អន្តរជាតិ
នយោបាយអន្តរជាតិ
អាមេរិកបន្តជ្រោមជ្រែងកម្ពុជាក្នុងបេសកកម្មរក្សាសន្តិភាពពិភពលោក
×
តាំងពីយូរមកហើយ សហរដ្ឋអាមេរិក ជាមហាអំណាចមួយដែលផ្តល់ជំនួយនិងសហការជាមួយស្ថាប័នអង្គការសហប្រជាតិដើម្បីថែរក្សានិងស្វែងរកសន្តិភាពពិភពលោក។ ក្នុងសន្និសីទក្រសួងការបរទេសអាមេរិកស្តីពីប្រតិបត្តិការរក្សាសន្តិភាពសាកលនៅថ្ងៃ ២១ ឧសភានេះ សហរដ្ឋអាមេរិកបានបង្ហាញពីគោលនយោបាយរបស់ខ្លួន ដើម្បីបន្តគាំទ្របេសកកម្មរក្សាសន្តិភាពពិភពលោក។ ក្នុងសន្និសីទសារព័ត៌មាននេះ សហរដ្ឋអាមេរិកបានកោតសរសើរកម្ពុជា ព្រោះកម្ពុជាធ្លាប់ជារដ្ឋដែលគេជួយ ត្រឡប់ទៅជាភាគីដែលសកម្មជាងគេមួយក្នុងការរក្សាសន្តិភាពជូនពិភពលោក ក្រោមក្របខ័ណ្ឌអង្គការសហប្រជាជាតិ។ អ្វីដែលសំខាន់នោះអាមេរិកក៏ប្តេជ្ញាថានឹងបន្តជួយជ្រោមជ្រែងកម្ពុជាដូចជាផ្តល់ការហ្វឹកហ្វឺន និងជំនួយឧបត្ថម្ភនានាបើចាំបាច់ ដើម្បីឲ្យកម្ពុជាមានលទ្ធភាពបន្តចូលរួមក្នុងសកម្មភាពមនុស្សធម៌អន្តរជាតិនេះផងដែរ។
សូមស្តាប់ការបកស្រាយរបស់លោក សៅ ផលនិស្ស័យ
សហរដ្ឋអាមេរិកជារដ្ឋមួយក្នុងចំណោមដែលដើរតួនាទីសំខាន់ជាងគេក្នុងការត្រួសត្រាយផ្លូវនិងគាំទ្រសកម្មភាពនិងប្រតិបត្តិការរក្សាសន្តិភាពពិភពលោករបស់អង្គការសហប្រជាជាតិ។ ក្នុងការចូលរួមចំណែកធានានិរន្តរភាពនិងប្រសិទ្ធភាពនៃការរក្សាសន្តិភាព និងសន្តិសុខសាកលលោក រដ្ឋាភិបាលអាមេរិកបានបន្តផ្តល់ជំនួយច្រើនយ៉ាងដែលភាគីពាក់ព័ន្ធ ស្ថាប័នជំនាញ និងបណ្តាប្រទេសដែលចូលរួមក្នុងសកម្មភាពនេះដូចគ្នា។
នៅថ្ងៃព្រហស្បតិ៍ ក្រសួងការបរទេសអាមេរិកបានបើកសន្និសីទព័ត៌មានតាមទូរស័ព្ទពីក្រុងវ៉ាស៊ីនតោន ផ្តោតលើការគោលនយោបាយអាមេរិកគាំទ្រប្រតិបត្តិការរក្សាសន្តិភាពសកល ជាពិសេសតំបន់អាស៊ីប៉ាស៊ីហ្វិក។ក្នុងសន្និសីទនេះមានឧបការីររងរដ្ឋមន្ត្រីការបរទេសអាមេរិកលោកស្រី Victoria Holt ជាវាគ្មិនដែលលោកស្រីទទួលបន្ទុកកិច្ចការសន្តិសុខអន្តរជាតិ។ក្នុងសន្និសីទលោកស្រីបានកោតសរសើរកម្ពុជាចំៗជាមួយទីម៉រខាងកើតដែលបានរួមចំណែកសំខាន់ក្នុងការកសាងសន្តិភាពពិភពលោក ស្របពេលដែលសន្និសីទមានអ្នកសារព័ត៌មានជាច្រើនតំបន់អាស៊ីប៉ាស៊ីហ្វិកមានមកពីចិន វៀតណាម កម្ពុជា ឥណ្ឌូនេស៊ី ហ្វីលីពីន និង អ្នកសារព័ត៌មានអន្តរជាតិដូចជា CNN និង Bloomberg។យោងតាមការលើកឡើងរបស់លោកស្រី អាមេរិកនឹងបន្តការគាំទ្ររបស់ខ្លួនចំពោះកម្ពុជា ដើម្បីធានាថាកម្ពុជាមានលទ្ធភាពបន្តការចូលរួមរក្សាសន្តិភាពកាន់តែសកម្មជាងមុន។
