អន្តរជាតិ
នយោបាយអន្តរជាតិ
អំណាចនិង ឥទ្ធិពលមហាយក្សចិនកើនពេញតំបន់អាមេរិកឡាទីន
×
ដំណើរទស្សនកិច្ចបួនប្រទេសនៅអាមេរិកឡាទីន របស់ប្រមុខរដ្ឋាភិបាលចិន ក្លាយជាសញ្ញាវិជ្ជមានសម្រាប់ប្រទេសនានាក្នុងតំបន់នោះ។ មេដឹកនាំចិនខាងលើបាននាំកញ្ចប់លុយទៅជាមួយយ៉ាងច្រើនសន្ធឹកសន្ធាប់សម្រាប់ផ្តល់ឲ្យប្រទេសពាក់ព័ន្ធប្រើប្រាស់ដើម្បីជំរុញការផ្សាភ្ជាប់និង ចំណងសេដ្ឋកិច្ចតាមរយៈការអភិវឌ្ឍន៍ហេដ្ឋារចនាសម្ព័ន្ធក្នុងតំបន់ និងជាលក្ខណៈអន្តជាតិដើម្បីបន្ថយគម្លៀតរដ្ឋអាមេរិកឡាទីនក្នុងការធ្វើពាណិជ្ជកម្ម។ ចិនក៏ទទួលបានប្រយោជន៍ច្រើនពីគម្រោងនេះដូចគ្នា។ ក្នុងដំណើរទស្សនកិច្ចនេះ មេដឹកនាំចិន និងអាមេរិកឡាទីនប្តេជ្ញាចិត្តថានឹងប្រឹងបង្កើនទំហំពាណិជ្ជកម្មឲ្យដល់ ៥០០ពាន់លានដុល្លារក្នុងរយៈពេល១០ឆ្នាំខាងមុខដែរ។ ភាពរីចម្រើននៃចំណងការទូតនិងពាណិជ្ជកម្មចិននិងប្រទេសតំបន់ បង្ហាញឲ្យឃើញថាឥទ្ធិពលក្រុងប៉េកាំងកំពុងគ្របដណ្តប់ពាសពេញតំបន់អាមេរិកឡាទីន ហើយដែនឥទ្ធិពលអាមេរិកនោះបន្តធ្លាក់ចុះខ្លាំងគួរឲ្យបារម្ភ។
សូមស្តាប់ការបកស្រាយរបស់លោក សៅ ផលនិស្ស័យជុំវិញវិញបញ្ហានេះ៖
ម្សិលមិញ ប្រមុខរដ្ឋាភិបាលចិនលោក Li Keqiangបានអញ្ជើញទៅដល់ទីក្រុង Santiago ប្រទេស៊ីលីជាទិសដៅចុងក្រោយ ដើម្បីជជែកពិភាក្សាពីការរឹតចំណងសហប្រតិបត្តិការសេដ្ឋកិច្ច និងនយោបាយរវាងប្រទេសទាំងពីរ។ ដំណើរទស្សនកិច្ចរបស់នាយករដ្ឋមន្ត្រីចិនខាងលើ ចាប់ផ្តើមឡើងតាំងពីថ្ងៃចន្ទសប្តាហ៍មុនម្ល៉េះដោយលោកចាប់ផ្តើមអញ្ជើញទៅកាន់ប្រទេសប្រេស៊ីលមុនគេបន្ទាប់មកលោកបន្តទៅកាន់ប្រទេសកូឡុំប៊ី និងបន្តចេញទៅប៉េរូ និងចុងក្រោយប្រទេសស៊ីលី។
ក្នុងដំណើរទស្សនកិច្ចទៅកាន់តំបន់អាមេរិកឡាទីនេះ នាយរដ្ឋមន្ត្រីចិនពាំនាំនូវកញ្ចប់ហិរញ្ញវត្ថុសម្រាប់ផ្គត់ផ្គង់ដល់រដ្ឋអាមេរិកឡាទីនក្នុងការអភិវឌ្ឍន៍ហេដ្ឋារចនាសម្ព័ន្ធក្នុងតំបន់ រួមជាមួយកិច្ចព្រមព្រៀងពាណិជ្ជកម្មជាច្រើនផងដែរ។ បណ្តាប្រទេសអាមេរិកឡាទីនបង្ហាញគោលជំហរគាំទ្ររដ្ឋាភិបាលក្រុងប៉េកាំងនិងមើលឃើញពីសារសំខាន់របស់ចិនក្នុងការជួយជំរុញកំនើនសេដ្ឋកិច្ច និងអភិវឌ្ឍន៍ប្រទេសតាមរយៈការកសាងហេដ្ឋារចនាសម្ព័ន្ធ។ សម្រាប់របបដឹកនាំក្រុងប៉េកាំងរបស់លោក ស៊ី ជិនពីង ហេដ្ឋារចនាសម្ព័ន្ធជាកម្លាំងចលកជម្រុញការផ្សាភ្ជាប់ បង្កើនទំនាក់ទំនងពាណិជ្ជកម្ម សេដ្ឋកិច្ច និងនយោបាយជាដើម។ បច្ចុប្បន្ននេះចិន បង្កើតធនាគារវិនិយោគហេដ្ឋារចនាសម្ព័ន្ធអាស៊ី និងគម្រោងខ្សែក្រវ៉ាត់មួយ វិថីមួយ ដែលរាល់គម្រោងទាំងនេះជាផែនការស្នូលនៃការជួយបង្កើនការអភិវឌ្ឍន៍និងកសាងហេដ្ឋារចនាសម្ព័ន្ធភ្ជាប់ពីចិនទៅដល់អាហ្វ្រិក អឺរ៉ុបជាថែមទៀតផង។
