ជាតិ
សង្គមជាតិ
ខ្មែរឥស្លាមនឹងចាប់ផ្តើមខែបួសរបស់ខ្លួននៅពាក់កណ្តាលខែមិថុនានេះ
× ពលរដ្ឋខ្មែរឥស្លាមដែលរស់នៅក្នុងប្រទេសកម្ពុជា នឹងចាប់ផ្តើមខែរ៉ម៉ាឌន ឫខែបួសរបស់ខ្លួននៅពាក់កណ្តាលខែមិថុនាខាងមុខនេះហើយ។ មិនទាន់កំណត់ថ្ងៃពិតប្រាកដបាននោះទេ ព្រោះថាការចាប់ផ្តើមបួសរបស់សាសនិកឥស្លាម ត្រូវមើលលើលោកខែ នៃថ្ងៃផ្តើមខែរ៉ម៉ាឌននោះ។
គណៈដឹកនាំជាន់ខ្ពស់នៃសាសនាឥស្លាមកម្ពុជា តាមរយៈសេចក្តីជូនដំណឹងរបស់ខ្លួនបានឲ្យដឹងថា ការកំណត់ថ្ងៃចូលបួសរ៉ម៉ាឌនឆ្នាំ២០១៥នេះ គឺត្រូវរង់ចាំមើលខែខ្នើតខែរ៉ម៉ាឌន នៅល្ងាចថ្ងៃអង្គារទី ២៩ ខែសាក់ពាន ត្រូវនឹងថ្ងៃទី ១៦ មិថុនា។ ប្រសិនមើលឃើញលោកខែនៅល្ងាចថ្ងៃទី ១៦នោះ គឺត្រូវផ្តើមបួស នៅថ្ងៃទី ១៧ មិថុនា តែបើមើលមិនឃើញវិញ នោះការផ្តើមបួស គឺត្រូវចំថ្ងៃទី ១៨ មិថុនា ដោយរាប់បង្គ្រប់ ៣០ថ្ងៃនៃខែសាក់ពាន (ខែរបស់សាសនាឥស្លាម)។
គណៈដឹកនាំជាន់ខ្ពស់នៃសាសនាឥស្លាមកម្ពុជា តាមរយៈលោក សុះ កំរ៉ី ដែលជាចាងហ្វាង បានបញ្ជាក់ក្នុងសេចក្តីជូនដំណឹងរបស់ខ្លួន ដែលធ្វើនៅថ្ងៃទី២ មិថុនា ដោយជម្រាបទៅអ៊ីមាំ អ្នកគ្រប់គ្រងគ្រប់ជាន់ថ្នាក់ទាំងអស់ ត្រូវផ្តល់ដំណឹងមកកាន់ខ្លួន ប្រសិនបើអ្នកណាបានឃើញខែខ្នើតខែរ៉ម៉ាឌន ដើម្បីត្រួតពិនិត្យ និងចៀសវាងការខុសណាមួយ។ សម្រាប់ការប្រកាសជាសាធារណៈអំពីការផ្តើមបួស នឹងធ្វើឡើងតាមរយៈវិទ្យុ FM 96 MHz ទូរទស្សន៍បាយ័ន និងទូរទស្សន៍អប្សរា នៅល្ងាចថ្ងៃទី ១៦ មិថុនា ឆ្នាំ២០១៥ វេលាម៉ោង ៧កន្លះយប់។
គួររម្លឹកថា ដើម្បីរិតចំណងរវាងថ្នាក់ដឹកនាំប្រទេស និងសាសនិកឥស្លាមកម្ពុជា ប្រមុខរដ្ឋាភិបាលកម្ពុជា បានប្រកាសថាខ្លួននឹងរៀបចំពិធីពិសាអាហារស្រាយបួសរួមគ្នាជារៀងរាល់ឆ្នាំ។ ជាក់ស្តែងនៅឆ្នាំនេះ ដែលជាឆ្នាំទីពីរនៃការរៀបចំអាហារស្រាយបួស គឺត្រូវធ្វើឡើងនៅថ្ងៃទី ២៦ មិថុនា (ក្នុងខែរ៉ម៉ាឌន) ដែលគ្រោងមាន មន្ត្រីការទូត ថ្នាក់ដឹកនាំ និងសាសនិកឥស្លាមមកពីទីជិតឆ្ងាយចូលរួមច្រើនកុះករផងដែរ។ កាលពីឆ្នាំទៅ ពិធីជួបជុំអាហារស្រាយបួសជាថ្នាក់ជាតិ រៀបចំឡើងនៅសាលសន្និសីទកោះពេជ្រ នៅថ្ងៃទី ១៨ ខែកក្កដា៕
© រក្សាសិទ្ធិដោយ thmeythmey.com