១.កម្ពុជាប្រែពីរដ្ឋរងគ្រោះដោយសង្គ្រាមស៊ីវិល ទៅជាអ្នករក្សាសន្តិភាពជូនពិភពលោក
ថ្លែងសុន្ទរកថាក្នុងសន្និសីទនេះលោកស្រី Victoria Holt បានលើកឡើងពីសារសំខាន់នៃប្រតិបត្តិការរក្សាសន្តិភាពរបស់អង្គការអ.ស.ប. និងការចូលរួមរបស់បណ្តាប្រទេសជាមិត្តដើម្បីបញ្ចប់ បញ្ហាសន្តិសុខសាកល ជាពិសេសជម្លោះប្រដាប់អាវុធ សង្គ្រាមស៊ីវិល ជាដើមដែលបន្តកើតឡើងលើពិភពលោក។ យ៉ាងណាក៏ដោយលោកស្រីបានបង្ហាញក្តីបារម្ភរបស់សហរដ្ឋអាមេរិកនៅពេលដែលចំនួនជម្លោះបន្តកើន អង្គការសហប្រជាជាតិប្រើប្រាស់ទ័ពរក្សាសន្តិភាពអស់ពីរភាគបីនៃកម្លាំងសរុប ដែលចំនួននេះខ្ពស់បំផុតមិនធ្លាប់មាន។ ជម្លោះកើតពីអាស៊ី ដល់អាហ្វ្រិក ពីអាហ្វ្រិកដល់អឺរ៉ុបទៀត ដែលនេះបញ្ជាក់ថាពិភពលោកត្រូវការការចូលរួមពីបណ្តារដ្ឋជាសមាជិកដើម្បីធានាពីប្រសិទ្ធភាពនៃយុទ្ធនាការរក្សាសន្តិភាពសាកល។
អ្វីដែលសំខាន់ លោកស្រីឧបការីរងរដ្ឋមន្ត្រីការបរទេសអាមេរិក បានថ្លែងកោតសរសើររដ្ឋមួយចំនួននៅអាស៊ីដែលចូលរួមចំណែកយ៉ាងសំខាន់សម្រាប់ពិភពលោកដើម្បីរកសន្តិភាព ក្នុងនោះមានកម្ពុជាដែរ។លោកស្រីបានអធិប្បាយ រដ្ឋទើបងើបផុតពីសង្គ្រាមស៊ីវិល កម្ពុជា បាននិងបន្តខិតខំរួមចំណែកយ៉ាងសំខាន់ក្នុងការសាងសន្តិភាពជូនប្រជាជនពិភពលោក។ កម្ពុជាធ្លាប់រងទុក្ខវេទនាដោយសារភ្លើងសង្គ្រាមទើបស្គាល់សន្តិភាពនៅដើមទសវត្សទី៩០នេះទេ ប៉ុន្តែប្រទេសបានប្រែក្លាយខ្លួនជាតួអង្គដ៏សំខាន់ ដោយបញ្ជូនកងទ័ពនិងផ្តល់ការគាំទ្រចលនារក្សាសន្តិភាពនៃអ.ស.ប. ដែលរដ្ឋផ្សេងទៀតគួរយកតម្រាប់តាម។ នេះបញ្ជាក់ថា កម្ពុជាជារដ្ឋគំរូចំពោះរដ្ឋដទៃ បើទោះបីកម្ពុជាជារដ្ឋក្រីក្រ និងជារដ្ឋដែលធ្លាប់គេជួយសង្គ្រោះពីភ្លើងសង្គ្រាមក៏ពិតមែន។ ប៉ុន្តែកម្ពុជាមិនក្រទឹកចិត្តចង់ជួយសាងសន្តិភាពជូនពិភពលោកឡើយ ព្រោះកម្ពុជាយល់ច្បាស់ថាពីទុក្ខលំបាករបស់ប្រជាជនស៊ីវិលដែលកំពុងរត់គេចពីសង្គ្រាម និងជម្លោះប្រដាប់អាវុធ។ សូមរម្លឹកបន្តិចថាកម្ពុជា