១.ចិនជម្រុញការសិក្សាគម្រោងសាងផ្លូវរថភ្លើងភ្ជាប់ពីប្រេស៊ីទៅប៉េរូ
ខណៈនៅប្រេស៊ីល ប្រមុខរដ្ឋាភិបាលចិនបានជួបពិភាក្សាជាលក្ខណទ្វេភាគីជាមួយប្រធានាធីបតីប្រេស៊ីល DilmaRousseffជុំវិញការបង្កើនទំហំពាណិជ្ជកម្មទ្វេភាគី និងបង្កនកិច្ចសហប្រតិបត្តិការសេដ្ឋកិច្ច។ កិច្ចព្រមព្រៀងជាច្រើនត្រូវមេដឹកនាំទាំងពីរចុះហត្ថលេខា ប៉ុន្តែអ្វីដែលសំខាន់មេដឹកនាំចិននេះបានប្រកាសផ្តល់លុយប្រមាណ៥០ពាន់លានដុល្លារអាមេរិកសម្រាប់ប្រេស៊ីលអភិវិឌ្ឍន៍ហេដ្ឋារចនាសម្ព័ន្ធក្នុងប្រទេសស្វាគមន៍ព្រឹត្តិការណ៍កីឡាអូឡាំពិកឆ្នាំក្រោយ។ ប្រេស៊ីល និងចិនមានទំនាក់ទំនងស្អិតល្មួតជាមួយគ្នាយូរមកហើយ ហើយម្យ៉ាងចិននិងប្រេស៊ីលសុទ្ធតែជាសមាជិកអង្គការBRICS ផងដែរនោះ។ ដោយឡែកលោក Li Keqiangបានប្រកាសជួយគាំទ្រផ្នែកហិរញ្ញវត្ថុចំពោះគម្រោងពិសេសសាងផ្លូវរថភ្លើងអន្តរអាម៉ាហ្សូន ភ្ជាប់ពីក្រុងRio de Janeiroឆ្នេរសមុទ្រ អាត្លង់ទិក ជាមួយឆ្នេរសមុទ្រប៉េរូមហាសមុទ្រប៉ាស៊ីហ្វិក។ ភាគីទាំងបីចិន ប៉េរូ និង ប្រេស៊ីលកំពុងយកចិត្តទុកសិក្សាពីគម្រោងនេះ ដើម្បីត្រួសត្រាយផ្លូវឲ្យមានការសាងសង់ឲ្យបានឆាប់រហ័ស ដើម្បីកាត់បន្ថយការចំណាយសម្រាប់ការដឹកជញ្ជូនទំនិញនិងវត្ថុធាតុដើមផ្សេង។ ប៉ុន្តែគេឃើញមានការព្រួយបារម្ភផងដែរចំពោះគម្រោងនេះ ដ្បិតវាអាចផ្តល់ផល់ប៉ះពាល់ដល់បរិស្ថាន ជាពិសេសលំនៅដ្ឋាននៃសហគមន៍ជនជាតិដើមភាគតិចតែម្តង។
២.ឥទ្ធិពលចិន ឆ្លងដល់ស៊ីលី និង កូឡុំប៊ី
ប្រទេសពីរទៀតដែលនាយករដ្ឋមន្ត្រីចិនអញ្ជើញទៅដល់គឺ ស៊ីលី និងកូឡុំប៊ី។ ចិនសម្លឹងឃើញសក្តានុពលនៃរដ្ឋលាតសន្ធឹងប្របមហាសមុទ្រប៉ាស៊ីហ្វិក ស៊ីលី។ ស៊ីលីជារដ្ឋដែលជិតស្និទ្ធជាមួយក្រុងវ៉ាស៊ីនតោនជាងគេ ដ្បិតរដ្ឋនេះកំពុងចរចាគ្នាក្នុង ក្របខណ្ឌនៃគម្រោងភាពជាដៃគូអន្តរប៉ាស៊ីហ្វិកដឹកនាំដោយក្រុងវ៉ាស៊ីនតោនផង។ ប៉ុន្តែដំណើរទស្សនកិច្ចជាប្រវត្តិសាស្ត្ររបស់ប្រមុខរដ្ឋាភិបាលចិន ជាការរឹតបន្តឹងចំណងមិត្តភាពទ្វេភាគី ស្របពេលដែលអាមេរិកបាត់បង់ឥទ្ធិពលបន្តិចម្តងៗពីតំបន់សមុទ្រការីប៊ីន។ សូមរំលឹកបន្តិចថា លោក Li បានជួបពិភាក្សាដើម្បីរឹតបន្តឹងចំណងពាណិជ្ជកម្មទេ្វភាគីជាមួយប្រធានាធិបតីស៊ីលីMichelle Bachelet មុនលោកបញ្ចប់ដំណើរទស្សនកិច្ចនៅអាមេរិកឡាទីន។
