អន្តរជាតិ
នយោបាយអន្តរជាតិ
អារ៉ាប៊ីសាអូឌីតសុំអាវុធនុយក្លេអ៊ែរពីប៉ាគីស្ថាន ដើម្បីប្រឆាំងអ៊ីរ៉ង់
×
រដ្ឋាភិបាលអារ៉ាប៊ីសាអូឌីតបានទាក់ទងរដ្ឋាភិបាលប៉ាគីស្ថានដើម្បីស្នើសុំអាវុធនុយក្លេអ៊ែរដើម្បីការពារសន្តិសុខប្រទេសខ្លួន។ ការស្នើសុំអាវុធនេះកើតឡើងដោយសារ អារ៉ាប៊ីសាអូឌីតភ័យថាអ៊ីរ៉ង់នឹងផលិតកាំជ្រួចនុយក្លេអ៊ែរ ព្រោះសហគមន៍អន្តរជាតិជាពិសេសមហាអំណាចប្រាំមួយ អាចនឹងបង្កើតកិច្ចព្រមព្រៀងជាមួយរដ្ឋាភិបាលក្រុងតេអ៊ីរ៉ង់ជុំវិញកម្មវិធី នុយក្លេអ៊ែរ។ បើអ៊ីរ៉ង់អាចសម្រេចផលិតអាវុធនុយក្លេអ៊ែរ អ្នកដែលព្រួយបារម្ភខ្លាំង មានអារ៉ាប៊ីសាអូឌីត និងអ៊ីស្រាអែល។
លោក មុំ ពិទូរ្យ លម្អិតព័ត៌មាននេះ
សហគមន៍អន្តរជាតិបន្តពិភាក្សាជាមួយរដ្ឋាភិបាលអ៊ីរ៉ង់លើបញ្ហាកម្មវិធីនុយក្លេអ៊ែរអ៊ីរ៉ង់ ហើយគេរំពឹងថា កិច្ចព្រមព្រៀងចុងក្រោយមួយនឹងត្រូវគេសម្រេចបាននៅពេលខាងមុខ។ កិច្ចព្រមព្រៀងថ្មីអាចនឹងអនុញ្ញាតឲ្យអ៊ីរ៉ង់ប្រើប្រាស់កម្មវិធីនុយក្លេអ៊ែរក្នុងហេតុផលស៊ីវិល ដើម្បីផលិតថាមពល។ ប៉ុន្តែអ៊ីស្រាអែល និងអារ៉ាប៊ីសាអូឌីត ឯណោះវិញ ដែលជាសត្រូវអ៊ីរ៉ង់បានបង្ហាញក្តីបារម្ភចំពោះលទ្ធភាពនៃការផលិតកាំជ្រួចនុយក្លេអ៊ែររបស់អ៊ីរ៉ង់នេះផងដែរ។ យ៉ាងណាក៏ដោយ ដោយបារម្ភបញ្ហាសន្តិសុខរបស់ខ្លួន រដ្ឋាភិបាលក្រុងរីយ៉ាដ បានសម្រេចទាក់ទងរដ្ឋាភិបាលក្រុងឥស្លាមបាត ដើម្បីសុំជំនួយអាវុធនុយក្លេអ៊ែរ ទុកគ្រាន់ការពារសន្តិសុខនៅពេលខាងមុខ។
សូមបញ្ជាក់ថា ប៉ាគីស្ថានថ្វីត្បិតតែប្រទេសនេះមិនមែនជាប្រទេសមហាអំណាចក៏ពិតមែន តែប្រទេសនេះមានអាវុធនុយក្លេអ៊ែរ ដែលអាចគំរាមកំហែងពិភពលោកបាន។ រដ្ឋាភិបាលទាំងពីរមានចំណងទំនាក់ទំនងជិតស្និទ្ធជាមួយគ្នាយូរអង្វែងមកហើយ ហើយប៉ាគីស្ថាននេះប្រហែលជានឹងពិចារណាការពារសន្តិសុខអារ៉ាប៊ីសាអូឌីត ប្រសិនមានករណីវាយប្រហារណាមួយកើតឡើងនោះ។ ប៉ុន្តែ មកទល់ពេលនេះមិនទាន់មានការផ្ទេរ ឬដឹកជញ្ជូនអាវុធប្រល័យលោកនេះទៅឲ្យអារ៉ាប៊ីសាអូឌីតនៅឡើយទេ។
