ជាតិ
អគ្គស្នងការរងនគរបាលជាតិ ជំរុញឲ្យមន្ត្រីនគរបាលរឹតបន្តឹងលើការគ្រប់គ្រងជនបរទេស
× លោក ចាន់ អ៊ាន អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិក ជំរុញឲ្យមន្ត្រីនគរបាលទាំងអស់ បន្តររឹតបន្តឹងផ្នែកសន្តិសុខ សណ្តាប់ធ្នាប់បន្ថែមទៀត ដើម្បីបង្ការទប់ស្កាត់ភាពអសកម្មកើតឡើង ។ លោកបានបញ្ជាក់ថា បញ្ហាគ្រប់គ្រងជនជាតិបរទេសជាកត្តាសំខាន់ ដែលសមត្ថកិច្ចគួរយកចិត្តទុកដាក់ ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
ក្នុងពិធីប្រកាសផ្ទេរភារកិច្ច តែងតាំងមុខតំណែងនិងបំពាក់ឋានន្តរសក្តិ ជូនមន្ត្រីនគរបាលជាតិ ចំនួន៣៤រូប កាលពីថ្ងៃទី២២ ខែឧសភា ប្រធាននាយកដ្ឋានបុគ្គលិករូបនេះ បានបន្ថែមទៀតថា សមត្ថកិច្ចទាំងអស់ ត្រូវតែអនុវត្តន៍គោលនយោបាយ ភូមិ-សង្កាត់ មានសុវត្ថិភាព ឲ្យល្អប្រសើរ ខណ:រដ្ឋាភិបាល កំពុងមានវិធានការរឹតបន្តឹងពង្រឹងសន្តិសុខសង្គម ។
គួរបញ្ជាក់ថា កាលពីថ្ងៃទី២២ ខែឧសភា កម្ពុជាបានបណ្ដេញជនជាតិរុស្ស៊ី ៣នាក់ទៀត ចេញពីប្រទេស ដោយមូលហេតុស្នាក់នៅខុសច្បាប់ បង្កអសន្តិសុខ និងសណ្ដាប់សង្គម ។ ជនជាតិរុស្ស៊ី៣នាក់នេះ គឺជាបក្ខពួករបស់សេដ្ឋីរុស្ស៊ី ឈ្មោះ Polonsky ដែលកម្ពុជា ទើបបណ្ដេញចេញកាលពីសប្ដាហ៍មុន ដោយសារតែការស្នាក់នៅប្រទេសកម្ពុជា ដោយខុសច្បាប់ និងបង្កអសន្តិសុខជាតិ ។
ដោយឡែកបក្ខពួករបស់មហាសេដ្ឋីរុស្សី លោក Polonsky ៥នាក់ទៀត នឹងត្រូវបណ្ដេញចេញពីកម្ពុជា ជាបន្តបន្ទាប់ពីបទស្នាក់នៅកម្ពុជា ដោយខុសច្បាប់ និងធ្វើសកម្មភាពបង្កអសន្តិសុខជាតិ សណ្តាប់ធ្នាប់នៅក្នុងប្រទេសកម្ពុជា ដែលសរុបមកទល់ពេលនេះ គឺមានចំនួន៩នាក់ ។ នេះបើតាមអគ្គស្នងការដ្ឋាននគរបាលជាតិ៕
© រក្សាសិទ្ធិដោយ thmeythmey.com