ជាតិ
អ្នករាយការណ៍ពិសេសUN ផ្នែកសិទ្ធិមនុស្សថ្មី មកបំពេញទស្សនកិច្ចកម្ពុជាលើកដំបូងនៅថ្ងៃចន្ទ
× អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា លោកស្រី Rhona K.M. Smith នឹងមកបំពេញទស្សនកិច្ចផ្លូវការនៅប្រទេសកម្ពុជាលើកដំបូងរយៈពេល ៥ ថ្ងៃ ចាប់ពីថ្ងៃចន្ទទី ១៨ ខែឧសភា ខាងមុខនេះតទៅ ។ លោកស្រីបណ្ឌិត Smith សាស្ត្រចារ្យផ្នែកសិទ្ធិមនុស្សអន្តរជាតិ និងច្បាប់នៃសាកលវិទ្យាល័យ Northumbriaចក្រភពអង់គ្លេស និងសាកលវិទ្យាល័យជាច្រើនទៀត ត្រូវបានតែងតាំងជាអ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុស្សនៅកម្ពុជាកាលពីខែមីនា ដើម្បីជំនួសតំណែងសាស្ត្រាចារ្យច្បាប់នេប៉ាល់ លោក សូរិយា ប្រាសាទ ស៊ូប៊ែរឌី។
បើយោងតាមសេចក្តីប្រកាសព័ត៌មានរបស់ការិយាល័យឧត្តមស្នងការសិទ្ធិមនុស្សអង្គការសហប្រជាជាតិប្រចាំនៅកម្ពុជា កាលពីពេលថ្មីៗនេះក្នុងពេលបំពេញបេសកម្មនៅកម្ពុជា លោកស្រី Rhona K.M. Smith នឹងពិនិត្យមើលអំពីស្ថានភាពសិទ្ធិមនុស្សនៅក្នុងប្រទេសកម្ពុជា ហើយលោកស្រី គ្រោងនឹងជួបពិភាក្សាជាមួយមន្ត្រីរដ្ឋាភិបាល និងមន្ត្រីអង្គការសង្គមស៊ីវិលមួយចំនួន អំពីស្ថានភាពនៃការគោរពសិទ្ធិមនុស្សនៅកម្ពុជា៕
លោកស្រី Smith អាយុ៤៥ឆ្នាំ ត្រូវបានតែងតាំងជាផ្លូវការនាពិធីបិទមហាសន្និបាតក្រុមប្រឹក្សាសិទ្ធិមនុស្សលើកទី២៨នៃអង្គការសហប្រជាជាតិកាលពីថ្ងៃសុក្រ ទី២៧ ខែមីនាកន្លងមក នៅក្នុងទីក្រុងហ្សឺណែវ ប្រទេសស្វ៊ីស។ លោកស្រីក៏ធ្លាប់មកធ្វើបទបង្ហាញផ្នែកសិទ្ធិមនុស្សនៅសាកលវិទ្យាល័យបញ្ញាសាស្ត្រកម្ពុជាផងដែរ។
បើគិតចាប់តាំងពីឆ្នាំ១៩៩៣មក លោកស្រី Smith គឺជាបុគ្គលទី៦របស់អង្គការសហប្រជាជាតិដែលទទួលបន្ទុករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា ហើយលោកស្រីក៏ជាស្ត្រីទីមួយផងដែរ។ លោកស្រីបន្តតំណែងពីលោក ស៊ូប៊ែរឌី ក្រោយពីលោកបញ្ចប់អណត្តិរយៈពេល៦ឆ្នាំរបស់ខ្លួន៕
© រក្សាសិទ្ធិដោយ thmeythmey.com