ជាតិ
សង្គមជាតិ
រូបភាពពីហ្វេសប៊ុក លោក សោម អូន
×![]()
×![]()
ការតវ៉ារបស់កម្មករអូសរទេះទំនិញឆ្លងកាត់ច្រកព្រំដែនប៉ោយប៉ែតបានឈានដល់ការផ្ទុះហិង្សា កំទេចទីស្នាក់ការគយ ដោយបានបង្កអោយខូចខាតរថយន្តមន្ត្រីគយ និងអគារការិយាល័យគយប្រចាំនៅច្រកប៉ោយប៉ែត។ អំពើហិង្សាបានកើតឡើង ក្រោយមានពាក្យចចាមអារ៉ាមថា កម្មករម្នាក់ដែលត្រូវបានសមត្ថកិច្ចចាប់ខ្លួនមានគ្រោះថ្នាក់ដល់ជីវិត។
ពីម៉ោង៩ព្រឹកនៅថ្ងៃទី២៥ឧសភានេះ កម្មករអូសរទេះប្រមាណ១០០នាក់ បានជួបជុំគ្នាតវ៉ាបិទកំណាត់ផ្លូវជាតិលេខ៥ ប្រឆាំងសាខាគយនៅច្រកប៉ោយប៉ែត ដែលបានទារលុយបង់ពន្ធពីក្រុមកម្មករដោយមិនចេញបង្កាន់ដៃ។ តំណាងកម្មករម្នាក់ឈ្មោះ ស៊ុំ ចាន់ធី បានរៀបរាប់ប្រាប់សារព័ត៌មានថ្មីៗថា ពួកគេទាមទារឲ្យមន្ត្រីគយចេញបង្កាន់ដៃលើរាល់ការបង់ពន្ធរបស់ពួកគេ។
លោកថា៖«ពួកខ្ញុំស្នើដល់រដ្ឋាភិបាលផង ជួយពិនិត្យមេគយ និងមេនគរបាលអន្តោប្រវេសន៍ នៅប៉ោយប៉ែតផង។ មន្ត្រីទាំងនេះ បានឲ្យខ្ញុំបង់ពន្ធទំនិញចាប់ហួយតាមរទេះចាប់ ៥ ទៅ ១០ម៉ឺនរៀល ដោយមិនមានវិក្ក័យបត្រត្រឹមត្រូវ។ ខ្ញុំលែងជឿ ពួកគាត់សន្យាជួយដោះ ស្រាយហើយ»។
បើតាមលោក ចាន់ធី ដដែល ក្រុមកម្មករចង់ឲ្យប្រធានសាខាគយចេញមុខដោះស្រាយ ប៉ុន្តែគេនៅតែមិនឃើញប្រធានសាខាគយនោះចេញមកឡើយ ហើយថែមទាំងដាក់កម្លាំងសមត្ថកិច្ចមកបង្ក្រាបទៀតផង។ ពេលនោះមានការប៉ះទង្គិចខ្លះរវាងសមត្ថកិច្ច និងក្រុមកម្មករ។ ហើយកម្មករម្នាក់ដែលរងរបួសត្រូវបានបញ្ជូនទៅមន្ទីរពេទ្យ។ តំណាងកម្មករបន្តថា អំពើហិង្សារបស់កម្មករបានផ្ទុះឡើង នៅពេលដែលមានពាក្យចចាមអារ៉ាមថា កម្មករដែលរងរបួសបានស្លាប់។
នៅល្ងាចថ្ងៃចន្ទនេះ អភិបាលក្រុងប៉ោយប៉ែត លោក ង៉ោ ម៉េងជ្រួន បានធ្វើរបាយការណ៍ទៅអភិបាលខេត្តដោយរៀបរាប់អំពីការខូចខាតទ្រព្យសម្បត្តិរបស់សាខាគយប៉ោយប៉ែតដែលរូមមានរថយន្ត៧គ្រឿង របងទីស្នាក់ការគយ និងអគារការិយាល័យគយ។ អភិបាលក្រុងប៉ោយប៉ែត បានដាក់បន្ទុកទៅលើមនុស្សមួយក្រុមថា ជាអ្នកញុះញង់ឲ្យកម្មករផ្ទុះកំហឹង៕
© រក្សាសិទ្ធិដោយ thmeythmey.com
