ជាតិ
សង្គមជាតិ
មហាសេដ្ឋីរុស្ស៊ី បានបណ្តេញចេញពីកម្ពុជា ក្រោមបទ ធ្វើឲ្យប៉ះពាល់ដល់សន្តិសុខជាតិ
×![]()
មហាសេដ្ឋីជនជាតិរុស្ស៊ី លោក Sergey Yurivich Polonsky ត្រូវបានអាជ្ញាធរ បណ្តេញចេញពីទឹកដីកម្ពុជាហើយនៅព្រឹកថ្ងៃអាទិត្យនេះ ក្រោមបទចោទប្រកាន់ថា ធ្វើឲ្យប៉ះពាល់ដល់សន្តិសុខកម្ពុជា ។ ការសម្រេចបណ្តេញចេញនេះ ធ្វើឡើងតាមរយៈសេចក្តីប្រកាសបណ្តេញចេញរបស់លោករដ្ឋមន្ត្រីក្រសួងមហាផ្ទៃកាលពីថ្ងៃសៅរ៍ម្សិលមិញ ។
នៅម៉ោង ៧ និង ២០ នាទី ព្រឹកថ្ងៃអាទិត្យទី ១៧ ឧសភានេះ មន្ត្រីអន្តោប្រវេសន៍កម្ពុជា បានបណ្តេញមហាសេដ្ឋីជនជាតិរុស្ស៊ី លោក ស៊ឺហ្គេរ យូរីវិច ប៉ូលុនស្គី (Sergey YurivichPolonsky) ចេញពីទឹកដីកម្ពុជាហើយ ក្រោយពីមានសេចក្តីប្រកាសបណ្តេញចេញារបស់លោក ស ខេង រដ្ឋមន្ត្រីក្រសួងមហាផ្ទៃ ។ លោក មហាសេដ្ឋីរុស្ស៊ីរូបនេះ ត្រូវមន្ត្រីអន្តោប្រវេសន៍កម្ពុជា បញ្ជូនចេញតាមរយៈយន្តហោះ Angkor Air ឆ្ពោះទៅកាន់ទីក្រុងហូជីមីញ ប្រទេសវៀតណាម និងបន្តជិះយន្តហោះពី ហូជីមីញ ទៅប្រទេសរុស្ស៊ី ដែលជាដីកំណើតរបស់លោក។នេះបើតាមលោក អ៊ុក ហៃសីលា ប្រធាននាយកដ្ឋាន ផ្នែកស៊ើបអង្កេត អនុវត្ដនីតិវិធីនៃអគ្គនាយកដ្ឋានអន្ដោប្រវេសន៍។
លោក អ៊ុក ហៃសីលា បានអះអាង ប្រាប់សារព័ត៌មានថ្មីៗនៅថ្ងៃអាទិត្យនេះទៀតថា ការបណ្តេញមហាសេដ្ឋីរុស្ស៊ីលោក Polonsky ចេញពីទឹកដីកម្ពុជា ធ្វើឡើងដោយផ្អែកលើបទចោទប្រកាន់មហាសេដ្ឋីរូបនេះ ទាក់ទងនឹងការធ្វើឲ្យប៉ះពាល់ដល់សន្តិសុខកម្ពុជា ហើយនិងរស់នៅកម្ពុជា ដោយគ្មានលិខិតឆ្លងដែរ។ « គាត់ឃុំឃាំងមនុស្សខុសច្បាប់ ។ គាត់ធ្វើឲ្យប៉ះពាល់ដល់សន្តិសុខជាតិយើង ។ គាត់អត់មានលិខិតឆ្លងដែនទេ ពេលយើងសួរគាត់រកលិខិតឆ្លងដែន គាត់កុហកថា នៅមេធាវីរបស់ខ្លួន នៅលើកោះដំឡូង ដល់ពេលយើងសួរមេធាវី និងទៅរកមើលអត់មាន។ គាត់អត់មានប្រហែលពីរឆ្នាំហើយ » ។ នេះជាការបញ្ជាក់របស់មន្ត្រីអគ្គនាយកដ្ឋានអន្ដោប្រវេសន៍ខាងលើ។
សូមរម្លឹកថា កម្មករខ្មែរ៦នាក់ បានដាក់ពាក្យប្តឹងមហាសេដ្ឋីរុស្ស៊ី លោក Polonskyពីបទប្រើហិង្សាដោយចេតនា និងការឃុំឃាំងមនុស្សខុសច្បាប់ ក្រោយពីមហាសេដ្ឋីរូបនេះ ប្រព្រឹត្តទង្វើបែបនេះលើពួកខ្លួន ក្នុងខេត្តព្រះសីហនុ កាលពីចុងឆ្នាំ ២០១២ ។ តែក្រោយមក ក្រុមកម្មករខ្មែរទាំងនោះបានដកពាក្យបណ្តឹងវិញ បន្ទាប់ពីពួកគេបានទទួលសំណងរដ្ឋប្បវេណីចំនួន២ម៉ឺនដុល្លារពីលោក Polonsky ។ កាលពីថ្ងៃទី ១៥ ខែឧសភា ឆ្នាំ ២០១៥ នេះ អាជ្ញាធរ បានចាប់ខ្លួនលោក Polonsky និងក្រុមខ្លួន ៥ នាក់ទៀតនៅលើកោះដំឡូង ក្នុងទឹកដីខេត្តព្រះសីហនុ ហើយបញ្ចូន មកឃុំខ្លួននៅអគ្គនាយកដ្ឋានអន្តោប្រវេសន៍ នៅភ្នំពេញ ។
ពាក់ព័ន្ធនឹងក្រុមរបស់លោកមហាសេដ្ឋី Polonsky ៥ រូបទៀត ដែលជាជនជាតិរុស្ស៊ីដែរនោះ លោក អ៊ុក ហៃសីលា បញ្ជាក់ថា អាជ្ញាធរកម្ពុជា នៅមិនទាន់បញ្ជូនពួកគេចេញពីកម្ពុជាឡើយ ព្រោះមិនទាន់ទទួលបានលិខិតបើកផ្លូវពីស្ថានទូតរុស្ស៊ី ប្រចាំនៅកម្ពុជា ។ លោកថា យ៉ាងយូរក្នុងសប្តាហ៍ក្រោយនេះ ពួកគេនឹងទទួលបានលិខិតបើកផ្លូវពីស្ថានទូតនេះ ហើយបញ្ជូនទៅរុស្ស៊ីវិញ ។
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ម៉ោង