គេជឿថា ភាគីទាំងពីរកំពុងបន្តពិភាក្សានិងចរចាគ្នាជុំវិញការបង្កើនកិច្ចសហប្រតិបត្តិការយុទ្ធសាស្ត្រនិងសន្តិសុខ ដែលអាចបង្កើនលទ្ធភាពឲ្យប៉ាគីស្ថានក្នុងការជួយការពារសន្តិសុខអារ៉ាប៊ីសាអូឌីតករណីប្រទេសនេះរងការគំរាមកំហែងនោះ។
ចំណែកអ៊ីស្រាអែលធ្លាប់ព្រមព្រៀងគ្នារួចហើយជាមួយអារ៉ាប៊ីសាអូឌីតកន្លងមក ក្រោយអ៊ីរ៉ង់និងមហាអំណាចត្រូវរ៉ូវគ្នាក្នុងការចរចាកម្មវិធីនុយក្លេអ៊ែរ ដោយអារ៉ាប៊ីសាអូឌីតបើកផ្លូវឲ្យអ៊ីស្រាអែលប្រើប្រាស់ដែនអាកាសរបស់ខ្លួនដើម្បីវាយប្រហារអ៊ីរ៉ង់ក្នុងករណីចាំបាច់។
អ្នកជំនាញផ្នែកសិក្សាយុទ្ធសាស្ត្រMark Fitzpatrickបានឲ្យដឹងថា ប៉ាគីស្ថានប្រហែលជាត្រៀមលក្ខណៈហើយដើម្បីបញ្ជូនអាវុធនុយក្លេអ៊ែរនេះទៅកាន់ប្រទេសអារ៉ាប៊ីសាអូឌីតផងនាពេលខាងមុខនេះ។ លោកបានសង្កត់ធ្ងន់ថា កិច្ចព្រមព្រៀងមហាអំណាច៦ និងអ៊ីរ៉ង់ដែលគ្រប់គ្រងបញ្ហានុយក្លេអ៊ែរអ៊ីរ៉ង់នោះកំពុងបង្កើតឲ្យមានការប្រកួតប្រជែងគ្នាផ្នែកអាវុធនុយក្លេអ៊ែរ។ អ៊ីស្រាអែលមានអាវុធនុយក្លេអ៊ែរហើយ ប៉ុន្តែមហាអំណាចតំបន់ជាពិសេសប្រទេសសេដ្ឋីប្រេងដែលជាសត្រូវអ៊ីរ៉ង់ម្តេចនឹងសុខចិត្តនៅស្ងៀម បើករណីអ៊ីរ៉ង់អាចផលិតអាវុធនុយក្លេអ៊ែរបាននោះ។
ជុំវិញការបង្កើតកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ថ្មីនេះ នឹងអនុញ្ញាតអាចរួចផុតពីទណ្ឌកម្មលោកខាងលិចដែលរុកគួនសេដ្ឋកិច្ចប្រទេសនេះរាប់ឆ្នាំមកហើយ ប៉ុន្តែការចម្រាញ់សារធាតុគីមីដើម្បីផលិតថាមពលដោយប្រើកម្មវិធីនុយក្លេអ៊ែរចាំបាច់ត្រូវមានតម្លាភាព និងប្រាកដថាអ៊ីរ៉ង់មិនលួចផលិតអាវុធនោះទេ។ អ៊ីរ៉ង់បង្ហាញជំហរខ្លួនជាច្រើនលើកច្រើនសារថា ខ្លួនមិនប៉ងផលិតអាវុធនុយក្លេអ៊ែរឡើយ ហើយរដ្ឋាភិបាលអាមេរិករបស់ប្រធានាធិបតីបារ៉ាក់ អូបាម៉ា ជឿជាក់ថាកិច្ចព្រមព្រៀងថ្មីនឹងមិនមានគ្រោះថ្នាក់ដល់មជ្ឈិមបូព៌ាឡើយ។
© រក្សាសិទ្ធិដោយ thmeythmey.com