ជាតិ
លោក កឹម សុខា រំលែកទុក្ខគ្រួសារកម្មករដែលស្លាប់នៅខេត្តស្វាយរៀង
×
ប្រធានស្ដីទីគណបក្សសង្គ្រោះជាតិលោក កឹម សុខា ចូលរួមរំលែកទុក្ខនិងសោកស្ដាយ ចំពោះការស្លាប់បាត់បង់ជីវិតរបស់កម្មករ កម្មការនី រោងចក្រ ចំនួន១៧នាក់ និងរងរបួសធ្ងន់ ស្រាល ជាច្រើននាក់ ដោយសារគ្រោះថ្នាក់ចរាចរណ៍ កាលពីព្រឹកថ្ងៃទី ១៩ ឧសភានេះ ស្ថិតនៅក្នុងភូមិដើមពោធ៍ ឃុំកណ្ដៀងរាយ ស្រុកស្វាយទាប ខេត្តស្វាយរៀង។
លោក កឹម សុខា បានបញ្ជាក់ថា៖«ក្នុងនាមគណបក្សសង្គ្រោះជាតិ ក្នុងនាមខ្ញុំផ្ទាល់ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតចំពោះក្រុមគ្រួសារសព និងជនរងគ្រោះដែលទទួលរងនូវសោកនាដកម្ម ដ៏រន្ធតក្នុងហេតុការណ៍នេះ»។
ថ្លែងពីក្នុងពិធីប្រគល់សញ្ញាប័ត្រដល់និស្សិតសាកលវិទ្យាល័យភូមិន្ទភ្នំពេញ នៅព្រឹកថ្ងៃទី១៩ នៅមជ្ឈមណ្ឌលកោះពេជ្រ លោកនាយករដ្ឋមន្ត្រី ហ៊ុន សែន ចូលរួមរំលែកទុក្ខ និងសោកស្ដាយចំពោះការបាត់បង់ជីវិតកម្មកររោងចក្រ នៅក្នុងហេតុការណ៍គ្រោះថ្នាក់ចរាចរណ៍ នៅព្រឹកថ្ងៃទី១៩ ឧសភានេះ នៅខេត្តស្វាយរៀង។ ជាមួយនឹងការរំលែកទុក្ខ សោកស្ដាយនេះ ប្រមុខរដ្ឋាភិបាលកម្ពុជា ក៏អំពាវនាវទៅដល់ប្រជាពលរដ្ឋទាំងអស់ ធ្វើដំណើរបើកបរដោយប្រុងប្រយ័ត្នខ្ពស់ និងត្រូវគោរពច្បាប់ចរាចរណ៍ឲ្យបានខ្ជាប់ខ្ជួន។
លើសពីនេះរដ្ឋាភិបាលកម្ពុជាក៏បានឧបត្ថម្ភថវិកាជាបន្ដបន្ទាប់ ជូនគ្រួសារសពជនរងគ្រោះ ដែលបានបាត់បង់ជីវិត និងអ្នករងរបួសធ្ងន់ ស្រាលផងដែរ។
យ៉ាងហោចណាស់កម្មករ កម្មការិនី ១៧ នាក់ បានបាត់បង់ជីវិត និងរងរបួសធ្ងន់ស្រាល២២នាក់ ក្នុងគ្រោះថ្នាក់ចរាចរណ៍ រវាងរថយន្ដក្រុងដឹកអ្នកដំណើរភ្នំពេញ-វៀតណាម របស់ក្រុមហ៊ុន 15 SH Transport Co.,Ltd. បុកជាមួយនឹងរថយន្ដដឹកកម្មករ ស្ថិតនៅភូមិដើមពោធិ៍ ឃុំតណ្តៀងរាយ ស្រុកស្វាយទាប ខេត្តស្វាយរៀង។
ចំណែកអ្នកបើកបររថយន្ដក្រុងដឹកអ្នកដំណើរក្រុមហ៊ុន 15 SH ឈ្មោះ ឡេ វ៉ាងទឹង ភេទប្រុស អាយុ៤៥ឆ្នាំ ជនជាតិវៀតណាមត្រូវបានចាប់ខ្លួន៕
© រក្សាសិទ្ធិដោយ thmeythmey.com