្រទេសឲ្យឈ្នះវៀតណាម!
×
ពីមួយឆ្នាំទៅមួយឆ្នាំចលនានៃការស្អប់ខ្ពើមជនជាតិវៀតណាម កាន់តែច្រើនឡើងនៅក្នុងស្រទាប់យុវជនខ្មែរ។ នៅតាមបណ្តាញផ្សព្វផ្សាយខ្លះ ជាពិសេសគឺបណ្តាញសង្គមហ្វ៊េសប៊ុកតែម្តង ជាញឹកញាប់គេតែងតែឮពាក្យសម្តីឆ្លងឆ្លើយជេរប្រមាថគ្នារវាងពលរដ្ឋខ្មែរ និងជនមួយចំនួនដែលនិយាយតិះដៀលពលរដ្ឋខ្មែរជាភាសាខ្មែរ ដែលគេជឿថា អ្នកនោះ ជាជនជាតិវៀតណាមរស់នៅលើទឹកដីកម្ពុជា។ លោក អ៊ូ វីរៈ បានបង្ហាញក្តីបារម្ភយ៉ាងខ្លាំងចំពោះយុវជន និងអ្នកនយោបាយខ្មែរមួយចំនួន ដែលកំពុងលុងខ្លួនគិតតែចងកំហឹងជេរប្រមាថជនជាតិវៀតណាម ដោយមិនគិតអភវិឌ្ឍន៍ខ្លួន ។ «ពិតណាស់ ខ្មែរយើងជាអ្នករងគ្រោះ ដោយសារវៀតណាមឆក់យកដីខ្មែរ ដូចជាទឹកដីកម្ពុជាក្រោមជាដើម ។ យើងសមនឹងឈឺចាប់ ហើយខឹងនឹងជាតិសាសន៍នេះ តែយើងគ្មានអ្វីក្រៅពីការខំប្រឹងអភិវឌ្ឍខ្លួន ដើម្បីឲ្យខ្លាំងជាងវៀតណាម » ។ ទាំងអស់នេះ ជាការអះអាងរបស់លោក អ៊ូ វីរៈ អ្នកវិភាគនយោបាយ និងជាអ្នកប្រឆាំងនឹងការរើសអើងពូជសាសន៍ នៅក្នុងបទសម្ភាសន៍ជាមួយការីនិពន្ធនៃសារព័ត៌មានថ្មីៗ លោក ជា ធីរិទ្ធ ។
លោក ជា ធីរិទ្ធ ៖ លោក អ៊ូ វីរៈ លោកជាអ្នកតាមដានស្ថានការណ៍នយោបាយម្នាក់ ប្រាកដជាបានដឹងហើយថា ចលនានៃការជេរប្រទេចជនជាតិវៀតណាម ពោលគឺការរើងអើងចំពោះពូជសាសន៍មួយនេះកាន់តែរីករាលដាលឡើងនៅក្នុងស្រទាប់យុវជន និងអ្នកនយោបាយខ្មែរ ។ វីដេអូ ជេរប្រមាថគ្នាទៅវិញទៅមកដែលស្គាល់ថា ជនជាតិវៀតណាម និងជនជាតិខ្មែរនោះ ត្រូវបានគេបង្ហោះនៅតាមបណ្តាញសង្គមហ្វេសប៊ុកជាញឹកញាប់។ ពេលខ្លះទៀត ទោះបីជាជននោះ ជាជនជាតិខ្មែរក្តី តែនៅពេលគេស្អប់គេចោទថា ជាជាតិ «យួន» ។ ជាបឋម ខ្ញុំចង់ឲ្យលោកអត្ថាធិប្បាយសង្ខេបពីឫសគល់ដែលនាំឲ្យមានការរើសអើងជនជាតិមួយនេះ ?
