ជាតិ
សង្គមជាតិ
បារាំងផ្តល់ថវិកា៤០លានដុល្លារ ជំរុញការអភិវឌ្ឍផ្នែកសេដ្ឋកិច្ចនិងសង្គមនៅកម្ពុជា
×![]()
ដោយ: ខន ចំប៉ា
កម្ពុជា-បារាំង ចុះហត្ថលេខាលើកិច្ចព្រមព្រៀងហិរញ្ញប្បទានចំនួន៤ ដែលមានទឹកប្រាក់សរុប៤០លានដុល្លារ ដើម្បីគាំទ្រដល់ការអភិវឌ្ឍផ្នែកសេដ្ឋកិច្ច និងសង្គមនៅកម្ពុជា។
យោងតាមសេចក្តីជូនដំណឹងរបស់ស្ថានទូតបារាំងការចុះហត្ថលេខាប្រគល់ជំនួយនេះប្រព្រឹត្តទៅនៅម៉ោង៥ល្ងាចថ្ងៃទី១៩ខែឧសភានេះ ក្រោមអធិបតីភាព លោកស្រី អានីកហ្ស៊ីរ៉ាដាំង(AnnickGirardin) រដ្ឋលេខាធិការក្រសួងការបរទេសបារាំងទទួលបន្ទុកការអភិវឌ្ឍន៍និងអង្គការប្រទេសនិយាយភាសាបារាំងជាមួយ លោក អូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
លោកស្រី អានីកហ្ស៊ីរ៉ាដាំង បានមកបំពេញទស្សនកិច្ចផ្លូវការនៅក្នុងប្រទេសកម្ពុជារយៈពេល៣ថ្ងៃ គឺពីថ្ងៃទី១៨ដល់ថ្ងៃទី២០ខែឧសភា។
កាលពីព្រឹកថ្ងៃទី១៩ឧសភានេះ លោក ស្រី បានជួបពិភាក្សាជាមួយ លោកហោ ណាំហុង រដ្ឋមន្ត្រីក្រសួងការបរទេសកម្ពុជា។ ភាគីទាំងពីរ ក៏បានចុះហត្ថលេខាលើ«ឯកសារតម្រង់ទិសឆ្នាំ២០១៥-២០១៨»ដែលជាឯកសារកំណត់ទិសដៅកិច្ចសហប្រតិបត្តិការភាពជាដៃគូរវាងកម្ពុជា-បារាំង ដែលលើកឡើងពីជំនួយដល់វិស័យអាទិភាពដូចជាវិស័យអប់រំ សុខាភិបាលបណ្តុះបណ្តាលវិជ្ជាជីវៈ បរិស្ថាន ការអភិវឌ្ឍន៍ជនបទ ហេដ្ឋារចនាសម្ព័ន្ធថាមពល សេដ្ឋកិច្ច វិនិយោគ ធនធានទឹក វប្បធម៌ យុត្តិធម៌ជាដើម។
នៅរសៀលនេះ លោកស្រី អានីកហ្ស៊ីរ៉ាដាំងនឹងជួបសំដែងការគួរសមនិងពិភាក្សាការងារជាមួយលោក នាយករដ្ឋមន្ត្រីហ៊ុនសែនផងដែរ។នៅចុងក្រោយនៃដំណើរទស្សនកិច្ច រដ្ឋលេខាធិការក្រសួងការបរទេសបារាំងរូបនេះនឹងចូលថ្វាយបង្គំគាល់ព្រះមហាក្សត្រនៃព្រះរាជាណាចក្រកម្ពុជា នៅព្រឹកនៅថ្ងៃទី២០ខែឧសភា៕
© រក្សាសិទ្ធិដោយ thmeythmey.com
