ជាតិ
សង្គមជាតិ
កសិដ្ឋានចិញ្ចឹមសត្វក្រពើនៅកម្ពុជាមានជាង៥៦០កន្លែង
×
លោក សួន ផល្លា មន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា បច្ចុប្បន្នកម្ពុជាមានកសិដ្ឋានចិញ្ចឹមក្រពើប្រមាណជាង៥៦០កន្លែង។ ក្នុងចំណោមកសិដ្ឋានទាំង៥៦០នោះ គឺមានតែចំនួន២០កសិដ្ឋានប៉ុណ្ណោះដែលបានចុះបញ្ជី អនុសញ្ញាអន្តរជាតិ CITES និងអាចនាំផលិតផលស្បែក ក្រពើទៅលក់នៅលើទីផ្សារអន្តរជាតិបាន។ លោកបន្ដថា ទីផ្សារស្បែកសត្វក្រពើដែលកម្ពុជានាំចេញទៅតំបន់អឺរ៉ុប ក៏កំពុងជួបប្រទះបញ្ហា ដោយសារតែមានតម្លៃទាបដែរ។
ក្នុងជំនួបប្រជុំជាមួយក្រុមអ្នកជំនាញបច្ចេកទេសខាងអភិរក្ស និងចិញ្ចឹមសត្វក្រពើ មកពីបណ្ដាប្រទេស៤០ នៅក្រុងសៀមរាបកាលពីពេលថ្មីៗនេះ លោក សួន ផល្លា មន្ត្រីជំនាញគ្រប់គ្រងអនុសញ្ញាសាយតេស (CITES) បានបញ្ជាក់ថា មូលហេតុដែលស្បែកសត្វក្រពើក្នុងប្រទេសកម្ពុជា ពិបាកក្នុងការនាំចេញទៅកាន់ទីផ្សារអន្តរជាតិ គឺទី១ស្បែកមិនសូវល្អត្រូវតាមស្ដង់ដារ និងទី២ដោយសារតែអនុសញ្ញាពាណិជ្ជកម្មអន្តរជាតិ CITES មិនទាន់ទទួលស្គាល់ថាស្បែកក្រពើទាំងនោះ។
លើសពីនេះលោក សួន ផល្លា បន្ដថា ស្បែកសត្វក្រពើកម្ពុជាក៏លក់មិនបានថ្លៃ ហើយមិនអាចនាំចេញទៅកាន់ទីផ្សារអន្តរជាតិបានច្រើននោះ គឺដោយសារតែកសិដ្ឋានចិញ្ចឹមក្រពើនៅកម្ពុជាមួយចំនួននោះ មិនបានចុះបញ្ជីផ្លូវច្បាប់ តាមអនុសញ្ញាអន្តរជាតិលើប្រភេទសត្វ និង រុក្ខជាតិដែលកំពុងរងគ្រោះថ្នាក់ ហៅកាត់ថាCITES នៅឡើយទេ។
បច្ចុប្បន្នកម្ពុជាមានកសិដ្ឋានចិញ្ចឹមក្រពើប្រមាណជាង៥៦០កន្លែង រួមមានរាជធានីភ្នំពេញ ខេត្តសៀមរាប បាត់ដំបង កំពង់ធំ កំពង់ឆ្នាំង បន្ទាយមានជ័យ ពោធិ៍សាត់ និងខេត្តកណ្ដាល ៕
© រក្សាសិទ្ធិដោយ thmeythmey.com