ចំណែកកូឡុំប៊ីឯណោះវិញ ក៏ជាទិសដៅពិសេសសម្រាប់ចិនដូចគ្នាក្នុងការបណ្តាក់ទុនរកស៊ី។ កិច្ចព្រមព្រៀងពាណិជ្ជកម្មមួយចំនួន ដែលមេដឹកនាំចិននិង ប្រធានាធិបតីកូឡុំប៊ី Juan Manuel Santos ចុះរួមគ្នា ហើយភាគីទាំងពីរបន្តពិភាក្សារួមគ្នាជុំវិញការបង្កើតតំបន់ពាណិជ្ជកម្មសេរីផង។ លោក Li Keqiangក៏ប្រកាសផ្តល់ជំនួយទំហំ ៨លានដុល្លារអាមេរិកដល់រដ្ឋាភិបាលកូឡុំប៊ី ដើម្បីកសាងតំបន់ដែលខ្ទេចខ្ទាំដោយសង្គ្រាម បើសិនករណីភាគីកងកម្លាំងឧទ្ទាមនិងរដ្ឋាភិបាល អាចឯកភាពគ្នាលើកិច្ចព្រមព្រៀងសន្តិភាពបញ្ចប់ជម្លោះប្រដាប់អាវុធ៦ទសវត្សមកហើយនោះ។
៣.ចិន និងរុស្ស៊ី សម្លឹងឃើញឱកាសពង្រីកឥទ្ធិពល ស្របពេលរដ្ឋអាមរិកឡាទីនមិនពេញចិត្តអាមេរិក
ដំណើរទស្សនកិច្ច របស់មេដឹកនាំកំពូលចិនមានទាំងប្រធានាធិបតីស៊ីជិនពីងផង និងនាយករដ្ឋមន្ត្រីចិនផងទៅអាមេរិកឡាទីន បញ្ជាក់ថាចិនកំពុងតែព្យាយាមពង្រឹងនិងពង្រីកឥទ្ធិពលរបស់ខ្លួននៅអាមេរិកទីនជាពិសេសទៅកាន់ប្រទេសផ្សេងទៀតដែលខ្លួនមិនសូវមានទំនាក់ទំនងជិតស្និទ្ធជាមួយ។បច្ចុប្បន្ននេះ មិនត្រឹមតែចិនមួយទេ ដែលកំពុងរត់សំដៅទៅអាមេរិកឡាទីន រុស្ស៊ីជាដៃគូចិនក៏ជាប្រទេសដែលមានទឹកមាត់ប្រៃនៅអាមេរិកឡាទីនដែរ។ ប្រទេសធំៗដូចជាប្រស៊ីល អាហ្សង់ទីន បូលីវី និងវេណេហ្ស៊ុយអេឡាជាដើមនោះសុទ្ធតែជាមិត្តរបស់រុស្ស៊ី ព្រោះពួកគេមិនមានទំនាក់ទំនងល្អជាមួយក្រុងវ៉ាស៊ីនតោន។ វេណេហ្សូអេឡារងទណ្ឌកម្មអាមេរិក ប្រមុខរដ្ឋនីកូឡាម៉ាឌុយរ៉ូ បន្តស្រែកប្រឆាំងរបបដឹកនាំលោកអូបាម៉ា ឥតដាច់។ ចំណែករបបដឹកនាំអាហ្សង់ទីនរបស់លោកស្រី Cristina Kirchner និងរបបដឹកនាំប្រេស៊ីលDilmaRousseff សុទ្ធតែរងការរិះគន់ពីក្រុងវ៉ាស៊ីនតោនរឿងពុករលួយជាដើម ហើយប្រទេសទាំងពីរខឹងអាមេរិករឿងប្រើភ្នាក់ងារសន្តិសុខជាតិលួចចារកម្មមេដឹកនាំខ្លួនផង។ យ៉ាងណាមិញ តាំងពីយូរមកហើយ សហរដ្ឋអាមេរិកហាក់មិនសូវខ្វាយខ្វាល់រឿងតំបន់នៅជិតខ្លួនប៉ុន្មានទេ។ អាមេរិកខ្វាយខ្វល់ពីតំបន់ផ្សេងនៅឆ្ងាយ ដែលផ្តល់ឱកាសដល់មហាអំណាចក្រៅតំបន់ឈានជើងចូលបានយ៉ាងស្រួល៕
© រក្សាសិទ្ធិដោយ thmeythmey.com