កីឡាអន្តរជាតិ
អន្តរជាតិ
លោក Sepp Blatter ប្រកាសលាលែងពីតំណែងជាប្រធាន FIFA
× លោក Sepp Blatter ដែលទើបជាប់ឆ្នោតសម្រាប់រយៈពេល៤ឆ្នាំទៀត ជាប្រធានសហព័ន្ធកីឡាបាល់ទាត់អន្តរជាតិ (FIFA) នោះ បានប្រកាសលាលែងពីតំណែងពីស្ថាប័នបាល់ទាត់កំពូលមួយនេះ។ តាមរយៈការប្រកាសរបស់ខ្លួន បុរសជនជាតិស្វីសវ័យ៧៩ឆ្នាំរូបនេះ បានជុំរុញឲ្យមានសមាជវិសាមញ្ញមួយដើម្បីរៀបចំជ្រើសរើសប្រធានថ្មី។
កាលពីសប្តាហ៍មុន បន្ទាប់ពីជាប់ឆ្នោតសារជាថ្មី លោក Blatter បានសន្យាបន្តដឹកនាំស្ថាប័ន FIFA ឲ្យឆ្ពោះទៅមុខបន្ថែមទៀត ដោយអាយុរបស់លោកមិនមែនជាបញ្ហាចោទនោះឡើយ។ ការលាលែងរបស់លោក ត្រូវបានគេវាយតម្លៃថា មានជាប់ពាក់ព័ន្ធនឹងការស៊ើបអង្កេតករណីពុករលួយក្នុងពិភពបាល់ទាត់ បើគិតចាប់តាំងពីលោកកាន់កាប់តំណែងជាប្រធាន FIFA កាលពីឆ្នាំ១៩៩៨ មក។
នៅមុនការបោះឆ្នោតជ្រើសរើសប្រធានអណ្តត្តិថ្មីកន្លងមក ស្ថាប័ន FIFA បានទទួលរងនូវរឿងរ៉ាវជាច្រើន ជាពិសេសការឃាត់ខ្លួនមន្ត្រីសំខាន់ៗចំនួន១៤នាក់ ក្រោមដីការបស់រដ្ឋអាជ្ញាសហរដ្ឋអាមេរិក។ អ្នកទាំងនោះ ជាប់ចោទពីបទប្រព្រឹត្តអំពើពុករលួយ ស៊ីសំណូក និងលាងលុយកខ្វក់ជាដើម។ អាជ្ញាធរស្វីសក៏បើកការស៊ើបអង្កេតផងដែរទាក់ទងនឹងការដេញថ្លៃធ្វើជាម្ចាស់ផ្ទះ World Cup ឆ្នាំ២០១៨ និង២០២២៕
© រក្សាសិទ្ធិដោយ thmeythmey.com