ជាតិ
សង្គមជាតិ
ការជួញដូរមនុស្សមានច្រើនរូបភាពនៅកំពង់ធំ
× កំពង់ធំ៖ នៅក្នុងឆ្នាំ២០១៤នេះ ករណីជួញដូរមនុស្ស ដើម្បីកេងប្រវ័ញ្ចកម្លាំងពលកម្មក្នុងខេត្តកំពង់ធំនៅតែបន្តកើតមានដដែលបើទោះបីជាមានការចូលរួមទប់ស្កាត់ពីអាជ្ញាធរនិងអង្គការមិនរដ្ឋាភិបាលយ៉ាងណាក៏ដោយ។ នេះបើការឱ្យដឹងពីមន្ត្រីផ្នែកសិទ្ធិមនុស្សរបស់អង្គការលីកាដូ។ មិនតែប៉ុណ្ណោះមេខ្យល់ដែលប្រព្រឹត្តបទល្មើសឧក្រិដ្ឋនេះ មានបណ្តាញស្ទើរគ្រប់ស្រុកក្នុងខេត្តកំពង់ធំ។ នេះជាក្តីបារម្ភមួយរបស់ពលរដ្ឋនិងជាបញ្ហាបន្ទាន់សម្រាប់អាជ្ញាធរ ត្រូវដោះស្រាយ។
បើតាមរបាយការណ៍របស់អង្គការការពារសិទ្ធិមនុស្សលីកាដូឆ្នាំ២០១៤ ការជួញដូរនេះ មាន៦ករណី។ មេខ្យល់ទាំងនោះ មានស្ទើរតែគ្រប់ស្រុកក្នុងខេត្តកំពង់ធំ ប៉ុន្តែខាងអង្គការយើងទទួលបានពាក្យបណ្តឹងតែពីរស្រុកប៉ុណ្ណោះ គឺស្រុកបារាយណ៍និងកំពង់ស្វាយ។ នេះបើតាមប្រសាសន៍របស់មន្ត្រីសិទ្ធិមនុស្សលីកាដូ លោក ឈួម រុណ។
មន្ត្រីលីកាដូដដែល បានបន្តថា ពលរដ្ឋភាគច្រើន ចាញ់បោកមេខ្យល់ដែលប្រាប់ថា រកការងារឱ្យធ្វើនៅប្រទេសម៉ាឡេស៊ី។ ហើយថារូបភាពនៃការបោកប្រាស់គឺធ្វើឡើងតាមរបៀបជាធ្វើទេសចរណ៍ ទៅក្រៅប្រទេស ដែលមានរយៈពេលប្រមាណ១ខែ។ បើតាមការរៀបរាប់របស់អ្នកការពារសិទ្ធិមនុស្សរូបនេះ រូបភាពទេសចរណ៍ទាំងនោះ បាននាំពលករទាំងនោះទៅដល់ប្រទេសម៉ាឡេស៊ី។
ពេលទៅដល់ប្រទេសម៉ាឡេស៊ី ពលករដដែលនឹងត្រូវលក់បន្តឱ្យឈ្មួញនៅក្នុងប្រទេសនោះ។ នៅពេលនោះហើយ ពួកប្រុសៗនឹងត្រូវធ្វើការ នៅលើទូកនេសាទត្រី ឬផ្នែកបូមខ្សាច់ ចំណែកស្រីៗត្រូវធ្វើការងារ ជាអ្នកបម្រើនៅតាមផ្ទះ។ «កម្មករទាំងនោះត្រូវធ្វើការទាំងយប់ថ្ងៃ ធ្វើការហួសកម្លាំង មិនមានម៉ោងឈប់សម្រាកដូចការងារធម្មតានោះទេ។ បន្ថែមលើនេះទៀត ពួកធ្វើការធ្ងន់ ដោយមិនបានទទួលកម្រៃអ្វីឡើយ ក្រៅពីបាយត្រឹមតែមួយចម្អែតក្រពះ»។
នេះតាមប្រសាសន៍របស់លោក ឈួម រុណ ដែលបញ្ជាក់ថា ពលករខ្លះត្រូវជាប់កិច្ចសន្យាធ្វើការរហូតដល់ទៅបីឆ្នាំក៏មានដែរ ហើយថាពេលខ្លះពលករធ្លាក់ខ្លួនឈឺ មិនអាចធ្វើឱ្យគេបាន តែពួកឈ្មួញមិនបានបញ្ចូនកម្មករនោះឱ្យត្រលប់មកស្រុកកំណើតនោះទេ។ លុះត្រាតែបងប្អូនអ្នកជំងឺ វេរលុយ១ពាន់ដុល្លារ ឱ្យខាងមេខ្យល់ ហើយមេខ្យល់នោះវេរបន្តឱ្យមេខ្យល់ក្នុងប្រទេសម៉ាឡេស៊ី ទើបគេបញ្ចូនអ្នកជំងឺនោះ មកប្រទេសកម្ពុជាវិញ។
យោងតាមការអះអាងរបស់មន្ត្រីលីកាដូ នាពេលថ្មីនេះដែរក៏មានក្រុមហ៊ុនបោកប្រាស់នាំពលករទៅធ្វើការនៅប្រទេសថៃផងដែរ។ ខាងក្រុមហ៊ុនបានសន្យាថា នឹងរកការងារឱ្យធ្វើ តែពលករត្រូវចេញថ្លៃធ្វើលិខិតឆ្លងដែនប្រមាណជា២៥០ទៅ៣០០ដុល្លារ។ ដូច្នេះពលករទាំងនោះ បានដើរខ្ចីលុយញាតិមិត្តយកទៅឱ្យក្រុមហ៊ុន ហើយរង់ចាំដំណឹងពី ការងាររបស់ខ្លួន ដោយកក្រុមហ៊ុនសន្យាថា រង់ចាំតែ១ខែប៉ុណ្ណោះ។ ប៉ុន្តែពួកគាត់រង់ចាំអស់ពេលជាង១ឆ្នាំទៅហើយ ក៏មិនទាន់ទទួលបានដំណឹងការងារនោះដដែល។ នេះក៏ជារូបភាពបោកប្រាស់មួយដែរ៕ © រក្សាសិទ្ធិដោយ thmeythmey.com