ជាតិ
សង្គមជាតិ
អាជ្ញាធរថៃបញ្ជូនសពស្ត្រីពលករខ្មែរមកឲ្យសមត្ថកិច្ចកម្ពុជា
× សពស្ត្រីពលករខ្មែរម្នាក់ ទៅធ្វើការខុសច្បាប់ នៅប្រទេសថៃ ត្រូវបានសមត្ថកិច្ចថៃ ដឹកបញ្ជូនតាមច្រកតំបន់បឹងត្រកួន ស្រុកថ្មពួក ខេត្តបន្ទាយមានជ័យ កាលពីវេលាម៉ោង ៧និង៥៥នាទីយប់ ថ្ងៃទី១៤ ខែឧសភា ឆ្នាំ២០១៥ មកប្រគល់ឱ្យសមត្ថកិច្ចកម្ពុជា ដើម្បីទាក់ទងក្រុមគ្រួសារសព មកទទួលយកទៅធ្វើបុណ្យតាមប្រពៃណី ។ នេះបើតាមប្រភពពត៌មានដែលបានចុះផ្សាយដោយអគ្គស្នងការនគរបាលជាតិ កាលពីថ្ងៃទី១៥ ខែឧសភា ឆ្នាំ២០១៥ ។
បើតាមនគរបាលការពារព្រំដែនគោក លេខ៨០៧ ឈរជើងនៅច្រកតំបន់បឹងត្រកួន ស្ត្រីពលករខ្មែរ បានស្លាប់ដោយជួបគ្រោះថ្នាក់ចរាចរណ៍ នៅចំណុចស្រុកកាប៉ិ ខេត្តស្រះកែវ ប្រទេសថៃ កាលពីព្រឹក ថ្ងៃទី១៤ ខែឧសភា ឆ្នាំ២០១៥ ។ សមត្ថកិច្ចនៅពុំទាន់ដឹងច្បាស់ថា ស្ត្រីរងគ្រោះជួបគ្រោះថ្នាក់ចរាចរណ៍ កើតហេតុដោយរបៀបណានោះទេ ហើយគេក៏ពុំបានដឹងថាស្ត្រីរងគ្រោះ ធ្វើដំណើរតាមមធ្យោបាយអ្វីនោះដែរ ។ នេះបើតាមប្រភពពត៌មានដែលបានចុះផ្សាយដោយអគ្គស្នងការនគរបាលជាតិ ដដែល ។
នៅយប់ថ្ងៃថ្ងៃទី១៤ ខែឧសភាដដែល បន្ទាប់ពីសមត្ថកិច្ចកម្ពុជា ប្រចាំនៅច្រកបឹងត្រកួន ធ្វើការត្រួតពិនិត្យតាមនីតិវិធីរួចមក សមត្ថកិច្ចក៏បានទាក់ទងក្រុមគ្រួសារមកទទួលយកសព ដើម្បីយកទៅធ្វើបុណ្យតាមប្រពៃណី ។ ស្ត្រីរងគ្រោះមានឈ្មោះ ឡុង ឡាយ អាយុ៤៧ឆ្នាំ បច្ចុប្បន្នរស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ៕ © រក្សាសិទ្ធិដោយ thmeythmey.com