លោ អ៊ូ វីរៈ ៖តាមពិតទៅបញ្ហានេះ វាចេញមកពីប្រវត្តិសាស្ត្រ ដែលវៀតណាមឈ្លានពានទឹកដីខ្មែរយើង ដូចជាយកដីកម្ពុជាក្រោម និងសម្លាប់អ្នកស្នេហាជាតិខ្មែរជាច្រើនកាលពីអតីតកាល ជាពិសេសគឺការហូរចូលជនជាតិវៀតណាមខុសច្បាប់មករស់នៅកម្ពុជា ទើបធ្វើឲ្យពលរដ្ឋខ្មែរជាពោលគឺយុវជនចងទុកក្នុងចិត្តជានិច្ចស្អប់ខ្ពើមជាតិសាសន៍វៀតណាម។ ម្យ៉ាងទៀត ពេលខ្លះអ្នកនយោបាយខ្មែរក៏ឆ្លៀតកេងចំណេញនយោបាយបក្សខ្លួនដែរ ដោយវាយប្រហារគណបក្សប្រជាជនកម្ពុជា ទើបចលនានៃការរើសអើងជនជាតិវៀតណាមនេះកាន់តែច្រើនឡើង។ ពីព្រោះថា ក្រោយឆ្នាំ ១៩៧៩ រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា គឺលើកបន្តុកឡើងដោយវៀតណាម ហើយរូបភាពនេះធ្វើឲ្យគណបក្សប្រជាជនកម្ពុជា ពិបាកលុបចោលនូវស្នាមមិនល្អនេះ ។ CPP មានដំបៅនេះ អ្នកនយោបាយ និងអ្នកគាំទ្រ CNRP តាមរុកឆ្កៀល ដើម្បីផលប្រយោជន៍នយោបាយ ឬដើម្បីបន្ធូរកំហឹងរបស់ពួកគេ ។ ម្លោះហើយ ទើបចលនាជេរប្រមាថជនជាតិវៀតណាមកាន់តែច្រើនឡើង។
លោក ជា ធីរិទ្ធ ៖ ប្រសិនបើចលនារើសអើងជនជាតិវៀតណាម កាន់តែច្រើនឡើងនៅកម្ពុជា តើលោកមានក្តីបារម្ភថា ពេលណាមួយអំពើហិង្សាទ្រង់ទ្រាយធំរវាងខ្មែរ និងជនជាតិវៀតណាមនៅលើទឹកដីកម្ពុជាអាចកើតឡើងទេ? ហើយវានឹងផ្តល់ផលពិបាកអ្វីខ្លះសម្រាប់កម្ពុជា?
លោក អ៊ូ វីរៈ ៖ ជាការពិតបើនៅតែបែបនេះ ថ្ងៃណាមួយអំពើហិង្សារវាងជនជាតិខ្មែរ និងវៀតណាមនឹងកើតឡើងលើទឹកដីកម្ពុជា ។ ហើយខ្ញុំសូមបញ្ជាក់ថា ការជេរប្រមាថគ្នាជាភាសារខ្មែរ ធ្វើឡើងនៅលើទឹកដីខ្មែរ មានន័យថា ជនជាតិវៀតណាមរស់នៅកម្ពុជាបច្ចុប្បន្ន។ ប្រសិនបើអំពើហិង្សាកើតឡើង គឺកើតនៅកម្ពុជា ហើយកម្ពុជាអ្នកខាតបង់ ទាំងសេដ្ឋកិច្ច ទាំងធនធានមនុស្ស និងកិត្តិយសលើឆាកអន្តរជាតិ ។ តែវៀតណាមមិនមែនមកខាតបង់ជាមួយកម្ពុជាទេ ជនជាតិវៀតណាមនៅហាណូយ នៅហូជីមីញ គេទៅមុខ គេអភិវឌ្ឍប្រទេសគេដល់ណាបាត់ហើយ ។ គេមិនមកឈ្លោះជាមួយខ្មែរទេ គេទុកពលរដ្ឋគេដែលនៅកម្ពុជាឈ្លោះចុះ ។ ដូច្នេះហើយ បានជាខ្ញុំគិតថា យុវជន និងអ្នកនយោបាយខ្មែរគួរគិតឡើងវិញពីបញ្ហានេះ។
លោក ជា ធីរិទ្ធ៖ លោកឲ្យអ្នកនយោបាយ ឲ្យយុវជនគិតឡើងវិញចំពោះបញ្ហានេះ មានន័យថា ឲ្យពួកគាត់ប្តូរឥរិយាបថដែលជេរ ចងកំហឹងជាមួយវៀតណាមនេះចោលមែនទេ? ហើយប្តូរ តើពួកគាត់គួរតែធ្វើដូចម្តេចវិញ?
លោក អ៊ូ វីរៈ ៖ ខ្ញុំសូមបញ្ជាក់ថា វាជាការពិតហើយថា ពលរដ្ឋខ្មែរ យើងជាអ្នករគ្រោះ ដោយសារវៀតណាមឆក់យកដីខ្មែរ ដូចជាទឹកដីកម្ពុជាក្រោមជាដើម ។ យើងសមនឹងឈឺចាប់ ហើយខឹងនឹងជាតិសាសន៍នេះ តែយើងគ្មានអ្វីក្រៅពីការខំប្រឹងអភិវឌ្ឍខ្លួន ដើម្បីឲ្យខ្លាំងជាងវៀតណាម ។ យើងត្រូវបំលែងកំហឹងនោះ ។យើងខឹងវៀតណាម ដែលធ្លាប់ឈ្លានពានដីយើង ប្រមាថមើលងាយយើង ត្រូវពង្រឹងសមត្ថភាពខ្លួនឲ្យលើសវៀតណាម ឲ្យខ្លាំងជាងវៀតណាម ទើបជាការត្រឹមត្រូវ ។ បើយើងគិតតែខឹងវៀតណាម ហើយយុវជន អ្នកនយោបាយខ្លះ គ្មានធ្វើអ្វីមានប្រយោជន៍សោះ គួរឲ្យខ្មាសវៀតណាមណាស់ ដែលប្រទេសគេជឿនលឿនទៅមុខរាល់ថ្ងៃ៕
© រក្សាសិទ្ធិដោយ thmeythmey.com