ជាតិ
សង្គមជាតិ
អាដហុក និងពលរដ្ឋភូមិឡពាងចោទ លោក ស៊ុយ សែម ថា ជាអ្នកនៅពីក្រោយខ្នងក្នុងរឿងជម្លោះដីធ្លីជិត ១០ឆ្នាំ
×![]()
ភ្នំពេញ៖ សមាគមការពារសិទ្ធិមនុស្សអាដហុក (ADHOC) និងអ្នកភូមិឡពាង បានចោទប្រកាន់ រដ្ឋមន្ត្រីក្រសួងរ៉ែ និងថាមពល លោកស៊ុយ សែម ថា ជាអ្នកនៅពីខ្នងនៃវិវាទដីធ្លីរវាងក្រុមហ៊ុន KDC របស់លោកស្រី ជា ខេង ភរិយារបស់លោក និងអ្នកភូមិឡពាងជិត១០ឆ្នាំមកនេះ។ ពួកគេអះអាងបែបនេះ បន្ទាប់ពី លោក ស៊ុយ សែម បានចេញមុខជាសាធារណៈជាលើកដំបូងការពារក្រុមហ៊ុនភរិយារបស់លោកដែលមានជម្លោះដីធ្លីដ៏រ៉ាំរ៉ៃ ជាមួយប្រជាពលរដ្ឋ នៅសហគមន៍ឡពាងក្នុងខេត្តកំពង់ឆ្នាំងដោយបានបន្ទោសអង្គការការពារសិទ្ធិមនុស្សអាដហុក និងអ្នកនយោបាយថានៅពីក្រោយធ្វើការញុះញង់ទើបបញ្ហាជម្លោះដីធ្លីនេះមានការពិបាកក្នុងការដោះស្រាយ។
ជាការឆ្លើយតបនឹងការលើកឡើងរបស់លោក ស៊ុយ សែម ក្នុងសន្និសីទសារព័ត៌មាន កាលពីថ្ងៃទី១២ ខែឧសភា កន្លងមកនោះ នៅថ្ងៃទី២២ ខែឧសភានេះ មន្ត្រីសមាគមអាដហុក និងពលរដ្ឋក្នុងសហគមន៍ឡពាង បានចេញមុខបដិសេធការលើកឡើងរបស់លោក ស៊ុយ សែម ក្នុងសន្និសីទនោះ ។ ហើយថា លោករដ្ឋមន្ត្រីក្រសួងរ៉ែរូបនេះ គឺជាអ្នករារាំងដំណោះស្រាយរវាងក្រុមហ៊ុន និងពលរដ្ឋ កន្លងមក។
គួររម្លឹកថា នាសន្និសីទសារព័ត៌មានស្តីពីការប្រកាសដេញថ្លៃឲ្យក្រុមហ៊ុនបូមខ្សាច់ កាលពីថ្ងៃទី១២ ឧសភា លោក ស៊ុយ សែម បានឆ្លៀតលើកពីបញ្ហាជម្លោះដីធ្លីដ៏រ៉ាំរៃរវាងក្រុមហ៊ុនខេឌីស៊ីរបស់ភរិយាលោក ជាមួយប្រជាពលរដ្ឋនៅសហគមន៍ឡពាងឃុំតាជេស ស្រុកកំពង់ត្រឡាច កំពង់ឆ្នាំង។លោកបានថ្លែងថា ក្រុមហ៊ុន KDC របស់ភរិយាលោកបានទិញដីនៅភូមិឡពាង និងភូមិជាង ១០ នៅក្បែរនោះតាំងពីឆ្នាំ២០០៧ មក ដោយមានប័ណ្ណកម្មសិទ្ធិត្រឹមត្រូវនិងមានការទទួលស្គាល់ពីសុរិយោដីស្រុក និងខេត្ត ហើយចំណែកប្រជាពលរដ្ឋនៅភូមិឡពាង គឺមិនមានប័ណ្ណកម្មសិទ្ធិទេ។ លោក ស៊ុយ សែម បានបញ្ជាក់យ៉ាងនេះថា៖ « ពួកគាត់អត់មានប្លង់មានអីទេ គាត់ថាតែមាត់ទទេ។ ឲ្យយើងធ្វើម៉េចពួកគាត់អត់មានអីទាំងអស់គាត់លក់ដីហ្នឹងឲ្យគេអស់ហើយ»។
ថ្លែងក្នុងសន្និសីទសារព័ត៌មាន នៅទីស្នាក់ការកណ្តាលសមាគម ADHOC តំណាងប្រជាពលរដ្ឋនៅភូមិឡពាង អ្នកស្រី អ៊ុំ សូភី បានច្រានចោលចំពោះការលើកឡើងរបស់លោក ស៊ុយ សែម ហើយថា ក្រុមហ៊ុនរបស់ភរិយាលោក ស៊ុយ សែម ទៅវិញទេ ដែលឃុបឃិតជាមួយអាជ្ញាធរលួចធ្វើប្លង់ក្លែងក្លាយ និងរឹបអូសយកដីធ្លីពីប្រជាពលរដ្ឋ ដែលបានរស់នៅចាប់តាំងពីឆ្នាំ១៩៧៩ មក។ អ្នកស្រី បញ្ជាក់ដូច្នេះថា៖«ក្រុមហ៊ុនទេ ជាអ្នកប្លន់ដីរបស់ពួកខ្ញុំហើយបើឲ្យដីនៅតំបន់ផ្សេង ដែលពួកខ្ញុំអាចទទួលយកបានគឺដីនោះត្រូវនៅជិតសាលារៀន មានទីផ្សារ សម្រាប់ពួកខ្ញុំតែបើឲ្យទៅនៅឆ្ងាយរាប់គីឡូម៉ែត្រ ពួកខ្ញុំមិនទៅទេ។ ខ្ញុំនឹងដាក់ពាក្យបណ្តឹងរហូតទាល់តែមានយុត្តិធម៌សម្រាប់ពួកខ្ញុំ មិនមែនមានយុត្តិធម៌សម្រាប់តែអ្នកមានលុយមានអំណាចទេ»។
សន្និសីទសារព័ត៌មាន កាលពីថ្ងៃទី១២ ឧសភា លោក ស៊ុយ សែម បានលើកឡើងផងដែរថា ការដែលជម្លោះដីធ្លីនៅឡពាងនេះនៅបន្តអូសបន្លាយរហូតមកដល់បច្ចុប្បន្ន ដោយសារតែមានអង្គការអាដហុក និងអ្នកនយោបាយនៅពីក្រោយខ្នងធ្វើការញុះញង់និងបញ្ឆេះបញ្ហាជានិច្ចដែលធ្វើឲ្យពិបាកក្នុងការដោះស្រាយ។
ក្នុងសន្និសីទកាសែតនៅថ្ងៃទី ២២នេះ ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា បានសម្តែងការសោកស្តាយនិងចាត់ទុកការលើកឡើងរបស់រដ្ឋមន្ត្រីក្រសួងរ៉ែថា សមាគមលោកនៅពីក្រោយខ្នងជម្លោះដីធ្លីនោះថា ជាការលាបពណ៌ខុសពីការពិត។ លោកថា អាដហុក គ្រាន់តែអ្នកជួយប្រឹក្សាយោបល់និងបង្ហាញផ្លូវច្បាប់សម្រាប់ប្រជាពលរដ្ឋ ដែលរងគ្រោះក្នុងការស្វែងរកយុត្តិធម៌តាមផ្លូវច្បាប់ប៉ុណ្ណោះមិនមែនជាខ្នងបង្អែកក្នុងផ្លូវទុច្ចរិតណាមួយឡើយ។លោកបានអះអាងបែបនេះថា៖ «យើងជួយរកយុត្តិធម៌ជូនពួកគាត់តាមផ្លូវច្បាប់។ អាដហុក ពុំមានគោលការណ៍ញុះញង់ឲ្យពលរដ្ឋប្រើហិង្សាជាមួយក្រុមហ៊ុនទេ»។
ទំនាស់ដីធ្លីរវាងប្រជាពលរដ្ឋនៅឡពាងជាមួយក្រុមហ៊ុនខេឌីស៊ីរបស់លោកស្រី ជា ខេង ភរិយាលោក ស៊ុយ សែម បានផ្ទុះការតវ៉ាខ្លាំងតាំងពីឆ្នាំ ២០០៦ មកហើយមកដល់បច្ចុប្បន្ន គណៈកម្មការទី ១ នៃរដ្ឋសភាកំពុងធ្វើការសម្របសម្រួលជាមួយភាគីទាំងពីរ ដើម្បីរកដំណោះស្រាយ។
ប្រធានគណៈកម្មការទី ១ រដ្ឋសភា ផ្នែកសិទ្ធិមនុស្ស ទទួលពាក្យបណ្តឹងអង្កេត និងទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង ប្រាប់សារព័ត៌មានថ្មីៗថា មកដល់ពេលនេះ ពលរដ្ឋមួយចំនួនបានដាក់សំណើជាថវិកាក្នុងការដោះស្រាយជម្លោះដីធ្លីនេះ ហើយបន្ទាប់មកគណៈកម្មការនឹងយកសំណើនេះទៅប្រាប់ខាងក្រុមហ៊ុនដើម្បីធ្វើការចរចាគ្នា។ លោក បរិយាយដូច្នេះថា៖«យើងទទួលការស្នើសុំការសម្របសម្រួលពីភាគីទាំងពីរតែប្រសិនបើការចរចាពុំមានលទ្ធផលជាវិជ្ជមានទេនោះ យើងនឹងបញ្ជូនសំណុំរឿងនេះទៅកាន់អាជ្ញាធររាជរដ្ឋាភិបាលជាអ្នកដោះស្រាយវិញ»៕
© រក្សាសិទ្ធិដោយ thmeythmey.com
