ជាតិ
សង្គមជាតិ
គ្រួសារសពជនរងគ្រោះទាមទារសំណងជាង ៣ម៉ឺនដុល្លារ ករណីបាញ់ពលរដ្ឋខ្មែរស្លាប់នៅថៃ
×![]()
ភ្នំពេញ៖ គ្រួសារសពជនរងគ្រោះ ទាមទារសំណងជាង ៣ម៉ឺនដុល្លារអាមេរិក ករណីថៅកែជនជាតិថៃបាញ់ពលរដ្ឋខ្មែរម្នាក់ នៅក្នុងខេត្តឆាក់ឆឺនសៅ ប្រទេសថៃកន្លងមក។ សំណុំរឿងនេះ កំពុងស្ថិតក្នុងដៃរបស់តុលាការថៃនៅឡើយ។ ជុំវិញបញ្ហានេះ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង បានឲ្យដឹងថា បច្ចុប្បន្ននេះ អាជ្ញាធរទូតកម្ពុជា បាននឹងកំពុងសហការជាមួយភាគីថៃ ក្នុងការរៀបចំឲ្យភាគីគ្រួសារសពជនរងគ្រោះដាក់ពាក្យបណ្តឹងទាមទារសំណងរដ្ឋប្បវេណីផងដែរ។
គ្រួសារសពជនរងគ្រោះ ដែលត្រូវបានថៅកែជនជាតិថៃបាញ់សម្លាប់ កាលពីថ្ងៃទី ២៣ មេសានោះ កំពុងទាមទារសំណងជំងឺចិត្តពីជនល្មើសនៅឡើយ។ ប៉ុន្តែ ភាគីគ្រួសារជនរងគ្រោះ អះអាងថា ពួកគេពុំទាន់ទទួលបានព័ត៌មានឆ្លើយតបណាមួយ ពីសំណាក់អាជ្ញាធរទូតភាគី ទាំងពីរនោះទេ។
លោក ប៉ែន សុផល ត្រូវជាបងថ្លៃសពជនរងគ្រោះ បានប្រាប់សារព័ត៌មានថ្មីៗតាមរយៈទូរសព្ទ ថា មកទល់ពេលនេះ គ្រួសារជនរងគ្រោះកំពុងស្វែងរកជំនួយពីសំណាក់អាជ្ញាធរ ដើម្បីរៀបចំបណ្តឹងទាមទារសំណង។
បុរសវ័យ ៥៥ឆ្នាំ ដែលមានតួនាទីជាសមាជិកក្រុមប្រឹក្សាឃុំអូបីជាន់ ខេត្តបន្ទាយមានជ័យ រូបនេះ ប្រាប់ថា៖«ប្អូនស្រីខ្ញុំទាមទារសំណងរដ្ឋប្បវេណីជាង ៣ម៉ឺនដុល្លារ ប៉ុន្តែមកទល់ពេល នេះ យើងពុំមានដំណឹងពីអាជ្ញាធរទូតនៃប្រទេសទាំងពីរទេ។ ខ្ញុំសូមអំពាវនាវដល់អាជ្ញាធរទូត ខ្មែរជួយពន្លឿនរឿងនេះផង»។
ទាក់ទិននឹងបញ្ហានេះ អ្នកនាំពាក្យក្រសួងការបរទេស កុយ គួង បានឲ្យដឹងថា អាជ្ញាធរទូតកម្ពុជា កំពុងសហការជាមួយអាជ្ញាធរថៃ ក្នុងករណីមនុស្សឃាតរនេះ ដោយអាជ្ញាធរប្រទេសទាំងពីរ កំពុងជួយរៀបចំឯកសារដល់តុលាការថៃ។ ហើយថា កន្លងមក អាជ្ញាធរបានទាក់ទង ទៅគ្រួសារសពជនរងគ្រោះ ដើម្បីរៀបចំឯកសារទាមទារសំណងដែរ តែគ្រួសារភាគី ជនរងគ្រោះថា រង់ចាំរៀបចំពិធីបុណ្យតាមប្រពៃណីរួចរាល់សិន។
លោកបញ្ជាក់បញ្ហានេះថា៖«យើងនឹងទាក់ទងព័ត៌មានទៅអាជ្ញាធរទូតខ្មែរប្រចាំប្រទេសថៃបន្ថែមទៀត ដើម្បីឲ្យភាគីជនរងគ្រោះ ដាក់ពាក្យទាមទារសំណងនេះ»។
បើតាមអ្នកនាំពាក្យ ថៅកែជនជាតិថៃរូបនោះ បានស្នើរតម្កល់លុយចំនួន ៦០ ម៉ឺនបាត ស្មើរនឹងប្រមាណ ២ម៉ឺនដុល្លារអាមេរិក ដើម្បីធានានៅក្រៅឃុំផងដែរ។ ទោះជាយ៉ាងណា លោកបញ្ជាក់ថា ក្រសួងការបរទេសកម្ពុជានៅតែទាមទារតុលាការថៃ យកជនល្មើសនោះ ទៅដាក់ទោសតាមច្បាប់ដដែល។
គួររម្លឹកថា កាលពីថ្ងៃទី ២៣ មេសាកន្លងមក ពលករខ្មែរម្នាក់ឈ្មោះ ផាត សុអ៊ិន អាយុ២៤ឆ្នាំ មានស្រុកកំណើតក្នុងស្រុកបរិបូណ៍ ខេត្តកំពង់ឆ្នាំង ត្រូវបានមេកាថៃម្នាក់ ឈ្មោះ តា យ៉ៃ បាញ់សម្លាប់ នៅឃុំបានសុង ស្រុកភ្នំសារខាម ខេត្តឆាក់ឆឺនសៅ ប្រទេសថៃ ព្រោះតែខឹងនឹងជនរងគ្រោះ លេងជាមួយក្មេងភូមា បណ្តាលឱ្យឪពុករបស់ក្មេងខឹង ប្តឹងដល់លោកមេការ៕
© រក្សាសិទ្ធិដោយ thmeythmey.com
