ជាតិ
សង្គមជាតិ
បង់មួយថ្ងៃ២០០០រៀល អាចសិក្សាថ្នាក់ឧត្តមសិក្សាបាននៅសាលាលោក សុខ ទូច
×
សកលវិទ្យាធិការនៃសកលវិទ្យាល័យខេមរៈ លោក សុខ ទូច មានប្រសាសន៍ថា ការបើកវគ្គបង់ថ្លៃ២០០០រៀលក្នុងមួយថ្ងៃ គឺដើម្បីលើកកម្ពស់ការអប់រំ និងផ្ដល់ឱកាសឲ្យនិស្សិតក្រីក្រ ឬ ពុំមានលទ្ធភាពគ្រប់គ្រាន់ ឲ្យទទួលបានការអប់រំដូចនិស្សិតដែលមានលទ្ធភាពដទៃទៀត ។ សាកលវិទ្យាល័យខេមរៈផ្ដល់ឱកាសឲ្យនិស្សិតសិក្សាគ្រប់មុខវិជ្ជា ដោយបង់ថវិការត្រឹមតែ២០០០រៀលប៉ុណ្ណោះ សម្រាប់វគ្គសិក្សាថ្នាក់ឧត្តមសិក្សា នៅឆ្នាំក្រោយនេះ។
លោក សុខ ទូច បានបញ្ជាក់បន្ថែមថា ចំពោះនិស្សិតបង់ថ្លៃ២០០០រៀលក្នុងមួយថ្ងៃ និងនិស្សិតមានលទ្ធភាពបង់ថ្លៃសិក្សាពេញប្រចាំឆ្នាំ គឺអាចទទួលបានការអប់រំខ្ពស់ និងគុណភាពដូចគ្នា ពោលគឺបានន័យថាសាស្ត្រាចារ្យដែលមកបង្រៀនដល់និស្សិត ជាគ្រូបង្រៀនតាមមុខវិជ្ជានីមួយៗនៃសកលវិទ្យាល័យខេមរៈ មិនមែនជាគ្រូបង្រៀនតាមតម្លៃសិក្សានោះទេ«តម្លៃ២០០០រៀលនេះ និងតម្លៃជាង៣០០ដុល្លារ ៤០០ដុល្លារ ឬ៥០០ដុល្លារ គឺជាគ្រូដូចគ្នា គ្រូតែមួយ។ អ្នកបង់២០០០រៀល ក៏គ្រូបង្រៀនម្នាក់ហ្នឹង អ្នកបង់ជាង៣០០ដុល្លារក៏គ្រូជាបង្រៀនម្នាក់ហ្នឹង។ ខ្ញុំចង់ឲ្យសិស្សគ្មានបង់ពេញទទួលបានការអប់រំដូចគេដែរ។ ហើយតម្លៃបង់២០០០រៀលនេះ គឺអាចផ្ដល់ជូនរយៈពេល២ឆ្នាំសម្រាប់សិស្ស។ តែបើពួកគេនៅតែមិនមានលទ្ធភាពយើងនឹងឲ្យពួកគេបន្ដបង់២០០០រៀលរហូតដល់បួនឆ្នាំ។ នេះជាការបញ្ជាក់របស់លោក សុខ ទូច។
លោក សុខ ទូច បន្ថែមថា ការចូលមកសិក្សាបង់ថ្លៃ២០០០រៀលក្នុងមួយថ្ងៃនេះ សកលវិទ្យាល័យរបស់លោក មិនមានការកំណត់ចំនួនសិស្សនោះទេ។ ហើយថ្លៃ២០០០រៀលនេះ គឺសិស្សអាចសិក្សាបានពីថ្ងៃ ចន្ទ ដល់ថ្ងៃសុក្រ។ ចំណែកថ្ងៃចុងសប្ដាហ៍សម្រាប់សិស្សបង់ពេញថ្លៃ។
កាលពីឆ្នាំ២០១០ សកលវិទ្យាល័យខេមរៈនេះ ក៏ធ្លាប់បានបើកវគ្គបង់ថ្លៃសិក្សា២០០០រៀលក្នុងមួយថ្ងៃជូនដល់សិស្ស និស្សិត ដែលខ្វះខាតផងដែរ សម្រាប់ទទួលបានការអប់រំតាមជំនាញនីមួយៗ ដែលពួកគេចង់សិក្សា ដោយការណ៍ណោះមានសិស្សជិត១ពាន់នាក់ បង់ថ្លៃអប់រំ២០០០រៀលនេះ«យើងបើកតែម្ដង ម្កាលតែប៉ុណ្ណោះ គឺមួយឆ្នាំឲ្យសិស្សបង់ថ្លៃពេញគ្រប់ជំនាញ និងមួយឆ្នាំយើងផ្ដល់វគ្គបង់ថ្លៃ២០០០រៀលក្នុងមួយថ្ងៃសម្រាប់សិស្ស។ យើងមិនផ្ដល់ជូនបែបនេះជារៀងរាល់ឆ្នាំបានទេ(សាលាអាចក្ស័យធន)។ គឺយើងមើលតាមបរិបទសេដ្ឋកិច្ចស្រុកខ្មែរយើង»។ នេះជាការរៀបរាប់របស់លោក សុខ ទូច៕
© រក្សាសិទ្ធិដោយ thmeythmey.com