អន្តរជាតិ
នយោបាយអន្តរជាតិ
ទ័ពអាមេរិកសម្លាប់មេដឹកនាំជាន់ខ្ពស់ក្រុមរដ្ឋឥស្លាមនៅស៊ីរី
×
កាលពីថ្ងៃសៅរ៍ម្សិលមិញនេះ ក្រសួងការពារជាតិអាមេរិក បានប្រកាសឲ្យដឹងថា កងកម្លាំងពិសេសរបស់ខ្លួនបានសម្លាប់មេដឹកនាំជាន់ខ្ពស់ក្រុមរដ្ឋឥស្លាម ក្នុងពេលកងទ័ពខ្លួនវាយប្រហារក្នុងប្រទេសស៊ីរី។ ក្រោយវាយប្រហារ សហរដ្ឋអាមេរិកបានផ្តល់ព័ត៌មានជុំវិញការសម្លាប់ក្រុមរដ្ឋឥស្លាមទៅក្រុងដាម៉ាស ប៉ុន្តែអាមេរិកបានសង្កត់ធ្ងន់ថា ការផ្តល់ដំណឹងមុនឬក្រោយទៅកាន់រដ្ឋាភិបាលស៊ីរីមិនសំខាន់ឡើយ ហើយប្រតិបត្តិការរបស់ខ្លួនស្របតាមច្បាប់អន្តរជាតិ។
លោក មុំ ពិទូរ្យ លម្អិតព័ត៌មាននេះ
មេដឹកនាំជាន់ខ្ពស់ក្រុមភេរវជនរដ្ឋឥស្លាម Abu Sayyaf បានស្លាប់បាត់បង់ជីវិតកាលពីម្សិលមិញក្នុងទឹកដីស៊ីរី ដោយសារកណ្តាប់ដៃកងកម្លាំងពីអាមេរិកដែលឆ្លងដែនទឹកដីស៊ីរី។ បើតាមការឲ្យដឹងពីសំណាក់រដ្ឋមន្ត្រីការពារជាតិអាមេរិកលោក Ashton Carter កងកម្លាំងពិសេសសហរដ្ឋអាមេរិកបានសម្លាប់មេបញ្ជាការក្រុមរដ្ឋឥស្លាមនេះ ខណៈពេលដែលកងទ័ពរបស់លោកបើកការវាយប្រហារតាមផ្លូវអាកាសក្នុងតំបន់ភាគខាងកើតប្រទេសស៊ីរី។ កងកម្លាំងអាមេរិកឆ្លងទៅវាយប្រហារនៅស៊ីរី កាលពីយប់ថ្ងៃសុក្រ ដោយប្រើប្រាស់ឧទ្ធម្ភាគចក្រ និងមានការសហការពីកងម្លាំងរដ្ឋាភិបាលអ៊ីរ៉ាក់ផងដែរ។ ការវាយប្រហាររបស់កងទ័ពអាមេរិកលើក្រុមភេរវជនរដ្ឋឥស្លាមនេះ បានសម្លាប់កងកម្លាំងក្រុមនេះជាច្រើននាក់ផងដែរ បើតាមការអះអាងរបស់ក្រសួងការពារជាតិអាមេរិក។
ប្រតិបត្តិការពិសេសនេះ ត្រូវបានសម្រេចដាក់អនុញ្ញាតដោយប្រធានាធិបតី បារ៉ាក់អូបាម៉ា។ ការសម្រេចចិត្តខាងលើរៀបចំឡើងដោយសារមានការស្នើសុំពីក្រសួងការពារជាតិ និងបណ្តាប្រឹក្សាសន្តិសុខជាតិរបស់លោកផ្ទាល់តែម្តង។ ប៉ុន្តែទោះជាយ៉ាងណាក្តី ការអន្តរាគមន៍នៅក្នុងប្រទេសស៊ីរីរបស់កងទ័ពអាមេរិកកំពុងក្លាយជាប្រធានបទពិភាក្សានៅឡើយ។
អ្នកនាំពាក្យក្រសួងការពារជាតិអាមេរិកម្នាក់បានលួចបង្ហើបឲ្យដឹងថា អាមេរិកទើបផ្តល់ព័ត៌មានទៅដល់រដ្ឋាភិបាលក្រុងដាម៉ាសជុំវិញប្រតិបត្តិការ និងការស្លាប់របស់មេដឹកនាំជាន់ខ្ពស់ក្រុមរដ្ឋឥស្លាមនេះ។
អ្នកនាំពាក្យរូបនេះក៏បានព្រលយពាក្យថា ផ្តល់ដំណឹងមុនឬក្រោយមិនសំខាន់ឡើយ ហើយការអន្តរាគមន៍កម្ចាត់ក្រុមរដ្ឋឥស្លាមនៅស៊ីរីមិនរំលោភច្បាប់អន្តរជាតិនោះទេ។ តាំងពីយូរមកហើយសហរដ្ឋអាមេរិកមិនដែលខ្វល់ខ្វាយរឿងសហការជាមួយរដ្ឋាភិបាលលោក អាសាដឡើយ ដោយសហរដ្ឋអាមេរិកចាត់ទុករដ្ឋាភិបាលនោះជារដ្ឋាភិបាលមិនស្របច្បាប់។ ដូច្នេះអាមេរិកអាចបើកការវាយប្រហារតាមចិត្ត ដោយមិនចាំបាច់ខ្វល់ខ្វាយថា ការអន្តរាគមន៍ខ្លួនរំលោភអធិបតេយ្យរបស់ស៊ីរីឬយ៉ាងណានោះឡើយ។
សូមរំលឹកបន្តិចថា Abus Sayyaf មានសញ្ជាតិទុយនេស៊ី ហើយបុរសនេះបានក្លាយជាមេដឹកនាំជាន់ខ្ពស់ក្រុមសកម្មប្រយុទ្ធរដ្ឋឥស្លាមកន្លងមក។ មេដឹកនាំម្នាក់នេះត្រូវបានគេស្គាល់ថា ជាមេដឹកនាំម្នាក់ដែលសកម្មជាងគេក្នុងក្រុម ហើយមានជាប់ពាក់ព័ន្ធនឹងការចាត់ចែងកម្លាំងដើម្បីបើកប្រតិបត្តិការវាយប្រហារ ជួញដូរប្រេង និងស្វះស្វែងរកជំនួយហិរញ្ញវត្ថុផ្សេងទៀតដើម្បីទ្រទ្រង់ក្រុមរបស់គេ។
ក្នុងប្រតិបត្តិការម្សិលមិញនេះដែរ ក្រៅពីសម្លាប់មេដឹកនាំជាន់ខ្ពស់ក្រុមនេះ សហរដ្ឋអាមេរិកក៏បានបញ្ជាក់ផងដែរថា គេបានចាប់ខ្លួនប្រពន្ធ Abus Sayyaf ផងដែរក្នុងពេលជាមួយគ្នានោះ ហើយស្ត្រីជាប្រពន្ធនេះក៏មានតួនាទីសំខាន់ផងដែរក្នុងរចនាសម្ព័ន្ធដឹកនាំក្រុម។ យ៉ាងណាក៏ដោយស្ត្រីម្នាក់នេះត្រូវបានបញ្ជូនទៅឃុំឃាំងនៅក្នុងប្រទេសអ៊ីរ៉ាក់ក្រោយត្រូវចាប់ខ្លួន៕
© រក្សាសិទ្ធិដោយ thmeythmey.com