ជាតិ
នយោបាយជាតិ
លោក សម រង្ស៊ី ៖ បញ្ហាព្រំដែនជាប្រធានបទសំខាន់ក្នុងវប្បធម៌សន្ទនាជាមួយលោក ហ៊ុន សែន
×![]()
ដោយ: ធឿន បញ្ញាឬទិ្ធ
ប្រធានគណបក្សសង្គ្រោះជាតិលោក សម រង្ស៊ី មានប្រសាសន៍ថា បញ្ហាព្រំដែន និងបូរណភាពទឹកដី គឺជាបញ្ហាចម្បងរបស់ជាតិ ដែលលោកត្រូវលើកយកបញ្ហានេះ ទៅពិភាក្សាជាមួយលោកនាយករដ្ឋមន្ត្រី ហ៊ុន សែន។
ក្នុងដំណើរទស្សនកិច្ចជួបជាមួយអ្នកគាំទ្ររបស់ខ្លួននៅក្រៅប្រទេសរយៈពេលមួយខែនោះលោក សម រង្ស៊ី បានបន្ថែមថា នៅពេលលោកត្រឡប់មកកាន់ប្រទេសកម្ពុជាវិញ រូបលោកនឹងលើកយកប្រធានបទទាក់ទងនឹងបញ្ហាព្រំដែន ទៅពិភាក្សាជាមួយលោក ហ៊ុន សែន តាមរយៈវប្បធម៌សន្ទនា ក្នុងដំណើរការដោះស្រាយបញ្ហាជាតិ។
ថ្លែងនៅក្នុងកិច្ចសម្ភាសជាមួយវិទ្យុអាស៊ីសេរី កាលពីថ្ងៃទី១៤ឧសភាម្សិលមិញ ដៃគូរសន្ទនាជាមួយរដ្ឋាភិបាល តំណាងឲ្យក្រុមមតិភាគតិចក្នុងរដ្ឋសភា លោក សម រង្ស៊ី បានបញ្ជាក់យ៉ាងដូច្នេះថា ៖«ប្រធានបទនៃការសន្ទនា គឺជាបញ្ហាជាតិ បញ្ហាព្រំដែន បញ្ហាបូរណភាពទឹកដីគឺបញ្ហាអាយុជីវិតជាតិ ដូច្នេះ ច្បាស់ជាយករឿងព្រំដែនជាប្រធានបទមួយដ៏សំខាន់ក្នុងការសន្ទនា ដើម្បីអនុវត្តវប្បធម៌សន្ទនាហ្នឹង» ។
លោក សម រង្ស៊ី គ្រោងនឹងជួបពិភាក្សាជាមួយលោក ហ៊ុន សែន ដើម្បីពិភាក្សាពីបញ្ហាព្រំដែននេះ គឺធ្វើឡើងក្រោយពីមានបញ្ហាកើតឡើងកាលពីពេលថ្មីៗនេះ ក្នុងករណីវៀតណាមចូលបាញ់ថ្មាំពុលបំផ្លាញដំណាំពលរដ្ឋខ្មែរនៅខេត្តត្បូងឃ្មុំ។ ករណីវៀតណាមបានធ្វើផ្លូវចូលដីខ្មែរជិត៥០គីឡូម៉ែត្រ នៅឃុំដាក់ដាំ ស្រុកអូរាំង ខេត្តមណ្ឌលគិរីជាដើម។
ចំពោះបញ្ហាព្រំដែននេះ តំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ ក៏គ្រោងដាក់ញត្តិអញ្ជើញមន្ត្រីពាក់ព័ន្ធនឹងទទួលខុសត្រូវព្រំដែន ឲ្យចូលខ្លួនបំភ្លឺបកស្រាយពីបញ្ហាខ្សែបន្ទាត់ព្រំដែន នៅក្នុងកិច្ចប្រជុំពេញអង្គក្នុងរដ្ឋសភាដែរ៕
© រក្សាសិទ្ធិដោយ thmeythmey.com
