អន្តរជាតិ
រដ្ឋមន្ត្រីការពារជាតិកូរ៉េខាងជើងត្រូវបានប្រហារជីវិតដោយកាំភ្លើងបាញ់យន្តហោះ ព្រោះងោកពេលប្រជុំ
× រដ្ឋាភិបាលក្រុងព្យុងយ៉ាង បានកាត់ទោសប្រហារជីវិតរដ្ឋមន្ត្រីការពារជាតិរបស់ខ្លួនជាសាធារណៈដោយប្រើប្រាស់កាំភ្លើងប្រឆាំងយន្តហោះដោយសារមិនគោរពលោក។ ការប្រហារជីវិតរដ្ឋមន្ត្រីរូបនេះ កើតឡើងក្រោយបានរកឃើញថាលោករដ្ឋមន្ត្រីការពារជាតិរូបនេះបានងោកដោយសារងងុយដេក ខណៈពេលដែលមេដឹកនាំកំពូលកូរ៉េខាងជើងលោកគីមជុងអ៊ុនកំពុងណែនាំដល់មន្ត្រីរបស់ខ្លួននៅក្នុងកិច្ចប្រជុំ។
បើយោងតាមសារពត៌មានកូរ៉េខាងត្បូង Yonhap លោករដ្ឋមន្ត្រីការពារជាតិកូរ៉េខាងជើងលោក Hyon Yong Chol ត្រូវបានប្រហារជិវិតជាសាធារណៈដោយការបាញ់កាំភ្លើងប្រឆាំងយន្តហោះកាលពីថ្ងៃទី៣០ខែមេសាកន្លងទៅនេះ។ ការប្រហារជីវិតលោករដ្ឋមន្ត្រីរូបនេះធ្វើឡើងក្រោយពីរកគេឃើញថា លោកបានងោកព្រោះងងុយ នៅក្នុងកិច្ចប្រជុំកំពូលយោធានិងមិនស្តាប់តាមការណែនាំរបស់លោកគីមនេះជុងអ៊ុនដែលសកម្មភាពត្រូវបានចាត់ទុកថាជាអំពើក្បត់ជាតិ។
ការប្រហារជីវិតនេះដែរត្រូវបានធ្វើឡើងនៅក្នុងសាលាយោធាក្រុងព្យុងយ៉ាង ខណៈដែលមានការចូលរួមពីយោធាជាច្រើនរយនាក់ផងដែរ ដើម្បីជាគំរូដល់មន្ត្រីផ្សេងទៀតកុំឲ្យយកតម្រាប់តាមសកម្មភាពដ៏អាក្រក់នេះ។ យ៉ាងណាក៏ដោយ ព័ត៌មានជុំវិញការប្រហារជីវិតនេះ ត្រូវបានផ្តល់ឲ្យដោយក្រុមចារកម្មកូរ៉េខាងត្បូងប៉ុណ្ណោះ។ គេមិនទាន់អាចសន្និដ្ឋានបាន ១០០ភាគរយនៅឡើយទេថា ជារឿងពិតឬយ៉ាងណា។
គួររម្លឹកផងដែរ ការប្រហារជីវិតរដ្ឋមន្ត្រីរូបនេះមិនមែនជាលើកដំបូងនោះទេដែលត្រូវបានធ្វើឡើងដោយរដ្ឋាភិបាលក្រុងព្យុងយ៉ាង។ជាក់ស្តែងកាលពីពេលកន្លងទៅនេះ មន្ត្រីជាន់ខ្ពស់ជាច្រើននាក់រាប់បញ្ចូលទាំងពូរបស់ខ្លួនលោក Chang Song-thaek ក៏ត្រូវបានប្រហារជិវិតពីបទក្បត់ជាតិផងដែរ៕
© រក្សាសិទ្ធិដោយ thmeythmey.com