កីឡាអន្តរជាតិ
អន្តរជាតិ
FIFA បានសងជំងឺចិត្ត៥លានអឺរ៉ូដល់អៀរឡង់លើករណី Henry យកដៃទៅប៉ះបាល់
× លោក John Delaney ប្រធានសហព័ន្ធកីឡាបាល់ទាត់អៀរឡង់ បានអះអាងក្នុងបទសម្ភាសមួយជាមួយវិទ្យុ RTE នៅថ្ងៃព្រហស្បតិ៍ថា ស្ថាប័នរបស់លោកបានទទួលប្រាក់ជំងឺចិត្តចំនួន៥លានអឺរ៉ូ (ជិត៦លានដុល្លារអាមេរិក) ពីសហព័ន្ធកីឡាបាល់ទាត់អន្តរជាតិ (FIFA) ជុំវិញករណីខ្សែប្រយុទ្ធបារាំង Thierry Henry យកដៃទៅប៉ះបាល់ (Handball) ដែលនាំឲ្យ William Gallas តែតបាល់បញ្ចូលទីលើអៀរឡង់ នៅវគ្គជម្រុះ World Cup កាលពីថ្ងៃ១៨ ខែវិច្ឆិកា ឆ្នាំ២០០៩ ។
បើតាមលោក John Delaney សហព័ន្ធកីឡាបាល់ទាត់អៀរឡង់ បានទទួលជំងឺចិត្តភ្លាមៗ ពោលគឺនៅក្នុងឆ្នាំ២០០៩ ។ លោកបានបង្ហើបអាថ៌កំបាំងប្រាប់វិទ្យុ RTE ផងដែរថា ការសងជំងឺចិត្ត គឺក្នុងន័យលួងលោមកុំឲ្យអៀរឡង់ ធ្វើការតវ៉ាទៅតុលាការទាក់ទងនឹងករណី Handball របស់ Henry ខណៈបារាំង បានបោះជំហានទៅកាន់ព្រឹត្តិការណ៍ World Cup កាលពីឆ្នាំ២០១០ ។
យោងតាមការផ្សាយរបស់ The Guardian ប្រធានក្រុម Roy Kean នៃក្រុមជម្រើសជាតិអៀរឡង់ ដែលបានទាមទារឲ្យមានការប្រកួតឡើងវិញ ធ្លាប់បាននិយាយសហព័ន្ធកីឡាបាល់ទាត់អៀរឡង់ ទទួលបាននូវការតបស្នងវិញជុំវិញករណី Handball របស់ Thierry Henry៕
© រក្សាសិទ្ធិដោយ thmeythmey.com