ធ្លាប់បញ្ជូនកងទ័ពរបស់ខ្លួនជាច្រើនរយនាក់ទៅចូលរួមក្នុងប្រតិបត្តិការរក្សាសន្តិភាពនៅប្រទេសភាគច្រើននៅអាហ្វ្រិកចាប់តាំងពីខ្លួនស្គាល់សន្តិភាពពេញលេញហើយនោះ។ កងទ័ពកម្ពុជាបានចូលរួមក្នុងសាងសន្តិភាពនេះ ដោយធ្វើសកម្មភាពតាមជំនាញនីមួយៗ មានបោសសម្អាតមីន វិស្វកម្ម ខាងរក្សាសណ្តាប់ធ្នាប់សាធារណៈ វេជ្ជសាស្ត្រ និងផ្នែកមនុស្សធម៌ផ្សេងទៀត។
២. សហរដ្ឋអាមេរិកបន្តគាំទ្រនិងជួយកម្ពុជាក្នុងការចូលរួមសកម្មភាពរក្សាសន្តិភាពពិភពលោក
ដោយឡែកក្រៅពីកោតសរសើរកម្ពុជាក្នុងការដាក់ចិត្តដាក់កាយស្វែងរកសន្តិភាពជូនពិភពលោក ក្នុងសន្និសីទនេះដែរលោកស្រីឧបការីរងបញ្ជាក់ពីគោលជំហរនិងឆន្ទៈរបស់រដ្ឋាភិបាលក្រុងវ៉ាស៊ីនតោនក្នុងការបន្តជួយគាំទ្ររដ្ឋដែលប្រឡូកក្នុងស្វែងរកសន្តិភាពជូនពិភពលោក ដូចជាកម្ពុជាជាដើមនោះ។ លោកស្រី Victoria Holt បានឆ្លើយតបសំណួរអ្នកសារព័ត៌មានថ្មីៗ ដែលចោទសួរពីគោលនយោបាយក្រុងវ៉ាស៊ីនតោនក្នុងការជ្រោមជ្រែងកម្ពុជា និងប្រទេសកំពុងអភិវឌ្ឍន៍ដើម្បីបន្តសកម្មភាពរក្សាសន្តិភាពសាកលក្នុងនាមជាដៃគូ។ លោកស្រីបញ្ជាក់ថា រដ្ឋាភិបាលអាមេរិកបន្តធ្វើការងារជាមួយស្ថាប័នពាក់ព័ន្ធក្រៅស្រុក ជាពិសេសជាមួយអង្គការសហប្រជាជាតិផងនោះដើម្បីជួយផ្តល់ការគាំទ្រក្នុងភាពជាដៃគូជាមួយប្រទេសកំពុងអភិវឌ្ឍន៍ជាពិសេសកម្ពុជាដូចជា ផ្តល់ការហ្វឹកហាត់ និងការកសាងសមត្ថភាពកងម្លាំងរក្សាសន្តិភាព។ អាមេរិកនិងកម្ពុជាបានបន្តការសហការក្នុងភាពជាដៃគូ ជុំវិញការហ្វឹកហាត់និងការសាងសមត្ថភាពកងទ័ពអស់ពេលច្រើនជាងប្រាំឆ្នាំមកហើយ ហើយលោកស្រីសង្កត់ធ្ងន់ថា បើភាគីពាក់ព័ន្ធដូចជាកម្ពុជា ស្វះស្វែងរកការគាំទ្រពីរដ្ឋាភិបាលអាមេរិកបន្ថែម ដើម្បីធានាពីការបន្តចូលរួមកសាងសន្តិភាពសាកល អាមេរិកពិតជាស្វាគមន៍ជានិច្ច។ ហើយម្យ៉ាងវិញទៀតអាមេរិកនឹងបន្តជជែកពិភាក្សាបន្តទៀតជុំវិញបញ្ហានេះ។កន្លងមក អាមេរិកបានផ្តល់ជំនួយទំហំប្រហែល ៦.៥ លានដុល្លារក្នុងរយៈពេល៥ឆ្នាំ ដើម្បីផ្តល់ការហ្វឹហាត់ កសាងសមត្ថភាពដល់កងកម្លាំងរដ្ឋដែលស្វែងរកការជួយជ្រោមជ្រែងដើម្បីជួយឲ្យពួកគេមានលទ្ធភាពចូលរួមរក្សាសន្តិសុខអន្តរជាតិអោយកាន់តែសកម្មជាងមុន ហើយអាមេរិកនឹងបន្តសកម្មភាពនេះទៀត៕
© រក្សាសិទ្ធិដោយ thmeythmey.com