ជាតិ
ទិវាមាតា៖ បុរសៗចិនប្រកួតទ្រាំនឹងកម្រិតឈឺចាប់ដើម្បីដឹងពីការឈឺចាប់របស់ម្ដាយពេលឈឺពោះឆ្លងទន្លេ
×
ដើម្បីអបអរទិវាមាតា បុរសៗនៅក្នុងប្រទេសចិន បានចូលរួមក្នុងការប្រកួតប្រជែងក្នុងកម្មវិធីរទស្សន៍មួយ ដែលតម្រូវឲ្យបេក្ខជនត្រូវឆ្លងកាត់ម៉ាស៊ីនកម្រិតភាពឈឺចាប់ ដើម្បីឲ្យពួកគេអាចដឹងពីភាពឈឺចាប់ និងការលំបាក នៅក្នុងពេលម្ដាយគ្រប់រូបផ្តល់កំណើតឲ្យកូន។ នេះបើយោងតាមការផ្សាយរបស់ទូរទស្សន៍មជ្ឈឹមចិន CCTV ។
កម្មវិធីដែលផ្សាយតាមទូរទស្សន៍ជាពិសេសនេះ គឺបានធ្វើឡើងនៅក្នុងទីក្រុង Nanchang ខេត្ត Jiangxi ភាគនិរតីប្រទេសចិនហើយកម្មវិធីនេះមានគោលបំណងឲ្យបុរសៗ ត្រូវស៊ូទ្រាំនឹងការឈឺចាប់ ដោយយ៉ាងហោចណាស់ក៏មានកម្រិតស្មើនឹង កម្រិតឈឺចាប់របស់ស្ត្រីពេលឆ្លងទន្លេដែរ ដើម្បីអបអរទិវាមាតា។
នៅក្នុងកម្មវិធីនេះមានបុរស ២០នាក់ បានចុះឈ្មោះចូលប្រកួតប្រជែងដោយរួមបញ្ចូលទាំងអ្នកជំនាញផ្នែកចិត្តរឹងដូចជាក្រុមអ្នកពន្លត់អគ្គិភ័យនិងកីឡាករប្រដាល់ ជាដើម ដែលពួកគេសុទ្ធតែបានឆ្លងកាត់ភារកិច្ចនៃភាពឈឺចាប់។ការប្រកួតប្រជែងគ្នា គឺត្រូវយកពោះរបស់ពួកគេបានភ្ជាប់ទៅនឹងម៉ាស៊ីនដែលមានបំពាក់ខ្សែភ្លើងសម្រាប់ឆក់ ដើម្បីបង្កើតកម្រិតឈឺចាប់សិប្បនិម្មិត។
អ្នកឈ្នះនៃការប្រកួតប្រជែងនេះ គឺបានទៅលើអ្នកពន្លត់អគ្គិភ័យម្នាក់ ដែលអាចទ្រាំនឹងកម្រិតឈឺចាប់នៃម៉ាស៊ីនឆក់រហូតដល់ ៨០ វិនាទី។ប៉ុន្តែទោះជាមយ៉ាងណា ការប្រកួតនេះគឺមានរយៈពេលខ្លីណាស់ បើធៀបនឹងការឈឺចាប់របស់ស្ត្រីពេលឈឺពោះបង្កើតកូន ព្រោះថាការឈឺពោះអាចមានរយៈពេលច្រើនម៉ោងឬអាចដល់មួយថ្ងៃក៏មាន។តែបើយោងតាមអ្នករៀបចំការប្រកួតប្រជែងនេះគឺពួកគេធ្វើវាឡើងដើម្បីរំលឹកមនុស្សម្នាឲ្យស្គាល់ពីកម្រិតឈឺចាប់របស់ម្តាយក្នុងពេលឆ្លងទន្លេ៕
© រក្សាសិទ្ធិដោយ thmeythmey.com